ចប់អាណត្តិក្តី លោក William A. Heidt គាំទ្រការវិនិយោគអាមេរិក នៅកម្ពុជា

ភ្នំពេញ៖ លោក William A. Heidt ឯកអគ្គរដ្ឋទូតសហរដ្ឋអាមេរិក ក្រោយបញ្ចប់បេសកកម្ម​ នៅកម្ពុជាអស់រយៈពេល៣ឆ្នាំ បានសម្តែងឆន្ទៈបន្ថែម ក្នុងការបន្តលើកកម្ពស់ និងគាំទ្រដល់ការវិនិយោគ អាមេរិកបន្ថែមទៀត នៅកម្ពុជា ទៅលើវិស័យភ័ស្តុភារកម្ម និងហេដ្ឋារចនាសម្ព័ន្ធ។

ក្នុងជំនួបពិភាក្សា ការងារជាមួយលោក ស៊ុន ចាន់ថុល ទេសរដ្ឋមន្រ្តី ក្រសួងសាធារណៈការ និងដឹកជញ្ជូន នាពេលថ្មីៗនេះលោក William A. Heidt ដែលនឹងត្រូវចប់អាណត្តិ ចុងខែវិច្ឆិកានេះ បានលើកឡើងថា “ខ្ញុំសម្តែងនូវឆន្ទៈបន្ថែមទៀត ក្នុងការបន្តលើកកម្ពស់ និងគាំទ្រ ដល់ការវិនិយោគ របស់អាមេរិកបន្ថែមទៀត នៅក្នុងប្រទេសកម្ពុជា លើវិស័យភ័ស្តុភារកម្ម និងហេដ្ឋារចនាសម្ព័ន្ធ”។

ចំណែក លោក ស៊ុន ចាន់ថុល ក៏បានលើកឡើង ពីគំនិតផ្តួចផ្តើម កំណែទម្រង់ ដែលកំពុងដំណើរការរបស់ក្រសួង និងបានកត់សម្គាល់ជាក់លាក់ លើការចូលរួមចំណែក របស់ក្រុមហ៊ុន General Electric និងក្រុមហ៊ុនអាមេរិកដទៃទៀត ក្នុងការអភិវឌ្ឍប្រទេសកម្ពុជា៕