រីករាយក្នុងថ្ងៃទី១ នៃព្រះរាជពិធីបុណ្យអុំទូក ក្រោមព្រះរាជធិបតីរបស់ព្រះមហាក្សត្រ

ភ្នំពេញ៖នៅម៉ោងប្រមាណ​ ៤.៣០​ ល្ងាចថ្ងៃទី២១ ខែវិច្ឆិកា ឆ្នាំ២០១៨ នេះ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងមកដល់វេទិកាកិត្តិយនៃព្រះរាជពិធីហើយ ដើម្បីទតការប្រណាំងទូកងថ្ងៃដំបូង នៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅខាងមុខព្រះបរមរាជវាំង រាជធានីភ្នំពេញ។ វត្តមានយាង និងអញ្ជើញចូលរួមក្នុងព្រះរាជពិធីថ្ងៃនេះគឺមាន សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងសម្តេច ទ្រង់ ឯកឧត្តម លោកជំទាវ និងថ្នាក់ដឹកនាំមន្រ្តីរាជការ ប្រជាពលរដ្ឋ ភ្ញៀវជាតិ និងអន្តរជាតិយ៉ាងច្រើនកុះករផងដែរ។

ពិធីប្រណាំងទូកងគឺបានចាប់ផ្តើមតាំងពីម៉ោង ១១:០០ ព្រឹកមកម៉្លេះនៅមុខព្រះបរមរាជវាំង។ នៅពេលនេះធាតុអាកាសនៅមាត់ទន្លេអំណោយផល មេឃស្រឡះល្អ ហើយនៅពេលនេះដែរគឺបងប្អូនប្រជាពលរដ្ឋកំពុងធ្វើដំណើរមកចូលរួមទស្សនាការប្រណាំងទូកកាន់តែច្រើនឡើងៗ ក្នុងនោះរួមទាំងភ្ញៀវទេសចរបរទេសផងដែរ។ នេះបើតាមការផ្សាយព័ត៌មានរបស់ផេកសម្តេចតេជោ នាយករដ្ឋមន្រ្តី។

នៅពេលនេះដែរ គឺមានវត្តមានមន្ត្រីជាន់ខ្ពស់ ដែលជាសមាជិកព្រឹទ្ធសភា​ រដ្ឋសភា រាជរដ្ឋភិបាល ភ្ញៀវ​ជាតិ និងភ្ញៀវអន្តរជាតិ យ៉ាងច្រើនកុះករ កំពុងរង់ចាំព្រះរាជវត្តមានដ៏ខ្ពង់ខ្ពស់បំផុតរបស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលនឹងយាងទតការប្រណាំងទូកងថ្ងៃដំបូង នៅក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅរសៀលនេះផងដែរ។

ក្រៅពីកម្មវិធីប្រណាំងទូក បងប្អូនប្រជាពលរដ្ឋអាចចូលរួមទស្សនាកំសាន្តការប្រគំតន្រ្តី និងទស្សនាការតាំងពិព័រណ៍និងទិញទំនិញនៅតាមស្តង់ជាច្រើនដែលបានរៀបចំនៅកោះពេជ្រ សួនច្បារមុខវត្តបុទុម ត្រើយម្ខាងស្ពានជ្រោយចង្វា នាពេលល្ងាចផងដែរ។ ក្នុងនោះ បងប្អូនអាចនាំកូនចៅតូចៗមកកម្សាន្តនៅកន្លែងសួនកុមារកោះពេជ្រផងដែរ។

សូមអរគុណដល់ អាជ្ញាធរ សមត្ថកិច្ចគ្រប់ជាន់ថ្នាក់ដែលបានយកចិត្តទុកដាក់ខ្ពស់ ក្នុងការថែរក្សាសន្តិសុខសណ្តាប់ធ្នាប់ឱ្យបានល្អ ដើម្បីប្រជាពលរដ្ឋ និងទេសចរបរទេសមានឱកាសបានសប្បាយរីករាយនៅក្នុងពិធីបុណ្យអុំទូក ទាំងនៅក្នុងរាជធានីភ្នំពេញ និងតាមបណ្តាខេត្តនានា។

សូមបងប្អូនជនរួមជាតិបានសប្បាយរីករាយនៅក្នុងព្រះរាជពិធីបុណ្យអុំទូក៣ថ្ងៃនេះគ្រប់ៗគ្នា៕