គ.ជ.ប អះអាងថា រយៈពេល៨ថ្ងៃនៃយុទ្ធនាការឃោសនារបស់គណបក្សនយោបាយ ប្រព្រឹត្តទៅក្នុងបរិយាកាស សន្តិសុខ សុវត្ថិភាព និងមិនមានអ្វីកើតឡើង
ភ្នំពេញ៖គណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងថា ក្នុងរយៈពេល៨ថ្ងៃ នៃយុទ្ធនាការឃោសនារកសំឡេងឆ្នោត សម្រាប់ការ បោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ហៅកាត់ថា «ក្រុមប្រឹក្សា» អាណត្តិទី៤ ឆ្នាំ២០២៤នេះ របស់គណបក្សនយោបាយ គឺប្រព្រឹត្តទៅក្នុងបរិយាកាសសន្តិសុខ សុវត្ថិភាព និងមានសណ្ដាប់ធ្នាប់ល្អ មិនមានរូបភាពអវិជ្ជមានណាមួយឡើយនោះឡើយ។
ថ្លែងនៅក្នុងកិច្ចប្រជុំជាមួយភាគីពាក់ព័ន្ធ នារសៀលថ្ងៃទី២៤ ខែឧសភា ឯកឧត្តម សោម សូរីដា សមាជិក គ.ជ.ប បានបញ្ជាក់ថា គណបក្សនយោបាយនីមួយៗ បានធ្វើសកម្មភាពឃោសនាបោះឆ្នោតតាមមធ្យោបាយផ្សេងៗនិងតាមលទ្ធភាពរៀងៗខ្លួន ក្នុងនោះ ការហែក្បួនឃោសនា ការជួបប្រជុំសមាជិក និងអ្នកគាំទ្រគណបក្ស និងអ្នកបោះឆ្នោតនៅតាមទីស្នាក់ការគណបក្ស និងតាមឃុំ សង្កាត់ ការចែកខិត្តប័ណ្ណ ការចាក់មេក្រូផ្សព្វផ្សាយនៅតាមទីស្នាក់ការគណបក្ស និងចាក់ចល័តតាមភូមិជាដើម។
ឯកឧត្តមបន្តថា ការឃោសនាបោះឆ្នោត នៅតាមរាជធានី ខេត្ត ក្រុង ស្រុក ខណ្ឌបានប្រព្រឹត្តទៅដោយរលូន មានការយោគយល់អធ្យាស្រ័យគ្នា មានកិច្ចសហការល្អ ពីបណ្តាភាគីពាក់ព័ន្ធនានា ដែលរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយក្នុងរាជធានី ខេត្តនីមួយៗ។ ក្នុងដំណើរការឃោសនាបោះឆ្នោត មានបណ្ដឹងចំនួន២ ដែលបានដាក់ និងដោះស្រាយរួចរាល់នៅ គ.ខ.ប ព្រះវិហារ និងស្វាយរៀង។
សូមបញ្ជាក់ថា គ.ជ.ប បានកំណត់រយៈពេល៨ថ្ងៃសម្រាប់ឱ្យគណបក្សនយោបាយធ្វើការឃោសនារកសំឡេងឆ្នោត ចាប់ផ្តើមពីថ្ងៃទី១៧ រហូតដល់ថ្ងៃទី២៤។ គណបក្សនយោបាយ ដែលបានចុះបញ្ជីសម្រាប់ការបោះ ឆ្នោតជ្រើសរើសក្រុមប្រឹក្សា អាណត្តិទី៤នេះ មានចំនួន៥មានដូចជា៖ គណបក្សប្រជាជនកម្ពុជាគណបក្សឆន្ទៈខ្មែរ គណបក្សកម្លាំងជាតិ គណបក្សហ៊្វុនស៊ិនប៉ិច និង គណបក្សខ្មែររួបរួមជាតិ ខណៈចំនួនក្រុង ស្រុក ខណ្ឌ មកដល់ឆ្នាំ២០២៤នេះ មានចំនួន២០៩ ដែលធ្វើឱ្យចំនួនអាសនៈសមាជិកក្រុមប្រឹក្សាកើនដល់ ៣.៦៤១ អាសនៈ ចំណែកចំនួនអាសនៈសមាជិកក្រុមប្រឹក្សារាជធានី ខេត្ត នៅរក្សា៥៥៩អាសនៈដដែល។
គ.ជ.ប បានអំពាវនាវឱ្យគ្រប់គណបក្សរក្សាភាពស្ងប់ស្ងាត់នៅថ្ងៃ«ស» ខណៈយុទ្ធនាការឃោសនាបោះឆ្នោតជ្រើសរើស «ក្រុមប្រឹក្សា» អាណត្តិទី៤ ឆ្នាំ២០២៤នេះ នឹងត្រូវបិទបញ្ចប់នៅត្រឹមម៉ោង១០យប់នេះ។ ចាប់ពីម៉ោង១០យប់ថ្ងៃទី២៤ នេះ រហូតដល់ថ្ងៃបោះឆ្នោត គឺជាពេលវេលាដែលត្រូវរក្សាភាពស្ងប់ស្ងាត់ ដើម្បីទុកពេលវេលាឱ្យអ្នកបោះឆ្នោតត្រៀមខ្លួន ត្រៀមឯកសារ សម្រាប់ទៅបោះឆ្នោតនៅថ្ងៃបោះឆ្នោត។ ចំពោះសកម្មភាពទាំងឡាយណាដែលរំលោភច្បាប់ស្តីពីការ បោះឆ្នោតជ្រើសរើសក្រុមប្រឹក្សា បទបញ្ជា និងនីតិវិធី របស់ គ.ជ.ប នឹងត្រូវអនុវត្តដោយវិធានការច្បាប់ជាធរមាន៕