សភាពការណ៍ថ្ងៃទី២ នៃព្រះរាជពិធីបុណ្យអុំទូក មានប្រជាពលរដ្ឋ មកចូលរួមកម្សាន្តសប្បាយ ប្រមាណ៩០ម៉ឺននាក់
ភ្នំពេញ ៖ បើតាមរបាយការណ៍របស់ អនុគណ:កម្មការការពារសន្តិសុខ របៀបរៀបរយ សណ្ដាប់ធ្នាប់សង្គម ចរាចរណ៍ សង្គ្រោះទូកលិច និងអ្នកជំងឺ បានឲ្យដឹងថា ថ្ងៃទី២ នៃព្រះរាជពិធីបុណ្យអុំទូក បណ្តែបប្រទីប សំពះព្រះខែ និងអកអំបុក សន្តិសខ សណ្តាប់ធ្នាប់មានភាពល្អប្រសើរ ខណៈមានប្រជាពលរដ្ឋមកចូលរួមកម្សាន្តសប្បាយប្រមាណ៩០ម៉ឺននាក់ ទៅ ១លាននាក់ ។ ជាការកត់សម្គាល់ ៖ សភាពការណ៍បទល្មើសរួមមាន ៖ លួច ១លើក បាត់ម៉ូតូ ១គ្រឿង សភាពការណ៍គ្រោះថ្នាក់ផ្សេងៗរួមមាន ៖ លិចទូក ១លើក, អន្តរាគមន៍ជួយទូកអុំលិច ១គ្រឿង, សង្គ្រោះកីឡាករអុំទូកលិចចំនួន ២៤នាក់ ដោយសុវត្ថិភាព។ លទ្ធផលអន្តរាគមន៍ និងសង្គ្រោះ៖ ជួយសង្គ្រោះក្មេងវង្វេងគ្រួសារចំនួន ១៤លើក ស្មើ ១៤នាក់ ប្រគល់ជូនក្រុមគ្រួសារ, ឃាត់ជនស៊ីវិលពាក់អាវមានអក្សរ Police និង ARMY ចំនួន ១៣នាក់ ធ្វើការអប់រំ ដកហូតអាវ និងអនុញ្ញាតឲ្យត្រឡប់ទៅផ្ទះវិញ, ចែកបណ្ណស្តីពីបង្ការ ទប់ស្កាត់ និងពន្លត់អគ្គិភ័យ បានចែកជូនប្រជាពលរដ្ឋ អាជីករ ចំនួន ៤១៧សន្លឹក ។
នៅក្នុងឱកាសព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំនេះ អគ្គស្នងការដ្ឋាននគរបាលជាតិ ក្រសួងមហាផ្ទៃ បានត្រៀមកម្លាំងចម្រុះ ទាំងចំហរ និងសម្ងាត់ ជាងមួយម៉ឺនបីពាន់នាក់ សម្រាប់ការពារសន្តិសុខ សណ្តាប់ធ្នាប់ ខណៈទូកអុំមានការកើនឡើងរហូតដល់២៩៥ទូក និងកីឡាករជិតពីរម៉ឺននាក់ ។ ដោយឡែកថ្ងៃទី២ នៃព្រះរាជពិធីបុណ្យអុំទូក បណ្តែបប្រទីប សំពះព្រះខែ និងអកអំបុក មានទូកចូលរួមប្រកួតចំនួន២៩៥ទូក (ទូកអន្តរជាតិចំនួន៩៨ទូក ស្រី២ទូក)
បើតាមការផ្សាយរបស់វេបសាយអគ្គស្នងការនគរបាលជាតិ
ព្រឹកថ្ងៃទី២៣ ខែវិច្ឆិកា ឆ្នាំ២០១៨នេះ ត្រូវនឹងថ្ងៃទី៣ នៃព្រះរាជពិធីបុណអុំទូក បណ្តែតប្រទីប សំពះព្រះខែ និងអកអំបុក នៅនាយកដ្ឋានអង្គរក្ស,លោក នាយឧត្ដមសេនីយ៍ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស, លោក នាយឧត្ដមសេនីយ៍ ហ៊ឹម យ៉ាន អគ្គស្នងការរងនគរបាលជាតិ, លោក ឧត្ដមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ ព្រមទាំងសមត្ថកិច្ចពាក់ព័ន្ធទាំងអស់ បានធ្វើការប្រជុំដកពិសោធន៍ សភាពការណ៍សន្តិសុខ សណ្តាប់ ថ្ងៃទី២ នៃព្រះរាជពិធីបុណ្យអុំទូក។
ថ្ងៃទី២ នៃព្រះរាជពិធីបុណ្យអុំទូក ទាំងក្នុងកន្លែងប្រារព្ធពិធី និងនៅជុំវិញកន្លែងប្រារព្ធពិធី ជារួមឃើញថា មានភាពល្អប្រសើរ ដើម្បីថែរក្សាសុវត្ថិភាព សន្តិសុខ សណ្តាប់ ជូនប្រជាពលរដ្ឋដែលមកកម្សាន្តសប្បាយក្នុងពិធីបុណ្យអុំទូកនោះផងដែរ លោក នាយឧត្ដមសេនីយ៍ ទូច ណារ៉ុថ បានសង្កត់ធ្ងន់ទៅលើបញ្ហាការការពារតាមបណ្ដាច្រកចេញ ចូល ត្រូវបញ្ចៀសឲ្យបានដាច់ខាត ជៀសវាងមានឧប្បត្តិហេតុអ្វីកើតឡើង។
លោក នាយឧត្ដមសេនីយ៍ ទូច ណារ៉ុថ ក៏បានណែនាំដល់កងកម្លាំងទាំងអស់ត្រូវតែការពារតាមបណ្ដាគោលដៅរបស់ខ្លួន ជៀសវាងមានការថ្នាំងថ្នាក់ជាមួយប្រជាពលរដ្ឋ ជាពិសេសថ្ងៃទី២៣នេះ សូមពង្រឹងសុវត្ថិភាពសណ្តាប់ធ្នាប់ឲ្យខ្លាំងជាងថ្ងៃប្រារព្ធពិធីទី១ និងទី២ និងត្រៀមគ្រប់ពេលវេលា ចេញប្រតិបត្តិការអន្តរាគមន៍បានទាន់ពេលវេលាប្រកបដោយស្មារតីទទួលខុសត្រូវខ្ពស់ ដើម្បីជួយសង្គ្រោះដល់ប្រជាពលរដ្ឋពេលដែលមានបញ្ហាកើតឡើងជាយថាហេតុ ។
លោក នាយឧត្ដមសេនីយ៍ ទូច ណារ៉ុថ បានមានប្រសាសន៍បន្ថែមទៀតថា ថ្ងៃនេះជាថ្ងៃចុងក្រោយ ដូច្នេះកងកម្លាំងគ្រប់គោលដៅទាំងអស់ត្រូវនៅទាល់តែចប់ ដើម្បីការពារប្រជាពលរដ្ឋឲ្យបានចប់ចុងចប់ដើម ៕
