កម្ពុជាត្រៀមលើកយកហេតុផលមួយចំនួន តវ៉ាជាមួយអាមេរិកលើការដំឡើងពន្ធនាំចូល

ភ្នំពេញ៖កម្ពុជាបានត្រៀមលើកយកហេតុផលសំខាន់ៗមួយចំនួ ន ដើម្បីតវ៉ាជាមួយនឹងសហរដ្ឋអាមេរិក លើការដំឡើងពន្ធនាំចូលទំនិញរបស់កម្ពុជា រហូតដល់៤៩% ក្នុងនាមកម្ពុជា ជាប្រទេសសមាជិកអង្គការពាណិជ្ជកម្មពិភពលោក។ នេះបើតាមការបញ្ជាក់ឲ្យដឹងពីឯកឧត្ដម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម។
ឯកឧត្ដមថា អត្រាពន្ធដែលអាមេរិកថាកម្ពុជាដាក់ពន្ធលើទំនិញខ្លួន ៩៧% គឺមិនមានមូលដ្ឋានអំណះអំណាងជាក់ស្តែងទេ ជាស្តែងពន្ធដែលកម្ពុជាយកដាក់លើអាមេរិក ជាមធ្យមត្រឹមតែ ២៩.៤%។ ចំណែកការទាមទារឱ្យជញ្ជីងពាណិជ្ជកម្មរវាងប្រទេសទាំងពីរ មានតុល្យភាពនោះ គឺមិនអាចធ្វើទៅរួចឡើយ ព្រោះតែអាមេរិក ជាប្រទេសមានប្រជាជនច្រើន មានតម្រូវច្រើន សេដ្ឋកិច្ចធំ តែសម្រាប់កម្ពុជាមានប្រជាជនតែ ១៧លាននាក់ប៉ុណ្ណោះ សេដ្ឋកិច្ចតូច។
នៅថ្ងៃទី០៣ ខែមេសា ឆ្នាំ២០២៥នេះ ឯកឧត្ដមប៉ែន សុវិជាតិ បានបញ្ជាក់ថា «រាជរដ្ឋាភិបាល និងក្រសួងពាណិជ្ជកម្ម មិនព្រងើយកន្ដើយ ចំពោះបញ្ហានេះទេ យើងនឹងខិតខំឲ្យអស់ពីកម្លាំងកាយចិត្ដ ដើម្បីការពារផ្ដល់ប្រយោជន៍ របស់ឧស្សាហកម្មនាំចេញ ក៏ដូចជាការពារផលប្រយោជន៍របស់កម្មករ-កម្មការិនី»។
ឯកឧត្ដម ប៉ែន សុវិជាតិ បានឲ្យដឹងទៀតថា ក្នុងនាមកម្ពុជា ជាប្រទេសសមាជិកអង្គការពាណិជ្ជកម្មពិភពលោក ដែលស្ថិតនៅក្នុងកម្រិតមួយ «ស្មើមុខស្មើមាត់» ជាមួយនឹងប្រទេសដទៃ គឺកម្ពុជាអាចប្រើយន្តការ ដូចនឹងប្រទេសដទៃ ដែលកំពុងអនុវត្ដ ឬក៏ធ្វើការសម្របសម្រួលជាទ្វេភាគី រវាងកម្ពុជា-អាមេរិក។
បន្ថែមពីនោះទៀត ឯកឧត្ដមប៉ែន សុវិជាតិ បានបញ្ជាក់ថា ក្រសួងពាណិជ្ជកម្មកំពុងតែធ្វើការសិក្សា ជាមួយនឹងស្ថាប័នពាក់ព័ន្ធ ទៅតាមអត្រាពន្ធនីមួយៗ ដើម្បីរកឃើញថា តើមានការជះឥទ្ធិពលប៉ុនណា លើឧស្សាហកម្មនាំចេញរបស់កម្ពុជា?
ឯកឧត្ដមប៉ែន សុវិជាតិ បានលើកឡើងថា ការសិក្សានេះនឹងធ្វើឲ្យកម្ពុជា ប្រមូលបាននូវទិន្នន័យជាក់ស្ដែង សម្រាប់ធ្វើការជជែកជាទ្វេភាគី ក៏ដូចជាការជជែក ក្នុងនាមប្រទេសជាដៃគូ ព្រោះថា កម្ពុជាជាប្រទេសសមាជិកអាស៊ាន ហើយអាមេរិក ក៏មានសកម្មភាពក្នុងនាមជាដៃគូពាណិជ្ជកម្មអាស៊ានផងដែរ។
សូមបញ្ជាក់ថា នៅព្រឹកថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសា នៅសហរដ្ឋអាមេរិក លោក ដូណាល់ ត្រាំ បានសម្រេច កំណត់ពន្ធគយ លើ ទំនិញ នាំ ចូល ពី កម្ពុជាប្រមាណ៤៩% ដែល កម្រិត ខ្ពស់ មួយ ដើម្បីជាការសងសឹក ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧%។
លោក ដូណាល់ ត្រាំ បានប្រកាសថា ការដំឡើងពន្ធនេះ នឹងចូលជាធរមាន នៅថ្ងៃទី៩ ខែមេសា ឆ្នាំ២០២៥ខាងមុខនេះ។ តាមរបាយការណ៍អគ្គនាយកដ្ឋានគយ និងរដ្ឋាករកម្ពុជា បានបង្ហាញថា នៅឆ្នាំ២០២៤ កម្ពុជា-អាមេរិក សម្រេចបានទំហំពាណិជ្ជកម្ម ១០.១៨ពាន់លានដុល្លារ កើនឡើង១១.២% ក្នុងនោះ កម្ពុជានាំចេញទៅអាមេរិក ក្នុងតម្លៃ ៩.៩ពាន់លានដុល្លារ កើនឡើង ១១.៤% ខណៈអាមេរិកនាំចូលកម្ពុជាវិញ ក្នុងតម្លៃ ២៦៤.១៤លានដុល្លារ។
តាមរយៈទិន្នន័យនេះ បានបង្ហាញថា សហរដ្ឋអាមេរិក គឺជាប្រទេសដែលនាំចូលទំនិញពីកម្ពុជាច្រើនជាងគេ បន្ទាប់ពីសហរដ្ឋអាមេរិក គឺវៀតណាម ចិន ជប៉ុន និងកាណាដា៕