រដ្ឋមន្ត្រីក្រសួងព័ត៌មានកម្ពុជា និងរដ្ឋមន្ត្រីឃោសនាការនៃតំបន់ស្វយ័តជនជាតិជាំងក្វាងសុី ជំរុញការផ្សព្វផ្សាយព័ត៌មាន ទេសចរណ៍ និងការផ្លាស់ប្តូរវប្បធម៌នៃប្រទេសទាំងពីរ ទៅក្នុងតំបន់ និងអន្តរជាតិ

ភ្នំពេញ៖រដ្ឋមន្ត្រីក្រសួងព័ត៌មានកម្ពុជា និងរដ្ឋមន្ត្រីឃោសនាការនៃតំបន់ស្វយ័តជនជាតិជាំងក្វាងសុី ប្រទេសចិន បញ្ជាក់ពីជំហររួមគ្នាបង្កើនកិច្ចសហប្រតិបត្តិការដើម្បីជំរុញការផ្សព្វផ្សាយព័ត៌មាន ទេសចរណ៍ និងការផ្លាស់ប្តូរវប្បធម៌នៃប្រទេសទាំងពីរទៅក្នុងតំបន់ និងអន្តរជាតិ ជាពិសេសដើម្បីអបអរឆ្នាំនៃការផ្លាស់ប្តូរប្រជាជន និងប្រជាជនកម្ពុជា-ចិន ២០២៤។

កិច្ចសហការលើវិស័យព័ត៌មាន និងការផ្សព្វផ្សាយរវាងក្រសួងព័ត៌មាន និងខេត្តក្វាងសុី គឺជាចក្ខុវិស័យដ៏រឹងមាំនៃទំនាក់ទំនងការទូតដ៏យូរលង់អស់រយៈពេល ៦៦ឆ្នាំ ស្របតាមស្មារតី «មិត្តដែកថែប និងសហគមន៍វាសនារួមកម្ពុជា-ចិន ប្រកបដោយភាពស៊ីជម្រៅ និងភាពជាក់ស្ដែង ក្នុងយុគសម័យថ្មី» ក៏ដូចជាក្របខ័ណ្ឌកិច្ចសហប្រតិបត្តិការត្បូងពេជ្ររវាងកម្ពុជា-ចិន ក្នុងទិសដៅពង្រីកការផ្សព្វផ្សាយឱ្យបានទូលំទូលាយពីការពិតនៅកម្ពុជាទៅកាន់ប្រទេសក្នុងតំបន់ និងពិភពលោកបានយល់ឃើញកាន់តែច្បាស់បន្ថែមទៀត។
ការពង្រឹងពង្រីកកិច្ចសហការក្នុងការផ្សព្វផ្សាយរវាងក្រសួងព័ត៌មាន និងរដ្ឋបាលខេត្តក្វាងសុី ធ្វើឡើងក្នុងឱកាសនៃជំនួបពិភាក្សាគ្នារវាង ឯកឧត្ដមនេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ជិន អុីយ៉ុន សមាជិកាគណៈកម្មាធិការអចិន្ត្រៃយ៍ នៃគណៈកម្មាធិការបក្ស និងជារដ្ឋមន្ត្រីឃោសនាការ នៃតំបន់ស្វយ័តជនជាតិជាំងក្ខាងសុី ប្រទេសចិន នៅព្រឹកថ្ងៃទី២៩ ខែវិច្ឆិកា ឆ្នាំ២០២៤ នាទីស្តីការក្រសួងព័ត៌មាន។

ឯកឧត្ដមរដ្ឋមន្ត្រី នេត្រ ភក្ត្រា បានសម្តែងនូវការអរគុណចំពោះរដ្ឋាភិបាលប្រទេសចិន និងរដ្ឋបាលខេត្តក្វាងសុី ដែលបានផ្តល់នូវកិច្ចសហប្រតិបត្តិការល្អជាមួយក្រសួងព័ត៌មានកម្ពុជាទាក់ទងវិស័យព័ត៌មាន និងសោតទស្សន៍ ហើយកិច្ចសហការនេះ គឺក្រសួងព័ត៌មានបានធ្វើកិច្ចការងារច្រើនជាមួយ ស្ថាប័ន អង្គភាពព័ត៌មាន និងប្រពន្ធ័ផ្សព្សាយរបស់រដ្ឋចិន ក្នុងកិច្ចការព័ត៌មាន ហើយបានខិតខំប្រឹងប្រែងផ្សារភ្ជាប់នូវទំនាក់ទំនងលើការងារផ្សព្វផ្សាយព័ត៌មាន វប្បធម៍ ទេសចរណ៍ សំដៅធ្វើយ៉ាងណាពង្រឹងកិច្ចសហប្រតិបត្តិការរវាងប្រទេសកម្ពុជា និងប្រទេសចិ នស្របតាមទិសស្លោកដែលថ្នាក់ដឹកនាំនៃប្រទេសទាំងពីរបានកំណត់ឈរលើសហប្រតិបត្តិការត្បូងពេជ្ររវាងកម្ពុជា-ចិន។

ឯកឧត្ដមរដ្ឋមន្ត្រី នេត្រ ភក្ត្រា បានគូសបញ្ជាក់ថា ឆ្នាំ២០២៤នេះ ជាឆ្នាំនៃការផ្លាស់ប្តូររវាងប្រជាជន និងប្រជាជនអាស៊ានចិន ដែលផ្តោតលើវប្បធម៌ ទេសចរណ៍ ប្រព័ន្ធផ្សព្វផ្សាយ។ ក្នុងក្របខណ្ឌនេះ កម្ពុជាបានរៀបចំសកម្មភាពជាច្រើនដើម្បីលើកកម្ពស់កិច្ចសហប្រតិបត្តិការ ហើយក្នុងកិច្ចការប្រព័ន្ធផ្សព្វផ្សាយ ក្រសួងព័ត៌មានកម្ពុជា បានធ្វើកិច្ចសហប្រតិបត្តិការជាមួយភាគីចិនជាច្រើនលើការផ្សព្វផ្សាយព័ត៌មាន, ការផលិតបទយកការណ៍ និងការផ្លាស់ប្តូរទស្សនកិច្ចគ្នាទៅវិញទៅមក។

ឯកឧត្ដមរដ្ឋមន្ត្រី នេត្រ ភក្ត្រា បានបញ្ជាក់ដែរថា ប្រទេសចិន គឺជាមិត្តភាពដែកថែបរបស់កម្ពុជា ហើយជាប្រទេសដែលផ្តល់ជំនួយច្រើនជាងគេ និងមានការវិនិយោគច្រើនជាងគេនៅកម្ពុជា ទាំងនេះបានបង្ហាញនូវផ្លែផ្កានៃកិច្ចសហប្រតិបត្តិការដែលថ្នាក់ដឹកនាំប្រទេសទាំងពីរកម្ពុជា-ចិន មានតាំងពីយូរយារណាស់មកហើយ ។ ជាមួយនេះ ប្រទេសចិនបានចូលរួមចំណែកយ៉ាងច្រើនលើការកសាងប្រទេសឡើងវិញ លើការអភិវឌ្ឍសេដ្ឋកិច្ច ហើយក្នុងនោះបានធ្វើឱ្យប្រទេសកម្ពុជា មានការប្ររែមុខមាត់ពីប្រទេសក្រីក្រមកជាប្រទេសដែលមានចំណូលមធ្យមកម្រិតទាប ជាមួយការវិនិយោគ និងការចូលរួមកសាងហេដ្ឋារចនាសម្ព័ន្ធជាតិឱ្យមានការរីកចម្រើន។

តាមរយៈនេះដែរ ប្រទេសកម្ពុជាបានផ្តោតជាសំខាន់លើកិច្ចសហប្រតិបត្តិការត្បូងពេជ្រ កិច្ចសហប្រតិបត្តិការអង្ករ និងត្រី ដែលជាផ្នែកមួយនៃការបើកច្រកលើវិស័យកសិកម្ម និងជលផលកម្ពុជា ដើម្បីនាំយកនូវកំណើនសេដ្ឋកិច្ច និងការវិនិយោគលើហេដ្ឋារចនាសម្ព័ន្ធផ្សេងៗទៀតសម្រាប់ការធ្វើទំនើបកម្មនៅក្នុងប្រទេស។ នៅក្នុងអាណត្តិទី៧នេះ រាជរដ្ឋាភិបាលកម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានផ្តោតលើកិច្ចការងារសំខាន់ៗបន្ថែមលើអ្វីដែលជាយុទ្ធសាស្រ្តគោលនយោបាយរបស់ខ្លួន គឺមនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសបច្ចេកវិទ្យាឌីជីថល សម្រាប់ឆ្លើយតបទៅនឹងបដិវត្តឧស្សាហកម្មទី៤ និងបដិវត្តកម្មឌីជីថលនៃសេដ្ឋកិច្ច និងសង្គមកម្ពុជា។ ក្នុងក្របខណ្ឌនេះក្រសួងព័ត៌មាន បានកំពុងធ្វើការអភិវឌ្ឍធនធានមនុស្ស និងបច្ចេកវិទ្យាឌីជីថល ដោយភ្ជាប់ទៅនឹងប្រពន្ធ័ផ្សព្វផ្សាយព័ត៌មានដើម្បីផ្តល់ព័ត៌មានគ្រប់ជ្រុងជ្រោយជូនដល់សាធារណជន។

លោកជំទាវជិន អុីយ៉ុន បានលើកឡើងថា ខេត្តក្វាងសុី គឺជាបង្អូចសម្រាប់បើកទូលាយនូវកិច្ចសហប្រតិបត្តិការរបស់ប្រទេសចិន ជាមួយបណ្តាប្រទេសអាស៊ាន, ក្វាងសុី ព្យាយាម ហើយសកម្មក្នុងការពង្រឹងនូវកិច្ចសហប្រតិបត្តិការលើគ្រប់វិស័យជាមួយប្រទេសកម្ពុជា ជាពិសេសជំរុញកិច្ចសហការលើវិស័យព័ត៌មានអោយកាន់តែសុីជម្រៅដើម្បីរួមចំណែកដល់មិត្តភាពដែកថែបរវាងចិន និងកម្ពុជា។

លោកជំទាវរដ្ឋមន្ត្រីឃោសនាការ នៃតំបន់ស្វយ័តជនជាតិជាំងក្វាងសុី បានលើកឡើងពីការបង្កើតវេទិកាផ្សព្វផ្សាយព័ត៌មានលើវិស័យ Internet នៃប្រទេសទាំងពីរ ដោយក្នុងនោះកាសែតដេលីក្វាងសុី នឹងធ្វើការផ្សព្វផ្សាយពីប្រទេសកម្ពុជា នៅលើវេទិកាក្វាងសុី ហើយកម្ពុជាផ្សាយលើវេទិកានៃប្រព័ន្ធផ្សព្វផ្សាយរបស់ខ្លួនឱ្យកាន់តែទូលំទូលាយបន្ថែមលើវិស័យផ្សេងៗទៀតដែលរដ្ឋាភិបាលចិន និងកម្ពុជាបានអនុវត្តន៍កន្លងមករួចមកហើយ។

លោកជំទាវ ជិន អុីយ៉ុន បានសំដែងនូវការអរគុណចំពោះក្រសួងព័ត៌មានកម្ពុជា ដែលបានសហការគាំទ្រដល់វិស័យព័ត៌មាន និងវិស័យផ្សព្វផ្សាយរបស់ខេត្តក្វាងងសុី ដោយក្នុង នោះស្ថានីយ៍វិទ្យុ និងទូរទស្សន៍ក្វាងសុីបានបង្កើតការរិយាល័យនៅ អគ្គនាយកដ្ឋានទូរទស្សន៍ជាតិកម្ពុជា និងវិទ្យុជាតិកម្ពុជា។ ក្នុងរយៈពេល ១០ឆ្នាំមកនេះ ខេត្តក្វាងសុី ្របទេសចិន បានធ្វើកិច្ចសហការល្អជាមួយក្រសួងព័ត៌មានកម្ពុជា ជាពិសេសជាមួយទូរទស្សន៍ជាតិកម្ពុជា និងវិទ្យុជាតិកម្ពុជា ដោយបានបង្កើតនាទីភាពយន្តភាគចិន និងគំនូរជីវចលចិន ហើយក៏បានផលិតនូវភាពយន្តជាច្រើន ដោយទទួលការគាំទ្រ និងចូលចិត្តទស្សនាពីសំណាក់ប្រជាជនកម្ពុជាយ៉ាងច្រើន។

ឯកឧត្ដមរដ្ឋមន្ត្រី នេត្រ ភក្ត្រា បានបញ្ជាក់ថា ក្រសួងព័ត៌មាននឹងបន្តកិច្ចសហប្រតិបត្តិការល្អបន្ថែមទៀតលើវិស័យព័ត៌មាន និងសោតទស្សន៍ជាមួយចិន និងបានឆ្លើយតបនឹងសំណើកិច្ចសហប្រតិបត្តិការបន្ថែមដែលលើកឡើងដោយលោកំទាវរដ្ឋមន្ត្រីក្រសួងឃោសនាការនៃតំបន់ស្វយ័តជនជាតិជាំងក្ខាងស៊ី លើការផ្សព្វផ្សាយព័ត៌មាន ការសហការផលិតខ្លឹមសារ និងការបណ្តុះបណ្តាលធនធានមនុស្ស៕