សម្តេចធិបតី ហ៊ុន ម៉ាណែត៖ គោលដៅធំបំផុតរបស់រាជរដ្ឋាភិបាលអាណត្តិថ្មី គឺបន្តរក្សាសន្តិភាព និងការពារដាច់ខាតនូវការឯកភាពជាតិ មិនឱ្យកម្ពុជាបែកបាក់ដូចអតីតកាល

ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា គោលដៅរបស់រាជរដ្ឋាភិបាលនីតិកាលថ្មី តាំងពីថ្ងៃដំបូង គឺការរក្សាសុខសន្តិភាព ស្ថេរភាព ជំរុញកំណើនសេដ្ឋកិច្ច និងប្រឆាំងដាច់ខាត មិនឱ្យកម្ពុជាបែកបាក់ដូចអតីតកាល ខណៈរយៈពេល៨ខែ នៃអាណត្តិតរបស់រដ្ឋាភិបាលថ្មី គឺទទួលបានលទ្ធផលយ៉ាងល្អជូនមាតុភូមិកម្ពុជា។

ការគូសបញ្ជាក់របស់សម្តេចធិបតី ហ៊ុន ម៉ាណែត បានធ្វើឡើងនៅក្នុងឱកាសដែលសម្តេចបានអញ្ជើញជាអធិបតីភាព ប្រកាសបើកឱ្យដំណើរការជាផ្លូវការ សមាគមសហព័ន្ធអ្នកវិនិយោគកម្ពុជា និងពិសាអាហារសាមគ្គី នៅមជ្ឈមណ្ឌលសន្និបាត និងពិព័រណ៍កោះពេជ្រ នារសៀលថ្ងៃទី០៩ ខែឧសភា ឆ្នាំ២០២៤នេះ។

សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលជាច្រើនអាណត្តិមកនេះ គឺធ្វើយ៉ាងណាជំរុញការអភិវឌ្ឍប្រទេស និងធ្វើឱ្យប្រជាពលរដ្ឋមានជីវភាពល្អប្រសើរ។ ជាពិសេសប្រែក្លាយប្រវត្តិកម្ពុជាពីភាពជូរចត់ដោយសារសង្គ្រាម ទៅជាប្រទេសមួយស្រស់បំព្រង។

សម្តេចធិបតី ហ៊ុន ម៉ាណែត បានបន្តថា រាជរដ្ឋាភិបាលមានតួនាទីនានូវសុខសន្តិភាព ស្ថេរភាព ទីផ្សារ និងកត្តាផ្សេងៗទៀត ដែលជាតម្រូវការរបស់វិស័យឯកជន។ រាជរដ្ឋាភិបាលដឹកនាំដោយសម្តេច មិនមែនមានតែទ្រឹស្តីនោះទេ តែផ្តល់តម្លៃលើលទ្ធផលលើដីជាក់ស្តែង។

សម្តេចធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះថា៖ «អ៊ឹចឹងរយៈពេល៨ខែមកនេះ ដែលរាជរដ្ឋាភិបាលថ្មីបានបង្កើត រាជរដ្ឋាភិបាលបានបន្តរក្សាសុខសន្តិភាព សន្តិសុខ និងស្ថេរភាពសង្គម នេះគឺជាកត្តាធំបំផុតដែលកម្ពុជា ត្រូវតែមានជាពិសេសប្រវត្តិ៥០០ឆ្នាំ ដែលកម្ពុជាបែកបាក់ និងខ្ទីចខ្ទាំ អ៊ឹចឹងការធានាដាច់ខាតនូវសុខសន្តិភាព ការពារឱ្យបានដាច់ខាតនូវការឯកភាពជាតិ គឺកត្តាចាំបាច់ដែលរាជរដ្ឋាភិបាលបានដាក់ទិសដៅតាំងពីថ្ងៃទីមួយ ហើយមកម៉ោងនេះយើងបានសម្រេច ទទួលបានលទ្ធផលនេះនឹងបន្តថែរក្សាទៅទៀតនេះជាការងារចាំបាច់»។

ក្រៅពីប្រកាសរក្សាឱ្យបាននូវសន្តិសុខ និងស្ថេរភាពនយោបាយនៅកម្ពុជាឱ្យបានគង់វង្ស, សម្តេចធិបតី ហ៊ុន ម៉ាណែត ក៏បានប្រកាសរក្សាឱ្យនូវស្ថេរភាពម៉ាក្រូសេដ្ឋកិច្ច និងកំណើនសេដ្ឋកិច្ច ដោយរាជរដ្ឋាភិបាល បានបន្ត ជំរុញកំណើនសេដ្ឋកិច្ច ដែលនៅឆ្នាំ២០២៣ សេដ្ឋកិច្ចកម្ពុជា បានកើន ៥ភាគរយ តាមការព្យាករណ៍សេដ្ឋកិច្ចកម្ពុជានឹងបន្តកើនឡើងកាន់តែខ្ពស់បន្ថែមទៀត ចំណុចនេះគឺជាគោលដៅសំខាន់មួយរបស់រាជរដ្ឋាភិបាលចាប់តាំងពីថ្ងៃដំបូងផងដែរ៕