អាជ្ញាធរខេត្តកំពង់ចាម ចុះទប់ស្កាត់បុគ្គលឈ្មោះ អ៊ាងធ្វើសកម្មភាពចាក់ថ្មចូលផ្ទៃទន្លេមេគង្គ ស្ថិតនៅ ភូមិព្រៃទទឹង ឃុំឫស្សីស្រុក

ខេត្តកំពង់ចាម ៖ បុគ្គលឈ្មោះ ទន់ ឆៃអ៊ាង ចាក់ថ្មចូលទន្លេមេគង្គប្រុងយកធ្វើជាកម្មសិទ្ធិនៅស្រុកស្រីសន្ធរ, អាជ្ញាធរខត្តកំពង់ចាម ចាត់វិធានការជាបន្ទាន់ និងទុកពេល៧០ថ្ងៃឲ្យកាយថ្មចេញវិញ ។

មន្រ្តីអាជ្ញាធរខេត្តកំពង់ចាម បានបញ្ជាក់ថា បុគ្គលរូបនេះបានចាក់ថ្មលុបទន្លេមេគង្គនេះ មានរយះពេលជាងមួយខែមកហើយ តែមិនបានដឹងដោយសារគាត់បិទបាំងការដ្ឋាននេះជិតឈឹង។

ក្រោយទទួលបានព័ត៌មាន និងឃើញសកម្មភាពនេះពីអ្នកនេសាទ អភិបាលខេត្តកំពង់ចាម បានបញ្ជាឲ្យមន្រ្តីជំនាញចាត់ការជាបន្ទាន់ រហូតចុះទៅទប់ស្កាត់ និងបានហៅបុគ្គលនេះមកបញ្ឈប់សកម្មភាព ហើយឲ្យកាយថ្មចេញវិញ។

រដ្ឋបាលខេត្តកំពង់ចាមនៅថ្ងៃទី ២២ ខែកុម្ភៈ ឆ្នាំ២០២៤
បានចេញសេចក្តីប្រកាសព័ត៌មាន ស្តីពី ការទប់ស្កាត់សកម្មភាពចាក់ថ្មចូលផ្ទៃទន្លេ ដែលមានទីតាំងស្ថិតនៅ ភូមិព្រៃទទឹង ឃុំឫស្សីស្រុក ស្រុកស្រីសន្ធរ ខេត្តកំពង់ចាម។

រដ្ឋបាលខេត្តកំពង់ចាម សូមជម្រាបជូនសាធារណៈជន និងអ្នកសារព័ត៌មានមេត្តាជ្រាបថា ៖ បន្ទាប់ពីទទួលបានព័ត៌មាន ពីករណីចាក់ថ្មចូលផ្ទៃទន្លេនៅទីតាំងភូមិព្រៃទទឹង ឃុំឫស្សីស្រុក ស្រុកស្រីសន្ធរ ខេត្តកំពង់ចាម ភ្លាមៗរដ្ឋបាលខេត្ត បានចាត់តាំង ឯកឧត្តម ស្រី សុភ័ក្ត្រ អភិបាលរងនៃគណៈអភិបាលខេត្ត កំពង់ចាម ដឹកនាំក្រុមការងារចុះពិនិត្យ ផ្តិតយករូបភាព ជួបជាមួយនឹងភាគីពាក់ព័ន្ធ និងបានរកឃើញថាពិតជា មានសកម្មភាពចាក់ថ្នចូលផ្ទៃទន្លេពិតប្រាកដមែន ដោយសកម្មភាពនេះបានដំណើរការតាំងពីថ្ងៃទី២ ខែមករា ឆ្នាំ ២០២៤ មកម្លេះ។ ការចាក់ថ្មនេះ គឺចាក់ចូលទៅក្នុងផ្ទៃទន្លេប្រវែង ៥៥ម៉ែត្រ និងគ្រោងចាក់បណ្តោយទន្លេប្រវែង ២៩៤.៦ម៉ែត្រ (បច្ចុប្បន្នទើបចាក់បានប្រវែង ១៣០ម៉ែត្រ)។ ហើយសកម្មភាពនៃការចាក់ថ្មចូលផ្ទៃទន្លេនេះ គឺពុំមានច្បាប់អនុញ្ញាតឡើយ។ ជាវិធានការបន្ទាន់នេះ រដ្ឋបាលខេត្តកំពង់ចាម បានកំណត់ឲ្យភាគីម្ចាស់ដី ដែលកំពុងធ្វើសកម្មភាពចាក់ថ្ម ចូលផ្ទៃទន្លេនេះ ត្រូវតែអនុវត្តដូចខាងក្រោម ៖

1. បញ្ឈប់សកម្មភាពចាក់ថ្មចូលផ្ទៃទន្លេដោយគ្មានច្បាប់អនុញ្ញាត ទោះក្នុងហេតុផលណាមួយក៏ដោយ។

2. ត្រូវធ្វើការកាយនិងយកថ្មដែលបានចាក់រួចហើយនោះចេញវិញឲ្យអស់ ក្នុងរយៈពេលយ៉ាងយូរ ៧០ ថ្ងៃជាកំណត់ និងមិនត្រូវកាយពង្រាយទម្លាក់ចូលក្នុងទឹកទន្លេឡើយ ដើម្បីបញ្ចៀសផលប៉ះពាល់ទៅ ថ្ងៃក្រោយសម្រាប់ការធ្វើចរាចរណ៍តាមផ្លូវទឹក។

3. ភាគីម្ចាស់ដីត្រូវរាយការណ៍អំពីវឌ្ឍនភាពនៃការកាយថ្មនេះ មករដ្ឋបាលខេត្តកំពង់ចាម មួយខែម្តង នៅរៀងរាល់ចុងខែនីមួយៗ ហើយក្រុមការងាររបស់រដ្ឋបាលខេត្តកំពង់ចាម នឹងបន្តចុះធ្វើការពិនិត្យ តាមដានការអនុវត្តវិធានការនេះ នៅរៀងរាល់មួយសប្តាហ៍ម្តង ឬតាមពេលវេលាជាក់ស្តែង។

រដ្ឋបាលខេត្ត សូមថ្លែងអំណរគុណដល់បងប្អូនប្រជាពលរដ្ឋ ក៏ដូចជាអ្នកសារព័ត៌មាន ដែលបានផ្តល់ ព័ត៌មានពិតប្រាកដ ហើយទាន់ហេតុការណ៍មកឲ្យរដ្ឋបាលខេត្ត ដើម្បីមានវិធានទប់ស្កាត់នូវបទល្មើសនានា ក្នុងខេត្តកំពង់ចាម និងសូមបញ្ជាក់ថា ចំពោះករណ៏នេះគ្រាន់ជាវិធានការបឋមប៉ុណ្ណោះ។ ជាវិធានការបន្ទាប់ គឺរដ្ឋបាលខេត្តកំពុងសិក្សាតាមផ្លូវច្បាប់ ដើម្បីស្នើដាក់បន្ទុកទៅលើជនល្មើសបន្ថែមទៀត។

ពលរដ្ឋបានសំណូមពរឲ្យអាជ្ញាធរ ចាត់វិធានការលើសជាងនេះ ដើម្បីជាការព្រមានដល់បុគ្គលផ្សេងទៀត។