ប្រជាពលរដ្ឋមកលេងបុណ្យអុំទូកពេញចិត្តរដ្ឋបាលរាជធានីចំពោះការដាក់ពង្រាយបង្គន់អនាម័យគ្រប់ច្រកល្ហក និងដោយឥតគិតថ្លៃ
ភ្នំពេញ៖ ប្រជាពលរដ្ឋដែលមកលេងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនៅភ្នំពេញឆ្នាំ២០២៤នេះ បានបង្ហាញការពេញចិត្តចំពោះ រដ្ឋបាលរាជធានីភ្នំពេញ ដែលបានដាក់បង្គន់សាធារណៈឱ្យប្រជាពលរដ្ឋប្រើប្រាស់ដោយឥតគិតថ្លៃ ដើម្បីបង្កភាពងាយស្រួលដល់ប្រជាពលរដ្ឋ។
មន្ត្រីជំនាញរដ្ឋបាលរាជធានីភ្នំពេញឱ្យដឹងថា៖ការរៀបចំដាក់ពង្រាយបង្គន់អនាម័យបម្រើឱ្យព្រះរាជពិធីបុណ្យអុំទូកល្អបែបនេះគឺដោយសារឯកឧត្ដមឃួង ស្រេង អភិបាលរាជធានីភ្នំពេញ បានប្រជុំដាក់ផែនការ យ៉ាងច្បាស់លាស់ ជាមួយនិងការត្រៀមលក្ខណៈទុកជាមុនទាំងបង្គន់ចល័តផងដែរ។
ដោយភាពរីករាយសប្បាយចិត្តលោកស្រី ឈិន សារុន ជាប្រជាពលរដ្ឋមកពីខេត្តព្រៃវែង បានឱ្យដឹងនៅថ្ងៃទី១៦ខែវិច្ឆិកាឆ្នាំ២០២៤នេះបានថ្លែងអរគុណចំពោះអាជ្ញាធររាជធានីភ្នំពេញ ដែលបានដាក់ពង្រាយបង្គន់អនាម័យជាច្រើនកន្លែង តាមគោលដៅនានាក្នុងរាជធានីភ្នំពេញ ដើម្បីឱ្យប្រជាពលរដ្ឋ និងភ្ញៀវទេសចរប្រើប្រាស់បានងាយស្រួល មិនពិបាកទៅបន្ទោបង់ពាសវាលពាលកាលដែល ធ្វើឱ្យប៉ះពាល់ដល់បរិស្ថាន និងធានាបានសុវត្ថិភាពផងដែរ ។
លោកស្រីបញ្ជាក់ថា « មានបង្គន់អនាម័យ ងាយស្រួលទី១ បរិស្ថានស្អាត ប្រសិនបើអត់មានបង្គន់គាត់នឹងជុះវាលជុះកាលទេ ទី២ វាមានផាសុខភាព និងងាយស្រួលចូលបន្ទាប់ទឹក »។
ជាមួយគ្នានេះ លោកស្រីបានអំពាវនាវឱ្យប្រជាពលរដ្ឋសូមជួយថែរក្សាអនាម័យបរិស្ថានឱ្យបានស្អាត ដើម្បីទប់ស្កាត់ការក្លិនឆ្អេះស្អុយ និងងាយស្រួលក្នុងការបន្ទោបង់។
ជាមួយគ្នាដែរ លោកវង់ សុរិទ្ធ ពលរដ្ឋមកពីខេត្ដក្រចេះ បានឱ្យដឹងដែរថា ការដាក់ឱ្យប្រើប្រាស់បង្គន់អនាម័យច្រើនក្នុងព្រះរាជពិធីបុណ្យអុំទូកបែបនេះ គឺជាការចូលរួមថែរក្សាអនាម័យសុខភាពសាធារណៈ និងសោភ័ណភាពរាជធានីភ្នំពេញ អាចទាក់ទាញភ្ញៀវទេសចរឱ្យមកលេងព្រះរាជពិធីបុណ្យអុំទូកនៅឆ្នាំក្រោយៗទៀត។
សម្រាប់ព្រះរាជពិធីបុណ្យ អុំទូកឆ្នាំ២០២៤នេះ សាលារាជធានីភ្នំពេញ បានសាងសង់ បង្គន់អនាម័យ និងបន្ទប់ទឹក ព្រមទាំង ពង្រាយបង្គន់អនាម័យ និងបន្ទប់ ទឹក ចល័តសរុបជាង៦០០បន្ទប់ ដើម្បីបម្រើសេវាជូនបងប្អូនប្រជាពលរដ្ឋ ។ ក្នុងនោះ ការងាររៀបចំបង្គន់ និងបន្ទប់ទឹកមាន បង្គន់ថ្មចំនួន១២ទីតាំងស្មើនឹង១៤៦បន្ទប់ (មានស្រាប់តាមសួន) បង្គន់ចល័ត១០០បន្ទប់ (ចាប់ពីមុខផ្សាររាត្រីដល់សួនសម្តេចតេជោ បង្គន់ស័ង្កសីជីកមាន៣០០បន្ទប់ (កីឡាករអុំទូក) បន្ទប់ទឹកស័ង្កសីមាន១០០បន្ទប់ (កីឡាករអុំទូក) ៕