ប្រមុខការទូតកម្ពុជា សន្យាផ្តល់ជំនួយ ដល់សហគមន៍វៀតណាម នៅបឹងទន្លាសាប ដើម្បីពួកគេឡើងមករស់នៅលើគោកបានត្រឹមត្រូវ
សិង្ហបុរី៖ ឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាម លោក Pham Binh Minh បានជួបសន្ទនា ជាមួយសមភាគីកម្ពុជា លោកប្រាក់ សុខុន ឧបនាយករដ្ឋមន្រ្តី និងរដ្ឋមន្ត្រីការបរទេសកម្ពុជា នៅថ្ងៃទី 13 វិច្ឆិកា នៅប្រទេសសិង្ហបុរី។
ឧបនាយករដ្ឋមន្រ្តី និងរដ្ឋមន្ត្រីការបរទេសកម្ពុជា លោកប្រាក់ សុខុន កាលពីថ្ងៃទី១៣ ខែវិច្ឆិកា បានអះអាងថា ប្រទេសកម្ពុជា នឹងធ្វើការដើម្បីគាំទ្រដល់សហគមន៍កម្ពុជា – វៀតណាម នៅបឹងទន្លេសាប ដើម្បីតាំងលំនៅថ្មី។
បើតាមផេកហ្វេសប៊ុក លោកប្រាក់ សុខុន ឧបនាយករដ្ឋមន្រ្តី និងរដ្ឋមន្ត្រីការបរទេសកម្ពុជា បានបញ្ជាក់ថា “ខ្ញុំបានជួបប្រជុំទ្វេភាគីជាមួយឯកឧត្តម ផាំ ប៊ិញ មិញ ឧបនាយករដ្ឋមន្រ្តី រដ្ឋមន្រ្តីការបរទេសវៀតណាម នៅឯក្រៅកិច្ចប្រជុំកំពូលអាស៊ានលើកទី៣៣ នៅប្រទេសសិង្ហបុរី ។ យើងបានពិភាក្សាអំពីកិច្ចសហប្រតិបត្តិការទ្វេភាគី បញ្ហាតំបន់ និងអន្តជាតិ “។
ក្នុងជំនួបជាមួយសមភាគីវៀតណាមលោក Pham Binh Minh នៅខាងក្រៅកិច្ចប្រជុំកំពូលអាស៊ានលើកទី 33 និងកិច្ចប្រជុំពាក់ព័ន្ធនៅក្នុងប្រទេសសិង្ហបុរី លោកប្រាក់ សុខុន បានគូសបញ្ជាក់ថា រដ្ឋាភិបាលកម្ពុជាសង្ឃឹមថា នឹងបន្តជំរុញទំនាក់ទំនង ជាមួយវៀតណាម និងបង្កើតលក្ខខណ្ឌល្អប្រសើរ សម្រាប់សហគមន៍វៀតណាម។
រីឯលោកផាំ ប៊ិញ មិញ ឧបនាយករដ្ឋមន្រ្តី រដ្ឋមន្រ្តីការបរទេសវៀតណាម បានទទួលស្គាល់នូវកិច្ចខិតខំប្រឹងប្រែង របស់ភាគីកម្ពុជា ក្នុងការជួយសហគមន៍កម្ពុជា – វៀតណាម នៅតំបន់បឹងទន្លេសាប នៃខេត្តកំពង់ឆ្នាំង។
លោកក៏បានសម្តែងការព្រួយបារម្ភផងដែរថា សមាជិកជាច្រើន នៃសហគមន៍ ត្រូវបានផ្លាស់ប្តូរទៅកាន់តំបន់លំនៅដ្ឋានថ្មី ដែលមិនមានការធានា ឱ្យមានការរស់នៅល្អប្រសើរ។
លោក បានរំលឹកសំណើរបស់លោកនាយករដ្ឋមន្ត្រី ង្វៀន ស៊ួនផុក ទៅកាន់សមភាគីកម្ពុជា របស់សម្តេចតេជោហ៊ុន សែន ដើម្បីជួយដល់សហគមន៍ខ្មែរ-វៀតណាម ឱ្យចាកចេញពីតំបន់បឹងទន្លេសាប និងរក្សាស្ថេរភាពជីវិតរបស់ពួកគេ នៅកន្លែងថ្មី និងផែនការច្បាស់លាស់ ទាក់ទងនឹងការងារ ដើម្បីធានា ជីវភាពរស់នៅរបស់ពួកគេ និងការងារហេដ្ឋារចនាសម្ព័ន្ធ ចាំបាច់។ ជាសំណើផ្ដាំផ្ញើឲ្យមើលថែសហគមន៍ជនជាតិវៀតណាម ដែលផ្លាស់ពីបឹងទន្លេសាប ទៅនៅលើគោក ធ្វើយ៉ាងណាបង្កភាពងាយស្រួលក្នុងជីវភាពរស់នៅប្រចាំថ្ងៃ របស់អ្នកទាំងនោះ។ សម្រាប់វៀតណាម ដើម្បីឲ្យពលរដ្ឋវៀតណាម រស់នៅបានសុខសាន្ត គឺទាល់តែអាជ្ញាធរខ្មែរ មានផែនការត្រឹមត្រូវ ពិសេសត្រូវរៀបចំឲ្យមានហេដ្ឋារចនាសម្ព័ន្ធគ្រប់គ្រាន់ ជាអាទិ៍ សាលារៀន និងមន្ទីរពេទ្យជាដើម។
ក្នុងជំនួបនេះលោក Minh ក៏បានថ្លែងអំណរគុណ ចំពោះការរីកចម្រើន នៃភាពជាដៃគូ រវាងវៀតណាម និងកម្ពុជា នាពេលថ្មីៗនេះ។
សូមរំលឹកជូនថា អាជ្ញាធរខ្មែរ ចាប់តាំងពីដើមខែតុលាមក បានចាប់ផ្ដើមប្រតិបត្តិការ ផ្លាស់ទីសហគមន៍ជនជាតិវៀតណាម ដែលកំពុងរស់នៅលើផ្ទៃបឹងទន្លេសាប ក្នុងភូមិសាស្ត្រខេត្តកំពង់ឆ្នាំង មកនៅលើគោកវិញឲ្យអស់។ អាជ្ញាធរបានអះអាងថា ការផ្លាស់ទីជនជាតិវៀតណាមទាំងជាង២០០០គ្រួសារ បានបិទបញ្ចប់រួចរាល់ហើយ តាំងពីចុងខែតុលា។ ការងារនាពេលនេះ គឺសម្អាតបឹងទន្លេសាប កែច្នៃកន្លែងចិញ្ចឹមត្រី នៅទីនោះ ឲ្យមានស្តង់ដារ ដើម្បីឈានទៅបង្កើតជាតំបន់កសិ-ទេសចរណ៍ ព្រមទាំងសម្របសម្រួល ឲ្យសហគមន៍ជនជាតិវៀតណាម រស់នៅលើគោកបានសមរម្យ។
ជាការឆ្លើយតប ប្រមុខការទូតខ្មែរ លោក ប្រាក់ សុខុន បានគូសបញ្ជាក់ថា រដ្ឋាភិបាលកម្ពុជានឹងបង្កើតនូវលក្ខខណ្ឌល្អប្រសើរសម្រាប់សហគមន៍វៀតណាម ដែលចាកចេញពីបឹងទន្លេសាបទៅរស់នៅលើគោក៕
