ក្រុមប្រឹក្សាណាតូ-អ៊ុយក្រែន នឹងជួបប្រជុំនៅថ្ងៃពុធតាមការស្នើសុំរបស់ទីក្រុងកៀវ

កៀវ៖លោក Jens Stoltenberg អគ្គលេខាធិការណាតូ នឹងកោះប្រជុំក្រុមប្រឹក្សាណាតូ-អ៊ុយក្រែននៅថ្ងៃពុធសប្តាហ៍នេះ តាមការស្នើសុំរបស់ក្រុងកៀវ នេះបើតាមអ្នកនាំពាក្យរបស់សម្ព័ន្ធយោធាលោកខាងលិចមួយនេះ ដែលបាននិយាយកាលពីថ្ងៃអង្គារ។
អ្នកនាំពាក្យ លោកស្រី Farah Dakhlallah បាននិយាយថា «កិច្ចប្រជុំនេះនឹងត្រូវធ្វើឡើងនៅកម្រិតឯកអគ្គរដ្ឋទូត»។ លោកស្រីបានបន្ថែមថា «រដ្ឋមន្ត្រីការពារជាតិអ៊ុយក្រែន លោក Rustem Umerov ត្រូវបានគេរំពឹងថានឹងធ្វើបទបង្ហាញជូនសម្ព័ន្ធមិត្តតាមរយៈវីដេអូអំពីស្ថានភាពសមរភូមិ និងតម្រូវការសមត្ថភាពអាទិភាព»។
ក្រុមប្រឹក្សាណាតូ-អ៊ុយក្រែនត្រូវបានបង្កើតឡើងកាលពីឆ្នាំមុន ដើម្បីធ្វើឱ្យការសម្របសម្រួលកាន់តែជិតស្និទ្ធរវាងសម្ព័ន្ធមិត្ត និងក្រុងកៀវ។
ឯកអគ្គរដ្ឋទូតមកពីបណ្តាប្រទេសសមាជិកណាតូ និងមន្ត្រីអ៊ុយក្រែន ជាធម្មតាចូលរួមកិច្ចប្រជុំក្រុមប្រឹក្សា។
លោកស្រី Dakhlallah បាននិយាយនៅក្នុងសេចក្តីថ្លែងការណ៍តាមអ៊ីមែលថា «កិច្ចប្រជុំថ្ងៃពុធ (ស្អែក) បានកើតឡើងបន្ទាប់ពីរលកនៃការវាយប្រហារដ៏ធ្ងន់ធ្ងររបស់រុស្ស៊ីលើជនស៊ីវិល និងហេដ្ឋារចនាសម្ព័ន្ធអ៊ុយក្រែន»។
លោកស្រីបានបន្ថែមថា «សម្ព័ន្ធមិត្តណាតូបានផ្តល់ការគាំទ្រយ៉ាងច្រើនដល់ការពារដែនអាកាសរបស់អ៊ុយក្រែន ហើយពួកគេប្តេជ្ញាបន្តពង្រឹងការការពាររបស់អ៊ុយក្រែន»។
គួរបញ្ជាក់ថា ក្រុមមន្ត្រីបាននិយាយកាលពីថ្ងៃអង្គារថា រុស្ស៊ីបានបាញ់មីស៊ីល និងដ្រូនវាយប្រហារលើតំបន់អ៊ុយក្រែនរាប់សិបគ្រាប់ និងសម្លាប់មនុស្សយ៉ាងតិចប្រាំនាក់ មួយថ្ងៃបន្ទាប់ពីការវាយប្រហារតាមអាកាសដ៏ធំបំផុតរបស់ទីក្រុងម៉ូស្គូ លើប្រទេសជិតខាងរបស់ខ្លួន៕