នៅថ្ងៃបើកបវេសនកាលឆ្នាំថ្មី អភិបាលខណ្ឌពោធិសែនជ័យ នាំយកម៉ូតូចំនួន ៦ គ្រឿង ប្រគល់ជូន សិស្សានុសិស្ស ចំនួន ៦នាក់ នៅវិទ្យាល័យ ហ៊ុន សែន ជម្ពូវ័នប្រឡងជាប់និទ្ទេស A

ភ្នំពេញ៖ ម៉ូតូចំនួន ៦ គ្រឿង ជាអំណោយរបស់ លោក ហែម ដារិទ្ធ អភិបាលខណ្ឌពោធិ៍សែនជ័យ សំរាប់លើកទឹកចិត្តដល់ប្អូនៗ សិស្សានុសិស្ស ដែលប្រឡងជាប់ សញ្ញាប័ត្រមធ្យមសិក្សាទុត្តិយភូមិ និទ្ទេស A ឆ្នាំសិក្សា ២០១៧ – ២០១៨ ត្រូវបានប្រគល់ជូន សិស្សានុសិស្ស ចំនួន ៦នាក់ នៅវិទ្យាល័យ ហ៊ុន សែន ជម្ពូវ័ន ក្នុងឱកាសប្រារព្ធពិធីបើកបវេសនកាល ឆ្នាំសិក្សាថ្មី ២០១៨-២០១៩ នាព្រឹកថ្ងៃទី ១ ខែវិច្ឆិកា ឆ្នាំ២០១៨នេះ។
ក្នុងពិធីនោះលោក នាយកវិទ្យាល័យ ហ៊ុន សែន ជម្ពូវ័ន បានឱ្យដឹងថា ក្នុងឆ្នាំសិក្សា២០១៧-២០១៨ វិទ្យល័យជម្ពូវ័ន មានសិស្សានុសិស្ស ថ្នាក់ទី១២ ប្រឡងសញ្ញាប័ត្រមធ្យមសិក្សាទុត្តិយភូមិ និទ្ទេស Aចំនួន ៦ នាក់ ,និទ្ទេស B ២២ នាក់ ,និទ្ទេស C ៣៣នាក់,និទ្ទេស D ៦៦នាក់ និងនិទ្ទេស E ២៤២នាក់ ស្មើនឹង៤៨% នៃចំនួនសិស្ស ដែលមានវត្តមានចូលប្រឡង ។

ថ្លែងក្នុងឱកាសនោះ លោក ហែម ដារិទ្ធ បានលើកឡើងថានេះជាការឆ្លើយតប នឹងការសន្យារបស់លោក ចំពោះសិស្សានុសិស្ស នៅនៅក្នុងខណ្ឌពោធិ៍សែនជ័យ ទៅនឹងការប្រឹងប្រែងខិតខំរៀនសូត្ររបស់ប្អូនៗ រហូតទទួលបានលទ្ធផល និទ្ទេស A ក្នុងពេលបញ្ចប់ការសិក្សា មធ្យមសិក្សាទុត្តិយភូមិប្រចាំឆ្នាំ ។ តាមពិត ម៉ូតូនេះ ត្រូវប្រគល់ជូនប្អូនៗ តាំងពីក្រោយការប្រកាសលទ្ធផលមកម្លេះ តែលោក សុំអធ្យាស្រ័យ ចង់យកថ្ងៃនេះ ព្រោះជាថ្ងៃបើកបវេសនកាលឆ្នាំថ្មីគឺចង់ឱ្យប្អូនៗដែលត្រូវចូលរៀនថ្នាក់ទី១២ ឆ្នាំនេះ បានឃើញផ្ទាល់ភ្នែក ថាការខិតខំប្រឹងប្រែងរៀនសូត្រ ហើយប្រឡងជាប់បាននិទ្ទេស A និងបានទទួលរង្វាន់បែបនេះ ដូចប្អូនៗដែលបាននិទ្ទេស A មុនៗដែរ ។ ជាមួយនេះ លោក ក៍សន្យាផ្តល់រង្វាន់ ម៉ូតូ ជាបន្តទៀត សំរាប់ឆ្នាំក្រោយ ជូនសិស្សណាដែលជាប់និទ្ទេស A ទោះបីជាប់ប៉ុន្មាននាក់ក៍ដោយ ។ លោក ហែម ដារិទ្ធិ បញ្ចាក់ថា ម៉ូតូ ទាំងនេះ មិនមែនជាថវិការរបស់លោកតែម្នាក់ឯងនោះទេ គឺបានមកពីការចូលរួមពីមិត្តភ័ក្ត្រ និងសប្បុរសជន ដែលជាអ្នកមានធុនធន កំពុងរកស៊ីក្នុងមូលដ្ឋានខណ្ឌពោធិ៍សែនជ័យ ដែលឆ្នាំនេះ ចំណាយម៉ូតូ ចំនួន ៩ គ្រឿង ក្នុងនោះ ៣ គ្រឿង ផ្តល់ជូនសិស្សានុសិស្ស ស្រុកព្រៃកប្បាស និង ៦ គ្រឿងទៀត ផ្តល់ជូនប្អូនៗ នៅវិទ្យាល័យ ហ៊ុនសែន ជម្ពូវ័ន នាថ្ងៃនេះ ។

ក្នុងឱកាសនោះ លោកអភិបាលខណ្ធពោធិសែនជ័យ បានចែកសំភារៈសិក្សា មានសៀវភៅ ប៊ិច ដល់ប្អូនៗ ជាច្រើននាក់ ដែលរៀនបានលេខ ១ ដល់លេខ ៣ សំរាប់ថ្នាក់ ទី៧ និងទី៨ នៃឆ្នាំកន្លងមក និងឧបត្តម្ភ ថវិការ ១០លានរៀល សំរាប់ដំណើរកសាន្តរបស់លោកគ្រូ អ្នកគ្រូ ផងដែរ ៕