អាល្លឺម៉ង់ និងបារាំង ចោទប្រកាន់ទីក្រុងមូស្គូ ពីការបាញ់ទម្លាក់ drone
ប្រទេសអាល្លឺម៉ង់ និងបារាំង បានថ្កោលទោសចំពោះក្រុមផ្ដាច់ខ្លួន ដែលកាន់កាប់ភាគខាងកើតប្រទេសអ៊ុយក្រែន ចំពោះការបាញ់ទម្លាក់ drone របស់អង្គការសន្តិសុខ និងកិច្ចសហប្រតិបត្តិការក្នុងទ្វីបអឺរ៉ុប (OSCE) និងបានចោទប្រកាន់ទីក្រុងមូស្គូ និងក្រុមផ្ដាច់ខ្លួនដែលគាំទ្រដោយទីក្រុងមូស្គូ ពីការបង្កហេតុនេះ ។ ក្នុងសេចក្ដីថ្លែងការណ៍រួមមួយ របស់ទីក្រុង Berlin និង Paris បាននិយាយថា drone រយៈចម្ងាយឆ្ងាយមួយគ្រឿង ត្រូវបានបាញ់ទម្លាក់ កាលពីព្រឹកព្រលឹមថ្ងៃទី២៧ខែតុលា ក្បែរព្រំដែនប្រទេសរុស្សី-អ៊ុយក្រែន លើទឹកដីដែលកាន់កាប់ដោយក្រុមផ្ដាច់ខ្លួន ដែលគាំទ្រដោយទីក្រុងមូស្គូ ។ ប្រទេសទាំងពីរ បានសរសេរនៅក្នុងសេចក្ដីថ្លែងការណ៍មួយ ដែលចេញផ្សាយកាលពីថ្ងៃព្រហស្បត្តិ៍ថា ព័ត៌មានដែលប្រមូលផ្ដុំដោយបេសកកម្មអង្កេតការណ៍ បានឱ្យដឹងថា សហព័ន្ធ រុស្ស៊ី និងក្រុមផ្ដាច់ខ្លួនដែលខ្លួនគាំទ្រ ត្រូវទទួលខុសត្រូវចំពោះការធ្លាក់ drone នេះ ៕