លោកជំទាវបណ្ឌិត ពេជ ចន្ទមុន្នី៖ សប្បុរសជនបរិច្ចាគជូនមូលនិធិគន្ធបុប្ផា មិនត្រឹមជួយសង្គ្រោះជីវិតមនុស្សប៉ុណ្ណោះទេ ថែមទាំងជួយរក្សា និងបង្កើតធនធានមនុស្សសម្រាប់កម្ពុជា
ភ្នំពេញ៖លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា បានបន្តអំពាវនាវដល់សប្បុរសជន សូមបន្តបរិច្ចាគដល់មន្ទីរពេទ្យគន្ធបុប្ផា ដើម្បីរួមគ្នាជួយសង្រ្គោះជីវិតកុមារកម្ពុជា ដែលជាធនធានដ៏សំខាន់សម្រាប់ប្រទេសជាតិនាពេលអនាគត។
ក្នុងឱកាសអញ្ជើញសំណេះសំណាលជាមួយគណៈគ្រប់គ្រង គ្រូពេទ្យ និងបុគ្គលិកពេទ្យ នៃមន្ទីរពេទ្យគន្ធបុប្ផា នាថ្ងៃទី២៣ ខែមករា ឆ្នាំ២០២៥នេះ លោកជំទាវបណ្ឌិត បានថថ្លែងថា ក្នុងមួយឆ្នាំៗ មន្ទីរពេទ្យគន្ធបុប្ផារាប់លាននាក់ ត្រូវបាន និងកំពុងជួយសង្រ្គោះដោយមន្ទីរនេះ។ ដូច្នេះហើយការជួយដល់មន្ទីរពេទ្យគន្ធបុប្ផានេះ មិនត្រឹមតែចូលរួមជួយសង្រ្គោះជីវិតមនុស្សម្នាក់ ជីវិតទារកម្នាក់ ជីវិតកុមារម្នាក់ទេ គឺទាំងអស់គ្នានេះ កំពុងតែចូលរួមជួយរក្សាទុក និងបង្កើតធនធានមនុស្ស ដើម្បីជួយដល់ប្រទេសកម្ពុជាយើងទៅថ្ងៃក្រោយ។
លោកជំទាវបណ្ឌិតមានប្រសាសន៍យ៉ាងដូច្នេះថា «ការជួយរបស់យើងទាំងអស់គ្នា គឺមិនមែនកំពុងជួយដល់ជីវិតមនុស្សទេ គឺកំពុងជួយដល់ធនធាន ពីព្រោះថាទារក និងកុមារទាំងអស់នេះនៅពេលដែលធំឡើង ពេលខ្លះក៏គាត់ក្លាយជាដឹកនាំមួយទៅថ្ងៃក្រោយ»។
លោកជំទាវជឿជាក់ថា ចលនានៃការបរិច្ចាគដោយទឹកចិត្តសប្បុរស និងប្រកបក្តីមេត្តាពីសំណាក់ក្រុមហ៊ុន សហគ្រាស និងសប្បុរសជននានា ព្រមទាំងកិច្ចខំប្រឹងប្រែងពីសំណាក់គណៈគ្រប់គ្រង លោកគ្រូពេទ្យ អ្នកគ្រូពេទ្យ និងបុគ្គលិកទាំងអស់ នឹងនៅតែបន្តជាប់ជាប្រចាំ និងកាន់តែផុសផុលថែមទៀត ដើម្បីនាំភាពញញឹម និងក្តីសង្ឃឹមដល់ទារក និងកុមារកម្ពុជា ក្រោមដ៏ត្រជាក់នៃសុខសន្តិភាពនៅកម្ពុជា។
សូមជម្រាបថា ក្នុងឆ្នាំ២០២៤ មន្ទីរពេទ្យគន្ធបុប្ផា បានពិនិត្យ និងព្យាបាលទារក និងកុមារចំនួនប្រមាណ ១,២លានករណី ព្រមទាំងស្រ្តីមានផ្ទៃពោះចំនួន ១០៥ ៣៩៦ ករណី។
ក្នុងមួយឆ្នាំៗ មន្ទីរពេទ្យគន្ធបុប្ផាត្រូវការថវិកាជាមធ្យមប្រមាណ ៤២ លានដុល្លារអាមេរិក សម្រាប់ចំណាយលើការរក្សានិរន្តរភាពនៃកិច្ចដំណើរការ ក្នុងការផ្ដល់សេវាពិនិត្យ និងព្យាបាលទារក និងកុមារ ព្រមទាំងស្រ្តីមានផ្ទៃពោះ ដោយឥតគិតថ្លៃ ប្រកបដោយគុណភាព និងមិនមានការរើសអើង។
* សម្រាប់លិខិតថ្លែងអំណរគុណ បន្ទាប់ពីសប្បុរសជនបានបរិច្ចាគរួចរាល់ សូម Print Screen ចំនួនទឹកប្រាក់ដែលបរិច្ចាគ រួចផ្ញើទៅកាន់គ្រុប CoolApp របស់មូលនិធិគន្ធបុប្ផាកម្ពុជា តាមរយៈលីងខាងក្រោម៖
https://group.coolapp.chat/#CjQKIFGEaHdDE-hKi_3B3mGAfOa5LAgN-C9eg5k14PC8yRikEhDu7etYndSQUVOkD1ybmSLN
ស្កេន: QR Code ដែលបានភ្ជាប់ជូននៅខាងក្រោម ឬទាក់ទងលេខ៖ 016 808 905 , 061 70 1111