អ្នកបើករថយន្តម្នាក់ បើកវ៉ាជែងខ្វះការប្រុងប្រយ័ត្ន បណ្តាលឲ្យស្លាប់មនុស្ស ត្រូវតុលាការឃុំខ្លួន
កណាល ៖ តៃកុងរថយន្តម្នាក់ ដែលបើកវ៉ាជែងម៉ូតូជ្រុលចង្កូតទៅបុកម៉ូតូមួយគ្រឿងទៀត បណ្ដាលឲ្យស្លាប់ម្នាក់ រងរបួសម្នាក់នៅស្រុកខ្សាច់កណ្ដាល នៅល្ងាចថ្ងៃទី១៩ វិច្ឆិកា ២០១៨
លោក អ៊ី សុវណ្ណ ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីកាឃុំខ្លួនដាក់ពន្ធនាគារបណ្តះអាសន្នពីបទ«បើកបរបណ្ដាលឲ្យរបួសដល់អ្នកដ៍ទៃ និងបើកបរបណ្តាលឲ្យស្លាប់ដល់អ្នកដទៃ» យោង តាមមាត្រា៨៣ និងមាត្រា៨៥នៃច្បាប់ស្តីពីចរាចរណ៍ផ្លូវគោក។
ជនត្រូវចោទមានឈ្មោះ ធៀម អូលីដា ភេទប្រុស អាយុ៣២ឆ្នាំ រស់នៅភូមិស្វាយអាត់ក្រោម ឃុំព្រែកតាមាក់ ស្រុកខ្សាច់កណ្ដាល។
នគរបាលបានអោយដឹងថា នៅថ្ងៃអាទិត្យ ទី១៨ ខែវិច្ឆិកា ឆ្នាំ២០១៨ វេលាម៉ោង១៧និង៥០នាទី នៅលើផ្លូវខេត្ត៣៨០ ចំណុចភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្ដាលខេត្តកណ្ដាល មានរថយន្តមួយគ្រឿងម៉ាក MITSUBISHI ពណ៌ទឹកប៊ិច ប្រភេទទេសចរណ៍ ពាក់ផ្លាកលេខ ភ្នំពេញ 2C-0072 បើកបរដោយឈ្មោះ ធៀម អូលីដា ភេទប្រុស អាយុ៣២ឆ្នាំ រស់នៅភូមិស្វាយអាត់ក្រោម ឃុំព្រែកតាមាក់ ស្រុកខ្សាច់កណ្ដាល បើកបរក្នុងទិសដៅពីត្បូងទៅជើង ។
លុះមកដល់ចំណុចកើតហេតុរថយន្តខាងលើបានវ៉ាម៉ូតូមួយគ្រឿងទៀតមិនស្គាល់ម៉ាក ហើយបានជ្រុលទៅបុកម៉ូតូមួយគ្រឿងម៉ាក SMAHS C110 ពណ៌ខ្មៅ ពាក់ផ្លាកលេខកណ្ដាល 1J-4774 បើកបរដោយឈ្មោះ ពៅ លាងអេង អាយុ២៨ឆ្នាំ នៅភូមិអញ្ជែងលើ ឃុំពុកឫស្សី ស្រុកខ្សាច់កណ្ដាល ខេត្តកណ្ដាល (រងរបួសធ្ងន់បញ្ជូនទៅកាន់មន្ទីរពេទ្យភ្នំពេញ) បើកបរនៅក្នុងទិសដៅពីជើងទៅត្បូង ដោយមានអ្នករួមដំណើរម្នាក់ឈ្មោះ អេង លាង អ៊ី ភេទស្រី អាយុ២ឆ្នាំ នៅភូមិអញ្ជែងលើ ឃុំពុកឫស្សី ស្រុកខ្សាច់កណ្ដាល ខេត្តកណ្ដាល (ស្លាប់នៅកន្លែងកើតហេតុ) ។
ករណីខាងលើនេះ បណ្តាលមកពីអ្នកបើកបររថយន្ត បើកបរវ៉ាជែងខ្វះការប្រុងប្រយ័ត្ន ។ ចំពោះអ្នកបើកបររថយន្តរួមទាំងវត្ថុតាងត្រូវបានឃាត់ និងរក្សាទុកនៅអធិការនគរបាលស្រុក ។ ចំណែកសពត្រូវបានត្រូវបានសមត្ថកិច្ចប្រគល់ឲ្យគ្រួសារយកទៅធ្វើបុណ្យតាមប្រពៃណី៕
