ឆេះកន្លែងលក់សាំង ហើយបានហៀរប្រេង នាំទាំងភ្លើងមក ឆេះរថយន្តជាច្រើនគ្រឿង

ក្រុងព្រះសីហនុ៖  នៅវេលាម៉ោង១១ថ្ងៃត្រង់ថ្ងៃទី៤ ខែវិច្ឆិកា ឆ្នាំ២០១៨ មានអគ្គិភ័យបានឆាបឆេះកន្លែងលក់សាំង ហើយបានហៀរប្រេង នាំទាំងភ្លើងមកឆាបឆេះរថយន្តជាច្រើនគ្រឿង ។ ហេតុការណ៍នោះបានកើតឡើងនៅមុខផ្សារលើ ក្នុងក្រុងព្រះសីហនុ ចំពោះមូលហេតុ ដែលបង្កឲ្យមានការឆាបឆេះដ៏សន្ធោសន្ធៅនេះ អាជ្ញាធរនៅមិនទាន់បានបញ្ជាក់នៅឡើយទេ ហើយពេលនេះកម្លាំងសមត្ថកិច្ចកំពុងតែប្រើរថយន្តពន្លត់អគ្គិភ័យធ្វើការបាញ់ពន្លត់នៅកន្លែងកើតហេតុ។
ករណីអគ្គីភយ័ឆេះកន្លែងលក់សាំងច្រកដបនិងច្រកពីដុងតាមផ្លូវនៅមុខផ្សារលើ
លោកឧត្តមសេនីយ៍ត្រីប៊ូ សុធីស្នងការរងនគរបាលខេត្តព្រះសីហនុ ទទួលផែនពន្លត់អគ្គីភ័យ បានដឹងថា ដើមហេតុដោយសារមាន ម៉ូតូរុឺម៉កមួយគ្រឿង ចូលទៅចាក់ប្រេងនៅកន្លែងលក់សាំងឈ្មោះអុី ច្រឹប ហើយម្ចាស់ម៉ូតូពិសារបារី ពេលកំពុងចាក់ប្រេងសាំង ក៏បណ្តាលអោយឆាបឆេះជាអគ្គីភ័យតែម្តង។ ហេតុការណ៍នេះ មានរថយន្តចំនួន៤គ្រឿង និងម៉ូតូរុឺម៉កមួយគ្រឿង បានឆេះខូចខាតទាំងស្រុង ឆេះអគាររបស់ប្រៃសណីយ៍នៅក្បែរនោះមួយខ្នង ឆេះរោងលក់ប្រេងកន្លែងកើតហេតុ និងសម្ភារៈក្នុងរោងនេះទាំងស្រុង ប៉ុន្តែមិនមានមនុស្សរងគ្រោះថ្នាក់ទេ និងថាអគ្គីភ័យបានរលត់ទៅវិញ ក្រោយរយៈពេលជាងកន្លះម៉ោង ជាមួយនិងកិច្ចអន្តរាគមន៍ ពីសមត្ថកិច្ចពន្លត់អគ្គីភ័យ និងក្រុមជួយសង្គ្រោះចម្រុះ។ បើតាមលោកឧត្តមសេនីយ៍ត្រីប៊ូ សុធីមានប្រសាសន៍ថា ករណីនេះសមត្ថកិច្ចជំនាញកំពុងស្រាវជ្រាវបន្ថែម ដើម្បីបន្តនិតិវិធីដោះស្រាយតាមផ្លូវច្បាប់៕