មន្ទីរសុខាភិបាលរាជធានីភ្នំពេញ បើកសន្និបាតបូកសរុបលទ្ធផលការងារ ប្រចាំឆ្នាំ២០២៤ និងទិសដៅការងារ ឆ្នាំ២០២៥

ភ្នំពេញ ៖ នៅព្រឹកថ្ងៃទី០២ ខែមេសា ឆ្នាំ២០២៥នេះ មន្ទីរសុខាភិបាល នៃរដ្ឋបាលរាជធានីភ្នំពេញ បានធ្វើពិធីបើកសន្និបាតបូកសរុបលទ្ធផលការងារ ប្រចាំឆ្នាំ២០២៤ និងទិសដៅការងារ ឆ្នាំ២០២៥ ក្រោមវត្តមានលោក អ៉ីមរ៉ន ហាស្សាន់ អភិបាលរងរាជធានីភ្នំពេញ តំណាងឯកឧត្ដមឃួង ស្រេង អភិបាល នៃគណៈអភិបាលរាជធានីភ្នំពេញ និងសមាជិកក្រុមប្រឹក្សារាជធានីភ្នំពេញ ដោយបានធ្វើឡើងនៅសាលារាជធានីភ្នំពេញ។
ក្នុងពិធីបើកសន្និបាតឯកឧត្ដម អ៉ីមរ៉ន ហាស្សាន់ បានមានប្រសាសន៍លើកឡើងថា៖ តាមរយៈសមិទ្ធផលការងារ ឆ្នាំ២០២៤ របស់មន្ទីរសុខាភិបាល នៃរដ្ឋបាលរាជធានីភ្នំពេញ គឺពិតជាបានបង្ហាញអោយឃើញពីភាពរីកចម្រើន លើវិស័យសុខាភិបាល នៅរាជធានីភ្នំពេញ គួរឲ្យកត់សំគាល់ ទាំងលើការផ្តល់សេវា ក៏ដូចជាផ្នែកហេដ្ឋារចនាសម្ព័ន្ធរូបវ័ន្តផងដែរ ជាក់ស្តែងយើងបានឃើញថា ការសំរាលកូននៅមូលដ្ឋានសុខាភិបាលសាធារណៈ ការផ្តល់សេវាពន្យារកំណើត ការពិនិត្យផ្ទៃពោះ មុនសំរាល ដោយបុគ្គលិកសុខាភិបាល កុមារអាយុ ក្រោម១ឆ្នាំ ទទួលថ្នាំបង្ការជំងឺរបេង និងវ៉ាក់សាំងការពារជំងឺកញ្ជ្រោល បានកើនឡើងជាលំដាប់។ ការគ្រប់គ្រងសេវាសុខាភិបាលឯកជន និងឱសថស្ថានឯកជនត្រូវបានពង្រឹង ឱសថស្ថាន-ឱសថស្ថានរងមន្ទីរពហុព្យាបាល មន្ទីរសំរាកព្យាបាល និងបន្ទប់ពិគ្រោះព្យាបាល ជំងឺត្រូវបានត្រួតពិនិត្យជាទៀងទាត់រៀងរាល់ខែ។ ការរីកចម្រើនទាំងអស់នេះ គឺច្បាស់ណាស់ កើតចេញមកពីកិច្ចសហការល្អរវាងក្រសួងសុខាភិបាល រដ្ឋបាលរាជធានីភ្នំពេញ អាជ្ញាធរខណ្ឌ-សង្កាត់ និងអង្គការដៃគូអភិវឌ្ឍន៍វិស័យសុខាភិបាលនានា ដែលជាកត្តាដ៏សំខាន់ក្នុងការអភិវឌ្ឍន៍វិស័យសុខាភិបាលនៅក្នុងរាជធានីភ្នំពេញ។
ក្នុងឱកានោះដែរលោក ងី មានហេង ប្រធានមន្ទីរសុខាភិបាលនៃរដ្ឋបាលរាជធានីភ្នំពេញ បានលើកឡើងថា៖ មន្ទីរសុខាភិបាលនៃរដ្ឋបាលរាជធានីភ្នំពេញ មានមន្ទីរពេទ្យបង្អែករាជធានីភ្នំពេញ១ ការិយាល័យស្រុកប្រតិបត្តិចំនួន ០៧ ដែលមានមន្ទីរពេទ្យបង្អែកកម្រិត CPA1 ចំនួន ០៧ មណ្ឌលសុខភាពចំនួន៤៦ និងប៉ុស្តិ៍សុខភាព ចំនួន ៥ទីតាំង និងមានមន្ត្រី និងបុគ្គលិកសុខាភិបាលចំនួន ១.៣៨៤រូប (ស្ត្រីចំនួន ៧៨៩រូប)។ មូលដ្ឋានសុខាភិបាលសាធារណៈនៅរាជធានីភ្នំពេញ មានគ្រែសរុបចំនួន ៤៥៤គ្រែ បានទទួល ពិនិត្យពិគ្រោះជំងឺជូនប្រជាពលរដ្ឋចំនួនសរុប៤៧០.៩៥៤ករណី។
លោក ងី មានហេង បានបញ្ជាក់ថា នៅក្នុងឆ្នាំ២០២៤ រាជធានីភ្នំពេញ ទទួលបានជោគជ័យលើការអនុវត្តសកម្មភាពឆ្លើយតបទៅ នឹងគោលដៅសកលនៃជំងឺអេដស៍ ពោលគឺ ៩៥%ទី១ ដោយសម្រេចបាន១២១% ៩៥% ទី២ សម្រេច បាន ៩៩% និង៩៥%ទី៣ សម្រេចបាន ៩៩%។
មណ្ឌលសុខភាពចំនួន៤៥ និងមន្ទីរពេទ្យបង្អែកចំនួន០៨ បាននឹងកំពុងផ្តល់សេវាពិនិត្យ ព្យាបាលជំងឺរបេងតាមរយៈដូតស៍សហគមន៍ ចំណែកឯការអនុវត្តសកម្មភាពកម្មវិធីរបេង-អេដស៍ មាននៅគ្រប់ស្រុកប្រតិបត្តិទាំងអស់។ រីឯជំងឺគ្រុនឈាមរាយការណ៍សរុបមានចំនួន ២,៦៥៤ករណី និងករណីស្លាប់ចំនួន០១នាក់។ ប្រជាពលរដ្ឋដែលមាន អាយុចាប់ពី៤០ឆ្នាំឡើង ទៅរស់នៅក្នុងតំបន់គ្របដណ្តប់របស់មណ្ឌលសុខភាព បានទទួលសេវា ពិនិត្យស្រាវជ្រាវរកជំងឺទឹកនោមផ្អែម និងជំងឺលើសសម្ពាធឈាមមានចំនួន ១៩.៨៧២នាក់ (ស្រី ចំនួន ១៣.៣១៤នាក់)។ ក្នុងចំណោមប្រជាជនទាំងនោះ បានរកឃើញអ្នកជំងឺដែលបានធ្វើរោគវិនិច្ឆ័យ ថាមានទាំងជំងឺទឹកនោមផ្អែម និងលើសសម្ពាធឈាមមានចំនួន ៩.០១៥នាក់ អ្នកមានតែជំងឺទឹក នោមផ្អែមមានចំនួន ៣.៥៨០នាក់ និងអ្នកដែលរកឃើញថាមានជំងឺលើសសម្ពាធឈាមសរុបចំនួន ៣.៨៦៩ នាក់។
ដោយឡែក ចំពោះការស្រាវជ្រាវរកជំងឺមហារីកសុដន់ នៅក្នុងឆ្នាំ២០២៤ បានរកឃើញស្ត្រី មានបញ្ហាមានដុំដោះចំនួន ១៦នាក់ ស្មើនឹង០,០៣% និងបានបញ្ជូនទៅស្រាវជ្រាវបន្តទៀតនៅមន្ទីរ ពេទ្យថ្នាក់ជាតិមានចំនួន ០៧នាក់។ រីឯទីតាំងផ្តល់សេវាពិនិត្យស្រាវជ្រាវ និងព្យាបាលជំងឺមហារីក មាត់ស្បូនមានចំនួន ៣៤កន្លែង ក្នុងនោះនៅមន្ទីរពេទ្យបង្អែក ចំនួន០៨កន្លែង និងមណ្ឌលសុខភាព ចំនួន ២៧កន្លែង។
ភ្ជាប់ជាមួយគ្នានឹងសកម្មភាពការងារនៅមន្ទីរពេទ្យ និងមណ្ឌលសុខភាព មន្ទីរក៏បានសម្រប សម្រួលរៀបចំកិច្ចប្រជុំប្រចាំខែ រវាងក្រុមការងារបច្ចេកទេសសុខាភិបាលថ្នាក់រាជធានី ជាមួយនឹង អង្គការដៃគូអភិវឌ្ឍន៍វិស័យសុខាភិបាលបានចំនួន ១២លើក និងបានសម្របសម្រួលឱ្យអង្គការ ដៃគូអភិវឌ្ឍន៍ចំនួន ១៥អង្គការ ចុះអនុស្សារណៈយោគយល់គ្នា (ទាំងថ្មី និងបន្ត) ជាមួយក្រសួង សុខាភិបាលផងដែរ។
មន្ទីរសុខាភិបាល នៃរដ្ឋបាលរាជធានីភ្នំពេញ បានគ្រប់គ្រង និងសម្របសម្រួលក្នុងការអនុញ្ញាតបើកថ្មី និងបន្តសុពលភាពនូវមន្ទីរពេទ្យឯកជន មន្ទីរសម្រាកព្យាបាល មណ្ឌលកែសម្ផស្ស មន្ទីរព្យាបាលមាត់ធ្មេញ មន្ទីរពិសោធន៍វេជ្ជសាស្ត្រ បន្ទប់ពិគ្រោះ ព្យាបាលជំងឺទូទៅ បន្ទប់ពិគ្រោះជំងឺមាត់-ធ្មេញ និងបន្ទប់ពិគ្រោះស្ត្រីមានផ្ទៃពោះ។ល។ គិតត្រឹមខែ ធ្នូឆ្នាំ២០២៤ ចំនួនមូលដ្ឋានសុខាភិបាលឯកជនមានចំនួនសរុប ៤,៤៤៦ កន្លែង (កម្រិតមន្ទីរសម្រាក ព្យាបាលចំនួន ៥៤៦កន្លែង (កើន៥៧កន្លែង ធៀបនឹងឆ្នាំ២០២៣) និងកម្រិតបន្ទប់ថែទាំ បន្ទប់ពិគ្រោះ ព្យាបាលជំងឺ ចំនួន ៣,៩០០កន្លែង (កើន៥៨១កន្លែង ធៀបនឹងឆ្នាំ២០២៣)។
ម្ចាស់ទីតាំងបានស្នើសុំបិទដោយស្មគ្រ័ចិត្តចំនួន២៨ទីតាំង និងទីតាំងចំនួន០៤ ត្រូវបានផ្អាក (សរុប ៣២ទីតាំង)។ថ្វីត្បិតតែយើងទទួលលទ្ឋផលជាវិជ្ជមានដូចបានរៀបរាប់ខាងលើក៏ដោយ ក៏នៅមានការងារ មួយចំនួនពុំទាន់សម្រេចបានតាមគោលដៅប្រចាំឆ្នាំ ដែលអាចមកពីកត្តាប្រឈមមួយចំនួនដូចជា៖
១. ធាតុវាស់វែងបានបំពេញទាំងស្រុង (Meet) នៅក្នុងស្តង់ដា CHAS មិនទាន់បានបំពេញគ្រប់។
២. ការរៀបចំនីតិវិធីប្រតិបត្តិស្តង់ដា (SoP) សម្រាប់ឆ្លើយតបនឹងធាតុវាស់វែងក្នុងស្តង់ដា CHAS នៅតាមមន្ទីរពេទ្យបង្អែក និងមណ្ឌលសុខភាព មិនទាន់បានល្អប្រសើរនៅឡើយ។
៣. ការអនុវត្តវិន័យការងារ និងវេនប្រចាំការបម្រើការងារនៅក្នុងមន្ទីរពេទ្យ និងមណ្ឌល សុខភាព ពុំទាន់បានល្អឥតខ្ចោះនៅឡើយ។
៤. ការរៀបចំពិធីសារគ្លីនិក (Clinical Protocol) សម្រាប់ប្រើប្រាស់នៅតាមមន្ទីរពេទ្យបង្អែក នៅមានខ្វះចន្លោះច្រើន។
៥. ការគ្រប់គ្រងស្ថិតិមូលដ្ឋានសេវាសុខាភិបាលឯកជននៅតាមមូលដ្ឋាន ក៏មិនទាន់បានគ្រប់ ជ្រុងជ្រោយនៅឡើយដែរ។
៦. ចំនួនអ្នកមកទទួលសេវាពិនិត្យ និងព្យាបាលនៅតាមមន្ទីរពេទ្យបង្អែក និងមណ្ឌលសុខភាពនៅមានចំនួនតិច។
ជាការសន្និដ្ឋានរួម សមិទ្ឋផលដែលមន្ទីរសុខាភិបាលនៃរដ្ឋបាលរាជធានីភ្នំពេញសម្រេចបាន ក្នុងឆ្នាំ២០២៤នេះ មានទំហំធំគួរជាទីមោទនៈ។ សូចនាករសំខាន់ៗកំពុងស្ថិតនៅក្នុងវឌ្ឍនភាព ហើយ កត្តាគន្លឹះដែលនាំឲ្យសំរេចបាននូវសមិទ្ធផលខាងលើគឺ៖ ដោយមានការគាំទ្រយ៉ាងរឹងមាំពីសំណាក់ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ សមិទ្ធផលទាំងនេះ កើតចេញពីស្មារតី នៃការទទួលខុសត្រូវរួមគ្នា និងសាមគ្គីភាពរវាងថ្នាក់ដឹកនាំ មន្ត្រីរាជការ បុគ្គលិកសុខាភិបាលគ្រប់ លំដាប់ថ្នាក់ ក្នុងការបំពេញតួនាទី-ភារកិច្ចរបស់ខ្លួនប្រកបដោយការទទួលខុសត្រូវខ្ពស់ និងមានការ ឧបត្ថម្ភគាំទ្រពីថ្នាក់ដឹកនាំក្រសួងសុខាភិបាល ថ្នាក់ដឹកនាំរដ្ឋបាលរាជធានីភ្នំពេញ និងកិច្ចសហការ គ្នាល្អពីអាជ្ញាធរមូលដ្ឋាន និងស្ថាប័នពាក់ព័ន្ធព្រមទាំងការចូលរួមពីសហគមន៍ និងដៃគូអភិវឌ្ឍន៍ ជាតិ អន្តរជាតិផងដែរ ៕