បុរសម្នាក់ដើរជាន់ខ្សែលួសឆក់កណ្ដុរស្លាប់ ,ម្ចាស់ខ្សែលួសឆក់ត្រូវចាប់ខ្លួនបញ្ជូនទៅតុលាការ
កណ្ដាលៈ បន្ទាប់ពីចុះធ្វើការពិនិត្យលើសាកសពបុរសម្នាក់ នគរបាលស្រុកកោះធំ បានសន្និដ្ឋានថា ពិតជាស្លាប់ដោយសារដើរជាន់ខ្សែលួសឆក់កណ្ដុររបស់ម្ចាស់ដីស្រែដែលមានព្រុំជាប់គ្នា ។ សមត្ថកិច្ចកសាងសំណុំរឿង ស្រាវជ្រាវចាប់ខ្លួនជនសង្ស័យ ជាម្ចាស់ដីដែលឆក់កណ្ដុរ យកមកអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់។ ហេតុការណ៍នេះ កើតឡើងកាលពីវេលាម៉ោង២៤និង៣០នាទី រំលងអធ្រាត្រ ថ្ងៃទី១៥ ខែវិច្ឆិកា ឆ្នាំ២០១៨ ត្រង់ចំណុចដីស្រែប្រាំងរបស់ឈ្មោះ មឿន មូល ស្ថិតក្នុងភូមិធំ ឃុំឈើខ្មៅ ស្រុកកោះធំ ខេត្តកណ្តាល ។
មន្ដ្រីនគរបាលផ្នែកកោលវិច័យស្រុកកោះធំ បានឲ្យដឹងថា ជនរងគ្រោះស្លាប់ឈ្មោះ វ៉ិត ថា ភេទប្រុស អាយុ៣១ឆ្នាំ ជនជាតិខ្មែរ មុខរបរកសិករ រីឯជនសង្ស័យឈ្មោះ មឿន មូល ភេទប្រុស អាយុ៥៦ឆ្នាំ ជនជាតិខ្មែរ មុខរបរ កសិករ ។ ជនរងគ្រោះនិងជនសង្ស័យមានទីលំនៅភូមិធំ ឃុំឈើខ្មៅ ស្រុកកោះធំ ខេត្តកណ្តាល ។ ចំណែកវត្ថុតាងដកហូតបានមាន៖ អាគុយចំនួន១គ្រឿង ៧០អំពែរ ,អាំងវិចទ័រ ចំនួន១គ្រឿង ។
ប្រភពដដែលបន្ដថា តាមការឆ្លើយបំភ្លឺរបស់ជនសង្ស័យ ជាអ្នកឆក់កណ្ដុរបានឲ្យដឹងថា ខ្លួនបានរាយខ្សែលួសឆក់កណ្ដុរក្នុងដីស្រែរបស់ខ្លួនអស់រយៈពេល២យប់មកហើយ។ នៅថ្ងៃទី១៤ ខែវិច្ឆិកា ឆ្នាំ ២០១៨ វេលាម៉ោង១៨ ខ្លួនបានទៅឆក់កណ្តុរនៅដីស្រែរបស់ខ្លួនម្ដងទៀត ក្រោយពីរៀបចំឧបករណ៍ឆក់កណ្តុររួច ខ្លួនត្រឡប់មកសម្រាកនៅផ្ទះវិញ ។ លុះនៅវេលាម៉ោ២៤និង៣០នាទី ឆ្លងចូលថ្ងៃ១៥ ខែឆ្នាំកើតហេតុ ខ្លួនបានក្រោកពីដំណេក ទៅមើលឧបករណ៍ឆក់កណ្តុរ នៅចំណុចដីស្រែរបស់ខ្លួនខាងលើ ខណៈទៅដល់ ខ្លួនបានបិតឧបករណ៍ឆក់ រួចដើរមើលតាមភ្លឺស្រែ ដែលមានព្រុំប្រទល់ជាប់នឹងដីស្រែរបស់ឈ្មោះ វ៉ិត ថា ភ្លាមនោះក៏ប្រទះឃើញជនរងគ្រោះឈ្មោះ វ៉ិត ថា ដួលផ្កាប់មុខនៅលើភ្លឺស្រែ ជាប់នឹងខ្សែលួសឆក់កណ្តុររបស់ខ្លួន ដោយពុំដឹងបានដឹងថា ជនរងគ្រោះឆក់ស្លាប់តាំងពីពេលណាមកទេ ដោយមានការភ័យស្លន់ស្លោពេក ខ្លួនឃើញដូចនេះក៏បានយកសាកសពជនរងគ្រោះពីកន្លែងកើតហេតុ ដែលជាដីរបស់ខ្លួន យកមកដាក់នៅលើដីស្រែរបស់ជនរងគ្រោះវិញ រួចខ្លួនបានទៅសាខ្សែលួសដែលរាយឆក់នោះយកទៅបោះចោល ក្នុងទឹកអូរខាងកើតដីស្រែរបស់ខ្លួន បន្ទាប់មកក៏យកអាគុយ និងអាំងវិចទ័រ យកមកផ្ទះហើយសំរាកទល់ភ្លឺ ។
ប្រភពដដែលបន្ដទៀតថា ក្រោយពីសមត្ថកិច្ចទទួលបានព័ត៌មានថា មានករណីមនុស្សស្លាប់ ភ្លាមនោះសមត្ថកិច្ចក៏បានចុះទៅដល់កន្លែងកើតហេតុ រួចធ្វើការពិនិត្យបានបញ្ជាក់ថា ជនរងគ្រោះពិតជាស្លាប់ ដោយសារការធ្វេសប្រហែស ប៉ះនឹងឧបករណ៍ឆក់កណ្តុរ របស់អ្នកដទៃ ។
ក្រោយពី ពិនិត្យចប់សព្វគ្រប់ សមត្ថកិច្ចកសាងសំណុំរឿង ស្រាវជ្រាវចាប់ខ្លួនជនសង្ស័យ ជាម្ចាស់ដីដែលឆក់កណ្ដុរ យកមកអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ រីឯសាកសពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារ ដើម្បីធ្វើបុណ្យតាមប្រពៃណី ៕