យុគ យក្សផ្លែផ្ដួលឡុង ខេត្តទឹក២ប្រជែងយកកៅអីជុំទី

ភ្នំពេញ:យុគ យក្សផ្លែក្លិបបូរីរាជសីហ៍មានរិទ្ធប្រើពេលតែ២ទឹក តែប៉ុណ្ណោះធ្វើឲ្យអ្នកប្រដាល់ឡុង ខេត្តបង្ខំចិត្តលើកទង់ជ័យ ស ចុះចាញ់ត្រឹមទឹកទី២នៅក្នុងព្រឹត្តិការណ៍TV5 Boxing Knock-Out Serie by K-Cementនាយប់ថ្ងៃទី២៤វិច្ឆិកា ។

​ការប្រកួតដែលមានត្រឹមតែ៣ទឹកនោះយក្សផ្លែបាន ប្រើយុទ្ធសាស្ត្រវាយរហ័សដើម្បីបានទទួលជ័យជំនះក៏បានលឿនដែរ ។ កណ្ដាប់ដៃរបស់យក្សផ្លែបានធ្វើឲ្យឡុង ខេត្តវង្វេងចំនួន២ លើកនៅទឹកទី២ហើយក៏ត្រូវអាជ្ញាកណ្ដាលរាប់៨នៅទឹកទី២ ដែរ ។

​ជាមួយនឹងការរាប់៨នៅក្នុងទឹកតែមួយបែបនេះ អ្នកប្រដាល់ឡុង ខេត្តក៏សុខចិត្តបោះបង់ចោលការប្រកួតក្នុងទឹកទី២នេះតែម្ដង ។ឡុង ខេត្តខ្ទាតចេញពីការប្រកួតនៅត្រឹមជុំទី១នេះតែម្ដង ចំពោះយុគ យក្សផ្លែដណ្ដើមបានកៅអី ដើម្បីប្រកួតជម្រុះនៅជុំទី២បន្តទៀត ។

​ប្រកួតក្នុងព្រឹត្តិការណ៍នេះដែរសេន កុសលក្លិបមោងឬស្សីមរតកគុនខ្មែរបាន យកឈ្នះអ្នកប្រដាល់ម៉ន រិទ្ធីក្លិបការិយាល័យទី៥ កងទ័ពជើងគោកដោយពិន្ទុដាច់តែម្ដង ។

ចៅក្រមទាំង៥សុទ្ធតែផ្ដល់ពិន្ទុឲ្យកុសលឈ្នះគ្រប់ៗគ្នាគឺកុសលបានទទួលជ័យជំនះ៥ទល់០តែម្ដង ។កុសលប្រជែងឈ្នះកៅអីសម្រាប់ជុំទី២ ឯម៉ន រិទ្ធីហាលអាវត្រឹមនេះ ។គិតត្រឹមពេលនេះ មានអ្នកប្រដាល់១០រូបហើយដែល
ហាលអាវហើយក៏មាន១០រូប ដែរដែលកក់កៅអីសម្រាប់ប្រកួតជម្រុះបន្តនៅជុំទី២ ។
​ការប្រកួតជាមិត្តភាពជាមួយអ្នកប្រដាល់ថៃវិញនោះរឿម វណ្ណៈ ក្លិបរាជសីហ៍ខេត្តបន្ទាយមានជ័យ ផ្ដួលអ្នកប្រដាល់ថៃផាត ឆាយ៉ាកភូមិ(Phat Chhayakphum)បានមុនស្នូរជួងបញ្ចប់ទឹកទី២ ។

​អ្នកប្រដាល់ថៃរូបនេះត្រូវវណ្ណៈវាយឲ្យរបួស និង ខូចជើងនៅ ក្នុងទឹកទី២នេះតែម្ដង ។វណ្ណៈបាត់មុខយូរហើយពេលនេះ គេលេចមុខមកវិញជាមួយនឹងជ័យជំនះ ។

​ការប្រកួតក្រៅពានរង្វាន់រវាងអ្នកប្រដាល់រួមជាតិវិញនោះរ៉ែម រាជក្លិបអង្គរមានជ័យខេត្តសៀមរាប ប្រកួតស្មើពិន្ទុជាមួយលី តឿនក្លិបម្កុដរាជសីហ៍ ។ ​ប្រសិនបើរ៉ែម រាជមិនភ្លាត់ស្នៀតឲ្យលី តឿនវាយមួយដៃ ហើយត្រូវអាជ្ញាកណ្ដាលរាប់៨នៅទឹកទី១ទេនោះការ
ប្រកួតនេះរ៉ែមរាជប្រាកដជាឈ្នះមិនខាន ។