ស្នើឲ្យភាគីថៃ កុំបាញ់ប្រជាពលរដ្ឋខ្មែរ ដែលឆ្លងដែនចូលទៅដោយខុសច្បាប់ និងកាប់ឈើគ្រញូងត្រូវចាប់បញ្ជូនមកវិញ
ឧត្តរមានជ័យ៖ ក្នុងពិធីប្រកាសផ្ទេរភារកិច្ច និងតែងតាំង អភិបាលខេត្តឧត្តរមានជ័យ នៅព្រឹកថ្ងៃទី១៧ ខែវិច្ឆិកា ឆ្នាំ២០១៨ ដែលជាខេត្តជាប់ព្រំដែនកម្ពុជា-ថៃ សម្ដេចក្រឡាហោម ស ខេងឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏បានស្នើឲ្យភាគីថៃ កុំបាញ់ប្រជាពលរដ្ឋខ្មែរ ដែលឆ្លងដែនចូលទៅដោយខុសច្បាប់ជាពិសេសពលរដ្ឋខ្មែរ ដែលលួចឆ្លងដែនខុសច្បាប់ ទៅកាប់គ្រញូងក្នុងប្រទេសថៃ គឺត្រូវសហការជាមួយអាជ្ញាធរកម្ពុជា និងចាប់បញ្ជូនពួកគេមកវិញ តាមនីតិវិធីច្បាប់។
សម្ដេចក្រឡាហោម ស ខេង បានបញ្ជាឲ្យកម្លាំងនគរបាល និងសមត្ថកិច្ចពាក់ព័ន្ធទាំងអស់ នៅតាមព្រំដែន ត្រូវទប់ស្កាត់ឲ្យខាងតែបាន ចំពោះការលួចឆ្លងដែន ដោយខុសច្បាប់ ពីសំណាក់ប្រជាពលរដ្ឋខ្មែរ ដែលចូលទៅកាន់ប្រទេសថៃ ដើម្បីកាប់ឈើគ្រញូង តាមច្រករបៀង។
សម្ដេចក្រឡាហោម ស ខេង បានមានប្រសាសន៍ថា ច្រករបៀងមិនមែនជាច្រកស្របច្បាប់ទេ មួយថ្ងៃៗ ថៃចាប់បញ្ជូនមក៨០ ទៅ១០០នាក់ ។ តាមមើលរាល់ថ្ងៃនេះដោយសារតែពួកគាត់ឆ្លងដែនខុសច្បាប់ អ្នកដែលឲ្យចេញចូល គឺមន្ត្រីការពារព្រំដែន ឬសមត្ថកិច្ចទេ។ ធ្វើយ៉ាងណាត្រូវទប់ស្កាត់ មិនឲ្យពលរដ្ឋខ្មែរលួចឆ្លងដែនខុសច្បាប់ ទៅកាប់ឈើគ្រញូងនៅទឹកដីថៃ ហើយ សម្ដេចក្រឡាហោម បានលើកទឹកចិត្តឲ្យកងកម្លាំងយោធា គ្រប់គ្រងច្រកព្រំដែន ឲ្យបានត្រឹមត្រូវ ធ្វើយ៉ាងឲ្យសម្រេចបានភាពជោគជ័យ និងធ្វើយ៉ាងណាឲ្យបានប្រយោជន៍ប្រជាជនទាំងពីរ៕
