បារាំងរៀបចំការបោះឆ្នោតសភាមុនអាណត្តិ ដែលអាចនឹងមើលឃើញ ក្រុមស្តាំនិយមជ្រុលដឹកនាំរដ្ឋាភិបាល

ក្រុងប៉ារីស៖នៅថ្ងៃអាទិត្យនេះ ប្រជាជនបារាំងនឹងត្រូវបោះឆ្នោត ក្នុងជុំដំបូងនៃការបោះឆ្នោតសភាមុនអាណត្តិ ដែលអាចនឹងលេចចេញនូវ រដ្ឋាភិបាលស្តាំនិយមជ្រុលជាលើកដំបូង គិតចាប់តាំងពីសម័យសង្រ្គាមលោកលើកទី២។ នេះបើតាមការផ្សាយដោយ ទីភ្នាក់ងារព័ត៌មាន Reuters នាថ្ងៃអាទិត្យ ទី៣០ ខែមិថុនា ឆ្នាំ២០២៤។

ប្រធានាធិបតីបារាំង លោក Emmanuel Macron បានបង្កឱ្យមានការនឹកស្មានមិនដល់ នៅពេលដែលរូបលោក បានសម្រេចប្រកាសឱ្យមាន ការបោះឆ្នោតមុនអាណត្តិខាងលើនេះ ក្រោយបក្សកណ្តាលនិយមរបស់លោក បានទទួលបរាជ័យយ៉ាងអាម៉ាស់ នៅក្នុងការបោះឆ្នោតសភាអឺរ៉ុប នាខែមិថុនានេះ ក្រោមថ្វីដៃរបស់បក្សស្តាំនិយមជ្រុល National Rally (RN) របស់លោកស្រី Marine Le Pen ដែលមាននិន្នាការ រិះគន់សហភាពអឺរ៉ុប និងប្រឆាំងជនអន្តោប្រវេសន៍។

ការបោះឆ្នោតនឹងចាប់ផ្តើមនៅម៉ោង ០៦៖០០ GMT រួចបញ្ចប់ទៅវិញនៅម៉ោង ១៦៖០០ GMT តាមក្រុង-ទីក្រុងតូចៗ និងនៅ ម៉ោង១៨៖០០ GTM តាមទីក្រុងធំៗ។ ការបោះឆ្នោតសភាបារាំងជុំទី២ នឹងត្រូវធ្វើឡើងនៅថ្ងៃទី៧ ខែកក្កដា នៅតាមមណ្ឌលបោះឆ្នោតណា ដែលមិនមានបេក្ខជនណាមួយ ទទួលបានសំឡេងគាំទ្រលើស ៥០ភាគរយ ក្នុងការបោះឆ្នោតជុំទី១។ សភាបារាំងមានអាសនៈ សរុបចំនួន ៥៧៧អាសនៈ។

កាលពីថ្ងៃពុធសប្តាហ៍នេះ លោកស្រី Le Pen បាននិយាយថា គណបក្ស RN នឹងឈ្នះបានសំឡេងភាគច្រើនដាច់ខាត ហើយមនុស្ស របស់លោកស្រី គឺលោក Jordan Bardella វ័យត្រឹម២៨ឆ្នាំ នឹងក្លាយជានាយករដ្ឋមន្រ្តីបារាំង។ ប្រសិនបើបែបនោះមែន ការទូតនៃ ប្រទេសបារាំង នឹងឆ្ពោះទៅរកពេលវេលាមិននឹងនរមួយ ដែលមិនធ្លាប់មានពីមុនមក ដោយលោក Macron ដែលធ្លាប់បាននិយាយថា នឹងបន្តអាណត្តិប្រធានាធិបតីរបស់លោក រហូតដល់ទីបញ្ចប់ នៅឆ្នាំ២០២៧ ហើយនិងលោក Bardella មុខជានឹងត្រូវប្រជែងសិទ្ធិគ្នា ដើម្បីធ្វើជាសំឡេងតំណាងឱ្យបារាំង។ លោក Bardella បានឱ្យតំរុយខ្លះៗរួចហើយថា រូបលោកនឹងតវ៉ាជាមួយលោក Macron ជុំវិញបញ្ហាសកលផ្សេងៗ ។

គួរបញ្ជាក់ថា យោងតាមលទ្ធផលស្ទង់មតិកន្លងមក គណបក្ស RN នឹងនាំមុខក្នុងសំឡេង៣៣-៣៦ភាគរយ នៃសន្លឹកឆ្នោតដែលបានបោះ ដោយប្រជាជន ខណៈក្រុមឆ្វេងនិយម New Popular Front នឹងស្ថិតនៅលេខរៀងទី២ ជាមួយសំឡេង២៨-៣១ភាគរយ ចំណែកឯ ក្រុមកណ្តាលនិយមរបស់លោក Macron គឺនៅលេខ៣ ជាមួយសំឡេង២០-២៣ភាគរយ៕