ខ្មែរនៅកូរ៉េស្នើអភិបាលខេត្តខ្យងប៊ុក និងថ្នាក់ដឹកនាំ DGIEA កុំមើលរំលងលើវិស័យពាណិជ្ជកម្ម និងវិនិយោគរវាងគ្នានិងគ្នា
ប្រទេសកូរ៉េ ៖ ឯកអគ្គរដ្ឋទូតកម្ពុជាប្រចាំសាធារណរដ្ឋកូរ៉េ លោក ឡុង ឌីម៉ង់ កាលពីល្ងាចថ្ងៃទី២៣ ខែធ្នូ ឆ្នាំ២០១៨ បានចូលរួមកម្មវិធីខួបទី១០ឆ្នាំនៃការបង្កើតសមាគមផ្លាស់ប្តូរវប្បធម៌និងសហប្រតិបត្តិការគ្នាមនុស្សធម៌ Daegu-Gyeongbuk International Exchange Association (DGIEA) ដោយមានការអញ្ជើញចូលរួមពីសំណាក់លោកអភិបាលខេត្តខ្យងប៊ុករួមជាមួយលោកអភិបាលក្រុងថេហ្គូ អង្គទូតចំនួន៣៣ និងថ្នាក់ដឹកនាំ DGIEA ភ្ញៀវអន្ដរជារិ និងសមាជិកសមាគមប្រមាណជាង ១ពាន់នាក់។
ក្នុងនោះលោកអភិបាលខេត្តខ្យងប៊ុករួមជាមួយលោកអភិបាលក្រុងថេហ្គូបានប្តេជ្ញាបន្តការគាំទ្រក៏ដូចជាជម្រុញឲ្យគ្រប់សមាគមន៏មិត្តភាពកូរ៉េ និងបណ្តាប្រទេស៣៣ដែលជាសមាជិកបណ្តាញរបស់ Daegu-Gyeongbuk International Exchange Association (DGIEA)រួមមានកម្ពុជាមួយផងដែរនោះ ផ្លាស់ប្តូរសកម្មភាពវប្បធម៌គ្នា សហប្រតិបត្តិការគ្នាផ្នែកមនុស្សធម៌ទៅវិញទៅមក ដើម្បីជាការរួមចំណែករឹតចំណងសាមគ្គីភាពជាមួយកូរ៉េឲ្យកាន់តែរឹងមាំ។
ថ្លែងទៅកាន់អង្គមីទ្ទីញលោក ឡុង ឌីម៉ង់បានគូសបញ្ជាក់ និងស្នើសុំឲ្យក្របខ័ណ្ឌកិច្ចសហការគ្នានៃសមាគមន៏មិត្តភាពទាំងនោះមិនត្រូវមើលរំលងលើវិស័យពាណិជ្ជកម្មនិងវិនិយោគរវាងគ្នានិងគ្នាទេ ដើម្បីឲ្យពលរដ្ឋយើងទាំងអស់គ្នាទទួលបាននូវសុខដុមនិយកម្មពីមិត្តភាពនេះ៕