សម្តេចមហាបវរធិបតី៖មិនមែនស្នេហាជាតិ តែអស់លោកឯងទេ ត្រកូល «ហ៊ុន» ក៏ស្នេហាជាតិដែរ

ភ្នំពេញ៖សម្ដេចមហាបវធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានមានប្រសាសន៍ថា មិនមិនមែនស្នេហាជាតិ តែអស់លោកឯងទេ ត្រកូល «ហ៊ុន» ក៏ស្នេហាជាតិដែរ។ សម្ដេចបានបញ្ជាក់ច្បាស់ៗថា តាំងពី២០០៨មក ពេលដែលមានបញ្ហារឿងព្រំដែន មិនដែលឃើញមុខអ្នកប្រកាសថា ស្នេហាជាតិនោះចូលមក ផ្ទុយទៅវិញឃើញតែមុខត្រកូល «ហ៊ុន» គឺសម្ដេចតេជោ ដែលចេញមុខការពារទឹកដីនាពេលនោះ។
ការថ្លែងរបស់សម្ដេចមហាបវរធិបតី បែបនេះបានធ្វើឡើងនៅក្នុងឱកាសដែលសម្ដេច អញ្ជើញចែកសញ្ញាបត្រជូននិស្សិតសាកលវិទ្យាល័យអាស៊ីអឺរ៉ុប ចំនួន ២,៥៥១នាក់ នាព្រឹកថ្ងៃទី១៩ ខែកុម្ភៈ ឆ្នាំ២០២៤។
សម្ដេចនាយករដ្ឋមន្រ្តី បានបញ្ជាក់ថា ឆ្នាំ២០០៨ ឈានដល់ឆ្នាំ២០១១ ក្នុងគ្រាប៉ះគ្នាជាមួយប្រទេសថៃនៅព្រះវិហារ នាពេលនោះ ប្រជាពលរដ្ឋចូលរួមជាមួយរដ្ឋាភិបាល ហើយសម្ដេចតេជោបញ្ជាផ្ទាល់ ក្នុងនាមជានាយករដ្ឋមន្រ្តី, ហើយសម្ដេចមហាបវរធិបតី ពេលនោះទោះមិនមែនជាមេបញ្ជាការរងកងទ័ពជើងគោក ក៏ជាមួយផ្នែកតូច ដែលបានចេញមុខចូលរួមដោះស្រាយផ្ទាល់ក្នុងសមរភូមិ នាគ្រានោះដែរ។
ក្នុងនាមជាអ្នកដែលបានចុះធ្វើការផ្ទាល់ជាមួយកងទ័ព នៅក្នុងសមូរភូមិនោះ សម្ដេចមហាបវរធិបតី បានមានប្រសាសន៍ឱ្យដឹងថា៖ «២០០៨ផ្ទុះអាវុធ ពេលនោះរដ្ឋាភិបាលសម្ដេចតេជោ ដឹកនាំបញ្ជូនកម្លាំងយើងទៅ រួមនឹងកងពល៤២ ខ្ញុំឡើងទៅដល់នោះ ខ្ញុំឡើងពេលដែលគ្រាប់កំពុងតែរង្គើ ខ្ញុំបញ្ជូនកម្លាំងពីអង្គភាពរបស់ខ្ញុំខាងទ័ពពិសេសឡើងទៅ ខ្ញុំទៅផ្ទាល់ជាមួយទីបញ្ជាការជួរមុខនៅសម្រោង ទៅដល់តែប៉ុន្មានគីឡូពីភ្នំហ្នឹងទេ អាBM ដំបូងកាំភ្លើងធំថៃចេញមក បន្ទាប់មកBM យើងចេញទៅឡើងរង្គើដី។ ខ្ញុំឃើញទាហានដែលរបួសស្លាប់នៅសមរភូមិ ខ្ញុំឃើញជនភៀសខ្លួនដែរ វេទនាជម្លៀសចេញទៅនៅក្នុងជំរំ វេទនាណាស់។ អ្នកទាំងអស់គ្នាដែលថាស្នេហាជាតិ នៅឯណាពេលនោះ? មិនត្រឹមតែមិនជួយទេ កាលណោះអតីតសង្រ្គោះជាតិ លោក សុន ឆៃ ពេលដែលយើងទូទាំងប្រទេសអបអរសាទរដាក់ប្រាសាទព្រះវិហារ ក្នុងបេតិកភណ្ឌ លោក សុន ឆៃ ចេញទៅសម្ភាសន៍ថាគាត់មិនអបអរទេ ថាអាហ្នឹងគឺជាល្បិចស្មោកគ្រោករបស់គណបក្សប្រជាជន ចចារជាមួយថៃរឿងផលប្រយោជន៍សេដ្ឋកិច្ចឯណាឆ្កុយទៅវិញ»។
តាមរយៈរឿងរ៉ាវបែបនេះហើយ ទើបសម្ដេចបានចោទជាសំណួរថា៖ « ក្នុងនាមខ្ញុំជាមេបញ្ជាការរងកងទ័ពជើងគោកពេលនោះ ដឹកនាំប្រជុំជាមួយមេជើងគោកថៃនៅជាំ ដើម្បីផ្អាកការវាយគ្នា ខ្ញុំក្នុងនាមជាមេបញ្ជាការរងកងទ័ពជើងគោកពេលហ្នុង ជាមួយឯកឧត្តម ស្រី ឌឹក ចចារជាមួយដើម្បីផ្អាកការប្រយុទ្ធគ្នា ខ្ញុំក៏បានចូលរួមមួយផ្នែកតូចដែរ អស់លោកដែលជេខ្ញុំថា អាក្បត់ជាតិហ្នឹងនៅឯណាពេលនោះ? មិនមែនស្នេហាជាតិ តែអស់លោកឯងទេ ខ្ញុំក៏ស្នេហាជាតិ ត្រកូលខ្ញុំ គ្រួសារខ្ញុំ ឪខ្ញុំ ក៏ស្នេហាជាតិដែរ ដាក់ចេញនយោបាយឈ្នះ ឈ្នះ បញ្ចប់សង្រ្គាមជាង៥០០ឆ្នាំ ដែលរ៉ាំរ៉ៃជីវិតប្រជាពលរដ្ឋ ហ្នឹងហើយបើមិនស្នេហាជាតិ តើស្អីទៀត?»។
សម្ដេចតេជោ ជាមួយប្រតិបត្តិករ ថ្នាក់ដឹកនាំទាំងអស់រាជរដ្ឋាភិបាលកសាងពង្រឹងគ្រប់វិស័យ រួមទាំងវិស័យអប់រំ ដែលមានវត្តមាននាពេលនេះ បើមិនស្នេហាជាតិ ចាំបាច់ឱ្យកូនខ្មែររៀនចេះដឹងធ្វើអី? ដើម្បីឱ្យខ្មែរចេះដឹង ខ្មែរយើងអាចម្ចាស់ការដឹកនាំប្រទេស នឹងហើយគឺស្នេហាជាតិនោះ។ នេះបើតាមប្រសាសន៍សម្ដេចមហាបវធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។
សម្តេចមហាបវរធិបតី ហ៊ុន ម៉ាណែត បានបង្ហាញឱ្យឃើញថា រាល់ពេលមានបញ្ហាទឹកដី ជាក់ស្តែងពេលមានជម្លោះជាមួយប្រទេសថៃ និងបញ្ហា Covid-19 នាពេលកន្លងទៅគឺ មិនដែលឃើញមុខអ្នកនយោបាយអួតថាស្នេហាជាតិនៅក្រៅប្រទេសនោះទេ គឺមានតែមុខត្រកូល «ហ៊ុន»ហ្នឹងឯងដែលតែងតែឈនៅជាមួយប្រជាពលរដ្ឋគ្រប់ពេល គ្រប់កាលៈទេសៈ មិនដែលរត់យករួចខ្លួនមួយពេលណាឡើយ។ ជាមួយគ្នានេះសម្តេចនាយករដ្ឋមន្រ្តី ក៏បានអំពាវនាវផងដែរថា កម្ពុជា មានបទពិសោធន៍ឆ្នាំ២០០៨ គ្រប់គ្រាន់ហើយ ដូច្នេះសូមកុំយករឿងនយោបាយបង្កើតជាបញ្ហារវាងប្រទេស និងប្រទេស៕