យកកាំបិតខ្វែវ កាប់សឹងដាច់ក្បាល ពេលកំពុងសម្រាន្តថ្ងៃត្រង់
ខេត្តបាត់ដំបង ៖ ជនដៃដល់ម្នាក់ បានប្រើកាំបិតកាប់ទៅលើបុរសម្នាក់ ពេលកំពុងសម្រាន្តថ្ងៃត្រង់ រហូតស្ទើរដាច់ក្បាល ស្លាប់ក្នុងថ្លុកឈាម កាលពីវេលាម៉ោង១ និង៤០នាទីរសៀលថ្ងៃទីថ្ងៃទី២៩ វិច្ឆិកា នេះ ស្ថិតនៅក្នុងភូមិសួនស្លា ឃុំក្តុលតាហែន ស្រុកបវេល។ ក្រោយធ្វើសកម្មភាពរួចហើយ ជនដៃដល់រូបនោះ ត្រូវសមត្ថកិច្ចចាប់ខ្លួន។
សមត្ថកិច្ចបានប្រាប់ថា ជនសង្ស័យ ឈ្មោះបាន ចំរើន ភេទប្រុស អាយុ២៨ឆ្នាំ រស់នៅភូមិ-ឃុំ កើតហេតុខាងលើ ជាមនុស្សកើតជំងឺសរសៃប្រសាទ។ ជននេះ បានប្រើប្រាស់កាំបិតខ្វែវ កាប់ទៅលើជនរងគ្រោះ ឈ្មោះឆម ឈឿម ភេទប្រុស អាយុ៤៧ឆ្នាំ រស់នៅភូមិស្រែអន្ទាក់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ត្រូវចំក្បាលជាច្រើនកាំបិត ស្ទើរដាច់ក្បាលធ្លាក់ពីស្មា បណ្ដាលឱ្យស្លាប់ ពេលកំពុងដេកនៅខាងក្រោមផ្ទះ។
ប្រភពព័ត៌មានពីលោកឧត្តមសេនីយ៍ត្រីជេត វណ្ណនី ស្នងការងទទួលបន្ទុកផែនព្រហ្មទណ្ឌ បានបញ្ជាក់ថា៖ ជនរងគ្រោះ នៅរស់ខេត្តប៉ៃលិន បានមកលេងបងស្រី នៅភូមិឃុំកើតហេតុ ស្រាប់តែជនសង្ស័យឈ្មោះបាន ចំរើន ភេទប្រុស អាយុ២៨ឆ្នាំ លបធ្វើឃាតយ៉ាងព្រៃផ្សៃបំផុត។
ក្រោយពេលកើតហេតុ ជនសង្ស័យត្រូវកម្លាំងនគរបាល នៃអធិការដ្ឋានស្រុកបវេល សហការជាមួយ កម្លាំងនគរបាលខេត្តបាត់ដំបង ចាប់ខ្លួនដើម្បីយកទៅធ្វើការស្រាវជ្រាវ រកមូលហេតុជុំវិញ នៃអំពើឃាតកម្មនេះ។
លោកឧត្តមសេនីយ៍ត្រីជេត វណ្ណនី បានបន្តថា៖ រហូតមកដល់ពេលនេះ ជនសង្ស័យបានត្រឹមតែឆ្លើយសារភាពថា ខ្លួនពិតជាបានធ្វើឃាត ជនរងគ្រោះពិតប្រាកដមែន។ មូលហេតុ ជនសង្ស័យសរសៃប្រាសាទ។ បច្ចុប្បន្នជនសង្ស័យ ត្រូវកម្លាំងនគរបាលឃុំខ្លួន ដើម្បីស្រាវជ្រាវបន្ត រកដើមហេតុច្បាស់លាស់សិនពី ព្រោះករណីនេះ ស្ថិតក្នុងភាពអាថ៌កំបាំងនៅឡើយ៕
