ឃាត់ខ្លួនជនសង្ស័យឆក់ទូរស័ព្ទ ពីលក់ចំណីត្រី នៅសង្កាត់ប្ញស្សីកែវ

ភ្នំពេញ ៖ កម្លាំងនគរបាលខណ្ឌឫស្សីកែវ បានឃាត់ខ្លួនជនសង្ស័យម្នាក់ ក្រោយធ្វើសកម្មភាពឆក់ទូរស័ព្ទ ពីលក់ចំណីត្រី កាលពីថ្ងៃទី២១ ខែមករា ឆ្នាំ២០២៥ វេលាម៉ោង ១៨ និង ៥៦ នាទី នៅចំណុច ផ្លូវបេតុង ក្រុមទី៧ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ។
លោកវរសេនីយ៍ឯក ហ៊ាង ថារ៉េត អធិការខណ្ឌប្ញស្សីកែវ បានអោយដឹងថា ជនរងគ្រោះឈ្មោះ ហួរ គឹមអូន ភេទប្រុស អាយុ ១៨ឆ្នាំ មុខរបរលក់ចំណីត្រី មានទីលំនៅភូមិទួលថ្ងាន់ សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ ។
ចំណែកជនសង្ស័យ ឈ្មោះ ធាវី ផាត់យុត ភេទប្រុស អាយុ ២២ឆ្នាំ មុខរបរគ្មាន មានទីលំនៅផ្ទះលេខ៨៩ ភូមិស្ពានខ្ពស់ សង្កាត់គម៦ ខណ្ឌឫស្សីកែវ រាជធានីភ្នំពេញ (ឃាត់ខ្លួន មានសារធាតុញៀន) ។
សម្ភារៈដកហូត៖ ១-ម៉ូតូមួយគ្រឿងម៉ាក Honda Scoopy ពណ៌ខ្មៅ ពាក់ផ្លាកលេខ ភ្នំពេញ 1KY-0982 (មធ្យោបាយធ្វើសកម្មភាព) និងទូរស័ព្ទមួយគ្រឿងម៉ាក Oppo A55 ពណ៌ខ្មៅ (ជារបស់ជនរងគ្រោះ) ។
ដំណើររឿងហេតុ៖ នៅថ្ងៃទី២១ ខែមករា ឆ្នាំ២០២៥ វេលាម៉ោង ១៨ និង ៥៥នាទី ជនរងគ្រោះជិះកង់លក់ចំណីត្រី ពេលមកដល់ចំណុចកើតហេតុ ស្រាប់តែមានជនសង្ស័យម្នាក់ជិះម៉ូតូមួយគ្រឿងម៉ាក Honda Scoopy ពណ៍ខ្មៅ មកធ្វើជាទិញចំណីត្រីពីជនរងគ្រោះ បន្ទាប់មកជនសង្ស័យបានសុំខ្ចីទូរស័ព្ទរបស់ជនរងគ្រោះ ថាទាក់ទងទៅបងសួរថា ទិញចំណីត្រីប៉ុន្មាន ភ្លាមនោះជនរងគ្រោះបានដកទូរស័ព្ទចេញមកហើយអោយជនសង្ស័យហៅលេខទូរស័ព្ទ ស្រាប់តែជនសង្ស័យបានធ្វើសកម្មភាពឆក់យកទូរស័ព្ទរបស់ជនរងគ្រោះនរួចជិះម៉ូតូគេចខ្លួនបាត់តែម្តង ។
ក្រោយកើតហេតុជនរងគ្រោះ បានមកដាក់ពាក្យបណ្តឹងនៅប៉ុស្តិ៍ឫស្សីកែវ បន្ទាប់មកកម្លាំងជំនាញខណ្ឌ-ប៉ុស្តិ៍បានបើកការស្រាវជ្រាវ កំណត់អត្តសញ្ញាណរបស់ជនសង្ស័យ លុះដល់ថ្ងៃទី២៣ ខែមករា ឆ្នាំ២០២៥ វេលាម៉ោង១៩ និង០០នាទី នៅចំណុចផ្លូវបេតុង ភូមិស្ពានខ្ពស់ សង្កាត់គម៦ ខណ្ឌឫស្សីកែវ កម្លាំងជំនាញខណ្ឌ-ប៉ុស្តិ៍ ឃាត់បានជនសង្ស័យ រួមនឹងវត្ថុតាងខាងលើ នាំមកកាន់ប៉ុស្តិ៍ឫស្សីកែវ ដើម្បីធ្វើការសាកសួរយកចម្លើយ កសាងសំណុំរឿងបញ្ចូនទៅសាលាដំបូងរាជធានីភ្នំពេញ ចាត់ការតាមច្បាប់។ដោយឃើញនូវភាពជាក់ស្តែង ចំពោះជីវភាពរបស់ជនរងគ្រោះ លោកអធិការខណ្ឌ បានឧបត្ថម្ភនូវ ៖ មី ទឹកសុទ្ធ ទឹកក្រូចស៊ីវអ៊ីវ ទឹតត្រី អង្ករ និងថវិកាមួយចំនួនផងដែរ ៕