ក្រសួងការបរទេស ប្រកាសលទ្ធផលនៃទស្សនកិច្ចផ្លូវការរបស់ សម្ដេចមហាបវរធិបតី ហ៊ុន ម៉ាណែត នៅសាធារណរដ្ឋបារាំង

ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២០ខែមករាឆ្នាំ២០២៤នេះបានចេញសេចក្តីប្រកាសព័ត៌មាន
«លទ្ធផលនៃទស្សនកិច្ចផ្លូវការរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅសាធារណរដ្ឋបារាំង»។

ក្នុងឱកាសនៃដំណើរទស្សនកិច្ចផ្លូវការនៅសាធារណរដ្ឋបារាំងពីថ្ងៃទី១៨-១៩ ខែមករា ឆ្នាំ ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានកិច្ចសន្ទនាជាមួយ ឯកឧត្តម អេម៉ានុយអែល ម៉ាក្រុង ប្រធានាធិបតីនៃសាធារណរដ្ឋបារាំង នៅវិមានអេលីហ្សេ នៅថ្ងៃទី១៨ ខែមករា ឆ្នាំ២០២៤។

បន្ទាប់ពី ឯកឧត្តម អេម៉ានុយអែល ម៉ាក្រុង បានទទួលស្វាគមន៍យ៉ាងកក់ក្តៅ សម្តេចធិបតីនាយក រដ្ឋមន្ត្រី បានរំលឹកពីព្រះរាជទស្សនកិច្ចផ្លូវការរបស់ ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅក្នុងខែវិច្ឆិកា ឆ្នាំ២០២៣ និងទស្សនកិច្ច ការងាររបស់ សម្តេចអគ្គមហាសេនាបតីតេជោ ហ៊ុន សែន ពេលនោះជានាយករដ្ឋមន្ត្រីនៃព្រះរាជាណា ចក្រកម្ពុជា កាលពីខែធ្នូ ឆ្នាំ២០២២ នៅសាធារណរដ្ឋបារាំង។ សម្ដេចធិបតី ក៏បានសម្តែងនូវសេចក្តី សោមនស្សរីករាយ ដោយបារាំងគឺជាប្រទេសតែមួយគត់ដែលបានទទួលស្វាគមន៍ទស្សនកិច្ចរបស់ឥស្សរជន កំពូលកម្ពុជា ដល់ទៅ ៣រូប ក្នុងរយៈពេលតែ១៣ខែប៉ុណ្ណោះ។ បារាំងជាប្រទេសដំបូងគេក្នុងចំណោម បណ្តាប្រទេសអឺរ៉ុបដែល សម្តេចធិបតី បានអញ្ជើញបំពេញទស្សនកិច្ចផ្លូវការ ហើយ សម្តេចធិបតី ជា ឥស្សជនបរទេសទីមួយ ដែល ប្រធានាធិបតី ទទួលស្វាគមន៍នៅដើមឆ្នាំថ្មីនេះ។ ទាំងនេះគឺជាសក្ខីភាពដ៏ វិសេសវិសាលចំពោះសក្ដានុពលថ្មីនៅក្នុងទំនាក់ទំនងស្និទ្ធស្នាលជាប្រវត្តិសាស្ត្ររវាងកម្ពុជា និងបារាំងក្នុង
រយៈពេលជាង១៨០ឆ្នាំ។

ដោយកត់សម្គាល់ឃើញនូវសន្ទុះរីកចម្រើននៅក្នុងកិច្ចសហប្រតិបត្តិការរវាងប្រទេសទាំងពីរ ថ្នាក់ដឹកនាំប្រទេ
ទាំងពីរបានឯកភាពគ្នាលើកកម្ពស់ទំនាក់ទំនងទ្វេភាគី ក្នុងគោលដៅសម្រេចបាននូវភាពជាដៃគូយុទ្ឋសាស្រ្ត ដែលជាសក្ខីភាពយ៉ាងជាក់ច្បាស់នូវភាពស៊ីជម្រៅ និងដ៏ល្អប្រពៃជាយូរ នៃចំណងមិត្តភាពជិតស្និទ្ធអង្វែងរវាងប្រទេសទាំងពីរ។

ក្នុងឱកាសកិច្ចសន្ទនានេះ សម្តេចធិបតី បានរំលឹកស្វាគមន៍តួនាទីរបស់បារាំងក្នុងនាមជាស្ថាបនិក និងជាសហប្រធាននៃសន្និសីទទីក្រុងប៉ារីសស្តីពីកម្ពុជា ដែលបាននាំទៅសម្រេចបាននូវ “កិច្ចព្រមព្រៀង ទីក្រុងប៉ារីស” ក្នុងឆ្នាំ១៩៩១ និងការរួមចំណែកយ៉ាងសំខាន់របស់បារាំងក្នុងការស្ដារ និងអភិវឌ្ឍសេដ្ឋកិច្ច និងសង្គមរបស់កម្ពុជាតាំងពីពេលនោះមក តាមរយៈទីភ្នាក់ងារបារាំងសម្រាប់ការអភិវឌ្ឍ (AFD) ដែលបាន ធ្វើឱ្យកម្ពុជា ក្លាយជាប្រទេសមានចំណូលមធ្យមកម្រិតទាប និងស្ថិតនៅលើមាគ៌ាឆ្ពោះទៅប្រទេសចំណូល មធ្យមកម្រិតខ្ពស់នៅឆ្នាំ២០៣០ និងប្រទេសចំណូលខ្ពស់នៅឆ្នាំ២០៥០។

ជាការឆ្លើយតប ឯកឧត្តម អេម៉ នុយអែល ម៉ាក្រុង បានបញ្ជាក់ពីការប្តេជ្ញាបន្តផ្តល់ហិរញ្ញប្បទានសហប្រតិបត្តិការដល់កម្ពុជា តាមរយៈ ទីភ្នាក់ងារបារាំងសម្រាប់ការអភិវឌ្ឍក្នុងទំហំទឹកប្រាក់ ២១៥លានអឺរ៉ូ ដល់វិស័យបណ្តុះបណ្តាលវិជ្ជាជីវៈ ថាមពល និងផលិតកម្មទឹកស្អាត។
ថ្នាក់ដឹកនាំទាំងពីរ បានលើកឡើងនូវការយកចិត្តទុកដាក់ដល់ការលើកកម្ពស់អង្គការហ្វ្រង់កូហ្វូនី ដែលកម្ពុជាជាសមាជិកស្ថាបនិកដ៏សកម្មមួយ និងរួមគ្នាជំរុញវត្តមានភាសាបារាំងនៅកម្ពុជា ដែលមាន
អ្នកនិយមនិយាយភាសាបារាំងច្រើនជាងគេក្នុងចំណោមបណ្ដាប្រទេសនៅអាស៊ី។ ឯកឧត្តមប្រធានាធិបតី
ក៏បានបង្ហាញជំហរគាំទ្រពេញទំហឹង ចំពោះបេក្ខភាពកម្ពុជាក្នុងការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ នៅទីក្រុងភ្នំពេញ ឆ្នាំ២០២៦ ខាងមុខ។ ជាការឆ្លើយតប សម្តេចធិបតី បានបញ្ជាក់ថា កម្ពុជាកំពុងត្រៀមខ្លួនរៀបចំព្រឹត្តការណ៍ដ៏សំខាន់នេះ ហើយក៏បានជូនពរបារាំងទទួលបានជោគជ័យក្នុង ការធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនីលើកទី១៩ និងកីឡាអូឡាំពិក និងប៉ារ៉ាឡាំពិកនៅក្នុងឆ្នាំ២០២៤ នេះ។

នៅក្នុងក្របខ័ណ្ឌនៃការជំរុញ និងលើកកម្ពស់ភាសាបារាំងដែលជាអាទិភាពសំខាន់មួយរបស់ បារាំង សម្ដេចធិបតី ក៏បានជម្រាបជូននូវគំនិតផ្តួចផ្តើមផ្ទាល់របស់ សម្តេច ថាភាគីបារាំងអាចពិនិត្យលទ្ធភាព បង្កើតមជ្ឈមណ្ឌលវប្បធម៌ និងភាសាប្រចាំតំបន់នៅកម្ពុជា តាមរយៈការលើកទឹកចិត្តដល់ការវិនិយោគតាម រូបមន្តភាពជាដៃគូរវាងរដ្ឋ និងឯកជន(PPP)។ ម៉្យាងទៀត សម្ដេចធិបតី ក៏បានថ្លែងអំណរគុណបារាំង ដែលបាន និងកំពុងជួយកម្ពុជាក្នុងការអភិរក្សបេតិកភណ្ឌ ការលើកកម្ពស់វិស័យវប្បធម៌ និងវិស័យអប់រំនៅ កម្ពុជា និងសង្ឃឹមថាបារាំងនឹងបន្តជួយដល់វិស័យទាំងនេះ។ សម្តេចធិបតី ក៏បានស្នើភាគីបារាំងទុកលទ្ធភាព ខ្លះជូនរាជរដ្ឋាភិបាលកម្ពុជា ក្នុងការកំណត់ជំនាញសិក្សារបស់និស្សិតកម្ពុជាដែលទទួលបានអាហារូបករណ៍
សម្រាប់ជំនាញដែលឆ្លើយតបនឹងតម្រូវការជាអាទិភាពក្នុងការអភិវឌ្ឍប្រទេស ហើយរាជរដ្ឋាភិបាលកម្ពុជា នឹងពិនិត្យលទ្ធភាពចូលរួមផ្ដល់អាហារូបករណ៍ទាំងនោះផងដែរ។

ខាងផ្នែកការពារបរិស្ថាន ឯកឧត្តមប្រធានាធិបតី បានជម្រាបអំពីគំនិតផ្តួចផ្តើមរបស់បារាំងស្តីពី កតិកាសញ្ញាទីក្រុងប៉ារីសសម្រាប់ប្រជាជន និងភពផែនដី (Paris) Pact for the People and the Planet) និងស្នើកម្ពុជាចូលរួមគាំទ្រ។ ជាការឆ្លើយតប សម្ដេចធិបតី បានសម្តែងពីការគាំទ្ររបស់កម្ពុជា ចំពោះគំនិតផ្តួចផ្តើមរបស់បារាំងនេះ និងបានជម្រាបជូន ឯកឧត្តមប្រធានាធិបតី អំពីកិច្ចខិតខំប្រឹងប្រែង របស់រាជរដ្ឋាភិបាល ក្នុងការចូលរួមជាមួយអន្តរជាតិក្នុងការការពារបរិស្ថាន ព្រមទាំងជម្រាបជូនអំពី ផែនការរបស់រាជរដ្ឋាភិបាលកម្ពុជាក្នុងការកាត់បន្ថយការបំភាយកាបូន ៧០% ត្រឹមឆ្នាំ២០៣០ និង សម្រេចឱ្យបាននូវអព្យាក្រឹតកាបូនត្រឹមឆ្នាំ២០៥០។ ក្នុងគោលដៅនេះ កម្ពុជាសូមលើកទឹកចិត្តដល់ក្រុមហ៊ុន បារាំងដែលមានចំណាប់អារម្មណ៍មកវិនិយោគ នៅកម្ពុជាក្នុងវិស័យអន្តរកាលថាមពល ដែលទាំងរាជរដ្ឋ ភិបាលកម្ពុជា ទាំងរដ្ឋាភិបាលបារាំងក៏ដូចជាបណ្តាប្រទេសនៅលើពិភពលោកទាំងអស់កំពុងផ្តោតការយក ចិត្តទុកដាក់។
លើសពីនេះ សម្តេចធិបតី និង ឯកឧត្តមប្រធានាធិបតី ក៏បានផ្លាស់ប្តូរទស្សនៈអំពីបញ្ហាតំបន់ និងអន្តរជាតិ ដែលជាកង្វល់រួម ព្រមទាំងបានបញ្ជាក់សារជាថ្មីនូវការប្តេជ្ញាចិត្តរបស់រដ្ឋាភិបាលនៃប្រទេសទាំងពីរក្នុងការ ចូលរួមថែរក្សាសន្តិភាព និងសន្តិសុខសកល។
ក្នុងវិស័យសេដ្ឋកិច្ច និងពាណិជ្ជកម្ម សម្តេចធិបតី បានកត់សម្គាល់អំពីការកើនឡើងនូវទំហំពាណិជ្ជកម្ម រវាងកម្ពុជា និងបារាំង ព្រមទាំងវត្តមានរបស់ក្រុមហ៊ុនបារាំងធំៗនៅកម្ពុជាផងដែរ រួមមានក្រុមហ៊ុន ថាមពល TotalEnergies និងក្រុមហ៊ុន VINCI ជាដើមដែលកំពុងធ្វើប្រតិបត្តិការវិនិយោគនៅកម្ពុជា។

បន្ទាប់ពីបញ្ចប់កិច្ចសន្ទនាជាមួយ ឯកឧត្តមប្រធានាធិបតី អេម៉ានុយអែល ម៉ាក្រុង នៅថ្ងៃដដែល សម្តេច ធិបតី ក៏បានជួបសម្តែងការគួរសមជាបន្តបន្ទាប់ជាមួយឯកឧត្តម Gérard LARCHER ប្រធាន ព្រឹទ្ធសភា និងលោកជំទាវ Yaël BRAUN-PIVET ប្រធានរដ្ឋសភានៃសាធារណរដ្ឋបារាំង ដើម្បីលើក កម្ពស់ទំនាក់ទំនងសភារវាងកម្ពុជា និងបារាំងឱ្យមានសន្ទុះថ្មី។
ក្នុងក្របខ័ណ្ឌនីតិប្បញ្ញត្តិ ភាគីកម្ពុជា និងបារាំង បានផ្ដោតសំខាន់ទៅលើការបន្តពង្រឹង និងពង្រីក កិច្ចសហប្រតិបត្តិការឱ្យកាន់តែល្អប្រសើរ និងស៊ីជម្រៅរវាងប្រទេសទាំងពីរ ដើម្បីជាឧត្តមប្រយោជន៍ដ៏ ខ្ពង់ខ្ពស់ជូនប្រទេសទាំងពីរ និងបានប្តេជ្ញាបន្តរឹតចំណងរវាងក្រុមមិត្តភាពនៃសភាទាំងពីរថ្នាក់របស់ ប្រទេសទាំងពីរ។ ភាគីទាំងពីរបានបង្ហាញពីឆន្ទៈមោះមុតក្នុងការជំរុញកិច្ចការទូតសភាតាមរូបភាពន ការផ្លាស់ប្តូរទស្សនកិច្ចរវាងថ្នាក់ដឹកនាំសភា ដើម្បីចែករំលែកបទពិសោធន៍ការងារសភា និងធ្វើកិច្ចសហ ប្រតិបត្តិការទ្វេភាគីទាំងក្នុងកម្រិតថ្នាក់ដឹកនាំជាន់ខ្ពស់ និងកម្រិតសមាជិកតាមតំបន់ ក៏ដូចជាកម្រិតអន្តរជាតិ។

សម្ដេចធិបតី ឯកឧត្តមប្រធានព្រឹទ្ធសភា និងលោកជំទាវប្រធានរដ្ឋសភាបារាំង បានកត់សម្គាល់ថាប្រទេសទាំងពីរកម្ពុជា-បារាំងមានចក្ខុវិស័យរូមគ្នាក្នុងកិច្ចសហប្រតិបត្តិការលើវិស័យនយោបាយ វប្បធម៌
សេដ្ឋកិច្ច និងអន្តរកាលថាមពល។
ក្នុងជំនួបជាមួយ ឯកឧត្តមប្រធានព្រឹទ្ធសភាបារាំង ថ្នាក់ដឹកនាំទាំងពីរបានកត់សម្គាល់នូវភាព ចាំបាច់ក្នុងការធ្វើបច្ចុប្បន្នភាពនៃអនុស្សរណៈយោគយល់គ្នារវាងស្ថាប័នព្រឹទ្ធសភានៃប្រទេសទាំងពីរ ដែល មានអាយុជាង ២៥ឆ្នាំហើយ។ សម្ដេចធិបតី បានសូមអញ្ជើញ ឯកឧត្តមប្រធានព្រឹទ្ធសភាបារាំង មក បំពេញទស្សនកិច្ចនៅកម្ពុជា តាមពេលវេលាសមស្របក្នុងឆ្នាំ២០២៤នេះ ព្រមទាំងស្វាគមន៍នូវដំណើរ ទស្សនកិច្ចរបស់ឯកឧត្តម Vincent ÉBLÉ សមាជិកព្រឹទ្ធសភាបារាំង និងជាប្រធានក្រុមអន្តរសភា មិត្តភាពបារាំង-កម្ពុជា-ឡាវមកកាន់កម្ពុជាក្នុងអំឡុងខែមិនា ឆ្នាំ២០២៤ បន្ទាប់ពីការបោះឆ្នោតព្រឹទ្ធសភា នីតិកាលទី៥ បានធ្វើរួចនៅខែកុម្ភៈ ឆ្នាំ២០២៤ ខាងមុខនេះ។

ក្នុងជំនួបជាមួយ លោកជំទាវប្រធានរដ្ឋសភាបារាំង ថ្នាក់ដឹកនាំទាំងពីរក៏បានពិភាក្សាផងដែរអំពីសក្តានុពល នៃតួនាទីដ៏សំខាន់របស់ប្រទេសទាំងពីរ ទាំងក្នុងក្របខ័ណ្ឌទ្វេភាគី និងពហុភាគី ក៏ដូចជាកម្រិតសកល។ ជាចុងក្រោយ សម្ដេចធិបតី បានថ្លែងអំណរគុណចំពោះការអញ្ជើញរបស់ លោកជំទាវប្រធានរដ្ឋសភា បារាំង ជូនចំពោះ សម្តេចមហារដ្ឋសភាធិការបតី ឃួន សុដារី ប្រធានរដ្ឋសភាកម្ពុជា ដែលនឹងអញ្ជើញចូល រួមកិច្ចប្រជុំអន្តរជាតិប្រធានសភាជាស្ត្រី នៅទីក្រុងប៉ារីស ពីថ្ងៃទី៦-៧ ខែមីនា ឆ្នាំ២០២៤ ខាងមុខនេះ ដែលជាជំនួបដ៏វិសេសរវាងប្រធានសភាជាស្ត្រីក្នុងការចូលរួមចំណែកដល់ការលើកកម្ពស់សិទ្ធិស្ត្រី សមភាព
យេនឌ័រ និងការពង្រឹងភាពអង់អាចរបស់ស្ត្រី។
ក្នុងក្របខ័ណ្ឌនៃដំណើរទស្សនកិច្ចផ្លូវការនេះផងដែរ សម្តេចបធិបតី ក៏បានជួបជាមួយ ឯកឧត្តម ហ្គាប៊ីយែល អាត់តាល់ នាយករដ្ឋមន្ត្រីនៃសាធារណរដ្ឋបារាំង នៅថ្ងៃទី១៩ ខែមករា ឆ្នាំ២០២៤។ សម្តេចធិបតី បានថ្លែងអំណរគុណ និងមានក្តីសោមនស្សរីករាយយ៉ាងក្រៃលែង ដែល សម្តេចធិបតី គឺជាឥស្សរជនបរទេសទីមួយដែលត្រូវបានទទួលជួបជាមួយ ឯកឧត្តមនាយករដ្ឋមន្ត្រីបារាំងនៅឆ្នាំថ្មីនេះ ជំនួបទ្វេភាគីនេះក៏បានផ្ដល់ ឱកាសជូនថ្នាក់ដឹកនាំទាំងពីរបញ្ជាក់ឡើងវិញនូវការប្តេជ្ញាចិត្តរួមគ្នា ក្នុងការលើក កម្ពស់ទំនាក់ទំនង មិត្តភាពប្រពៃណី និងស្និទ្ធស្នាលឡើងដល់កម្ពស់ថ្មីមួយ ឆ្ពោះទៅការកំណត់ផែនការ សកម្មភាពដើម្បីសម្រេចនូវគោលដៅដែលបានកំណត់។
ក្នុងឱកាសស្នាក់នៅទីក្រុងប៉ារីស សម្ដេចធិបតី បានទទួលជួប លោកជំទាវ ល្វីស មូស៊ីគីវ៉ាបូ អគ្គលេខាធិការ នៃអង្គការហ្វ្រង់កូហ្វូនី ដើម្បីពិភាក្សាអំពីបេក្ខភាពកម្ពុជាក្នុងការធ្វើជាម្ចាស់ផ្ទះនៃកិច្ចប្រជុំ កំពូលហ្វ្រង់កូហ្វូនីលើកទី២០ នៅនៅទីក្រុងភ្នំពេញ ឆ្នាំ២០២៦ ផងដែរ។

ដើម្បីទាក់ទាញ និងកៀរគរការវិនិយោគបារាំងមកកម្ពុជាថែមទៀត សម្ដេចធិបតី ក៏បានអញ្ជើញធ្វើជាបន្ធ ជាអធិបតីក្នុង វេទិកាធុរកិច្ចបារាំង-កម្ពុជា នៅថ្ងៃទី១៥ ខែមករា ឆ្នាំ២០២៤ ដោយមានការសម្របសម្រួលនិងរៀបចំឡើងដោយសភាពាណិជ្ជកម្ពុជា និងមានការចូលរួមពីតំណាងក្រុមហ៊ុនប្រមាណ១១០ ក្នុងនោះ មានក្រុមហ៊ុនចំនួន៨០ មកពីប្រទេសបារាំង និង៣០ មកពីប្រទេសកម្ពុជា។ វេទិកានេះបានបើកផ្លូវឱ្យមានការផ្លាស់ប្តូរទំនាក់ទំនង ពង្រីកឱកាស និងសិក្សាស្វែងយល់កាន់តែស៊ីជម្រៅ ក្នុងគោលបំណងបង្កើន ឱកាសបន្ថែមទៀតដល់ការវិនិយោគ ព្រមទាំងលើកម្ពស់កាលានុវត្តភាពធុរកិច្ច វិនិយោគ និងសេដ្ឋកិច្ច ពាណិជ្ជកម្ម រវាងភាគីទាំងពីរ។
សម្ដេចធិបតី ក៏បានទទួលជួបដាច់ដោយឡែកពីគ្នាជាមួយថ្នាក់ដឹកនាំក្រុមហ៊ុនបារាំងចំនួនជាង 90 US: Accor Group, Total Energies, VINCI Group, Alstom, EDF, Orange Group, Puy Du Fou Asia, Blue Circle, ECOLE 42, CMA CGM, PL Vista។
ក្រុមហ៊ុនទាំងនេះមានប្រតិបត្តិការលើ វិស័យហេដ្ឋារចនាសម្ព័ន្ធ អាកាសចរណ៍ស៊ីវិល សណ្ឋាគារ និងបដិសណ្ឋារកិច្ច ការដឹកជញ្ជូនតាមផ្លូវដែក ថាមពលកកើតឡើងវិញ បច្ចេកវិទ្យាព័ត៌មាន ឌីជីថល និងវិស័យផ្សេងៗទៀត។ តំណាងក្រុមហ៊ុនទាំងអស់ បានថ្លែងអំណរគុណយ៉ាងជ្រាលជ្រៅ និងសូមកោតសរសើរដល់រាជរដ្ឋាភិបាលកម្ពុជា ដែលតែងតែបាន ផ្តល់បរិយាកាសអំណោយផល ការលើកទឹកចិត្ត ជាពិសេសតាមរយៈច្បាប់វិនិយោគថ្មី និងគោល នយោបាយថ្មីៗរបស់កម្ពុជា។ ក្រុមហ៊ុនក៏បានបង្ហាញពីបំណងប្រាថ្នាក្នុងការបន្តប្រតិបត្តិការ និងការធ្វើ ធុរកិច្ចរបស់ខ្លួន ព្រមទាំងពង្រីកគម្រោងវិនិយោគថ្មីថែមទៀតនៅកម្ពុជា។
ក្នុងស្មារតីយកចិត្តទុកដាក់ពីសុខទុក្ខ ក៏ដូចជាក្នុងគោលបំណងជម្រាបជូនពីគោលនយោបាយរាជ រដ្ឋាភិបាលកម្ពុជា ដល់ប្រជាជនខ្មែរទាំងក្នុង និងក្រៅប្រទេស សម្ដេចធិបតី ក៏បានឆ្លៀតពេលដ៏ មមាញឹកនេះ ជួបសំណេះសំណាលជាមួយបងប្អូនសហគមន៍ខ្មែររស់នៅបណ្តាប្រទេសអឺរ៉ុប ដូចជាបារាំង បែលហ្ស៊ិក និងស្វីស នៅថ្ងៃទី១៥ ខែមករា ឆ្នាំ២០២៤៕