សាខាកាកបាទក្រហមកម្ពុជា រាជធានីភ្នំពេញ បានរៀបចំពិធីបិទវគ្គបណ្តុះបណ្តាលវិជ្ជា សង្គ្រោះបឋមមូលដ្ឋាន ជូនដល់មន្ត្រីកងរាជអាវុធហត្ថមូលដ្ឋានខណ្ឌនិងមន្ត្រីនគរបាលអធិការដ្ឋានខណ្ឌមានជ័យ

ភ្នំពេញ ៖ សាខាកាកបាទក្រហមកម្ពុជា រាជធានីភ្នំពេញ បានរៀបចំពិធីបិទវគ្គបណ្តុះបណ្តាល វិជ្ជាសង្គ្រោះបឋមមូលដ្ឋាន ជូនដល់មន្ត្រីកងរាជអាវុធហត្ថមូលដ្ឋានខណ្ឌ និងមន្ត្រីនគរបាល អធិការដ្ឋានខណ្ឌមានជ័យ សរុបចំនួន៥០នាក់ នាថ្ងៃទី ១៦ ខែ កុម្ភៈ ឆ្នាំ ២០២៤នេះ នៅសាលា ខណ្ឌមានជ័យ ក្រោមវត្តមាន លោក ជិន ប៊ុនធឿន នាយកប្រតិបត្តិសាខាកាកបាទក្រហម កម្ពុជា រាជធានីភ្នំពេញ និងលោកស្រី ហួត ឃីម ប្រធានគណៈកម្មាធិការអនុសាខាកាកបាទ ក្រហមកម្ពុជា ខណ្ឌមានជ័យ។

នាឱកាសនោះ ក្នុងនាមឯកឧត្តម ឃួង ស្រេង ប្រធានគណៈកម្មាធិការសាខាកាក បាទក្រហមកម្ពុជារាជធានីភ្នំពេញ លោក ជិន ប៊ុនធឿន បានពាំនាំ នូវសេចក្តីផ្តាំផ្ញើ សាកសួរ សុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងសូមកោតសរសើរវាយតម្លៃខ្ពស់ចំពោះលទ្ធផល នៃការបញ្ចប់វគ្គនាថ្ងៃនេះ ។

លោកបានបន្តថា៖ ឯកឧត្តមប្រធានគណៈកម្មាធិការសាខា និងថ្នាក់ដឹកនាំសាខា សូមថ្លែងអំណរគុណយ៉ាងជ្រាលជ្រៅ ចំពោះទឹកចិត្តរបស់បងប្អូនកងកម្លាំងយើងដែលបាន ខិតខំប្រឹងប្រែងលះបង់កម្លាំងកាយចិត្ត ការពារសុខសុវត្ថិភាពជូនដល់ប្រជាពលរដ្ឋក្នុង មូលដ្ឋាន ដោយមិនគិតពីការនឿយហត់ មិនថាយប់ឬថ្ងៃ តែងនៅជាប់ជាមួយប្រជាពលរដ្ឋ ជានិច្ច ហើយថ្ងៃនេះទៀតសោត បងប្អូនក៏បានលះបង់ពេលវេលាមកចូលរួមវគ្គបណ្តុះ បណ្តាលវិជ្ជាសង្រ្គោះបឋមនេះ ក្នុងគោលដៅរួមគ្នាជួយសង្គ្រោះដល់ប្រជាពលរដ្ឋ ដែលរង គ្រោះថ្នាក់ផ្សេងៗ កាត់បន្ថយការឈឺចាប់របស់ជនរងគ្រោះបានមុនរថយន្តពេទ្យ ឬក្រុម គ្រូពេទ្យមកដល់។

ជាមួយគ្នានោះ លោកនាយកប្រតិបត្តិសាខាសង្ឃឹម និងជឿជាក់ថា បន្ទាប់ពីឆ្លងកាត់ វគ្គបណ្តុះបណ្តាលនេះហើយ បងប្អូនទាំងអស់នឹងពាំនាំយកចំណេះដឹងនេះទៅ ផ្សព្វផ្សាយ បន្តឱ្យបានកាន់តែទូលំទូលាយ ក៏ដូចជាជួយដល់ជនរងគ្រោះនៅក្នុងមូលដ្ឋាន របស់ខ្លួន ឱ្យកាន់តែមានប្រសិទ្ធភាពថែមទៀត។

សូមបញ្ជាក់ថា៖ វគ្គបណ្តុះបណ្តាលវិជ្ជាសង្គ្រោះបឋមមូលដ្ឋានដែលបានដំណើរការ អស់រយៈពេលពេញមួយថ្ងៃនេះ សម្រាប់ប្រធានបទដែលលើកយកមកបង្ហាត់បង្ហាញរួមមាន៖ ការជួយសង្គ្រោះជនសន្លប់បាត់បង់ស្មារតី ការធ្វើចលនាចង្វាក់បេះដូង(CPR) រលាក បាក់ឆ្អឹង ស្លាក់ លង់ទឹក ពស់ចឹកជាដើម ៕