រុស្ស៊ី គុយបា និងកូរ៉េខាងជើង ដូចជារួចផុតពីផលប៉ះពាល់ធ្ងន់ធ្ងរនៃចំណាត់ការពន្ធគយរបស់លោក ត្រាំ

វ៉ាស៊ីនតោន៖ក្នុងពេលដែលប្រធានាធិបតីអាមេរិក លោក ដូណាល់ ត្រាំ បានប្រកាសដាក់ពន្ធគយលើសម្ព័ន្ធមិត្ត និងគូប្រជែងជាច្រើន រួមទាំងបណ្តាប្រទេសនៅអឺរ៉ុប ឥណ្ឌា ជប៉ុន និងចិន ប្រទេសដែលកំពុងស្ថិតក្រោមទណ្ឌកម្មធ្ងន់ធ្ងរមួយចំនួនដូចជា រុស្ស៊ី បេឡារុស្ស គុយបា និងកូរ៉េខាងជើង ហាក់ដូចជាមិនបានរងផលប៉ះពាល់ខ្លាំងពីការដំឡើងពន្ធថ្មីនេះទេ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៣ ខែមេសា ឆ្នាំ ២០២៥។
ជាមួយនឹងពិភពលោក ដែលកំពុងព្រួយបារម្ភអំពីសង្គ្រាមពាណិជ្ជកម្ម លោក ត្រាំ បានដាក់ពន្ធ ១០% លើទំនិញភាគច្រើនដែលនាំចូលទៅសហរដ្ឋអាមេរិក។ ប្រទេសចិន ដែលជាអ្នកផ្គត់ផ្គង់ទំនិញដ៏ធំបំផុតទៅសហរដ្ឋអាមេរិក ឥឡូវនេះកំពុងប្រឈមមុខនឹងពន្ធ ៥៤% លើការនាំចេញទាំងអស់ ទៅកាន់ទីផ្សារប្រើប្រាស់ដ៏ធំបំផុតរបស់ពិភពលោក។ លោក ត្រាំ បានថ្លែងនៅពេលដែលលោកបង្ហាញអំពីពន្ធថ្មីនេះថា «នៅចំពោះមុខ សង្គ្រាម សេដ្ឋកិច្ច ដែល មិន ឈប់ឈរ សហរដ្ឋអាមេរិក មិន អាច បន្ត គោលនយោបាយ ចុះចាញ់ សេដ្ឋកិច្ច ឯកតោភាគី ទៀត ទេ»។
ទោះជាយ៉ាងណាក៏ដោយ ប្រទេសរុស្ស៊ី គុយបា និងកូរ៉េខាងជើង មិនមាននៅក្នុងបញ្ជីប្រទេសដែលត្រូវរងពន្ធខ្ពស់ជាងគេនោះទេ។ លេខាធិការសារព័ត៌មានសេតវិមាន លោកស្រី Karoline Leavitt បានពន្យល់ថា រុស្ស៊ីត្រូវបានលើកលែងដោយសារតែទំហំពាណិជ្ជកម្មទាបរវាងប្រទេសទាំងពីរ ហើយប្រទេសគុយបា បេឡារុស្ស និងកូរ៉េខាងជើង មិនត្រូវបានរាប់បញ្ចូលដោយសារតែពួកគេកំពុងស្ថិតក្រោមពន្ធគយ និងទណ្ឌកម្មខ្ពស់ស្រាប់ទៅហើយ។
គួរបញ្ជាក់ថា ទិន្នន័យបង្ហាញថា ពាណិជ្ជកម្មទំនិញរវាងរុស្ស៊ី និងអាមេរិកមានតម្លៃប្រហែល ៣,៥ ពាន់លានដុល្លារកាលពីឆ្នាំមុន ដែលធ្លាក់ចុះយ៉ាងខ្លាំងពី ៣៦ ពាន់លានដុល្លារក្នុងឆ្នាំ ២០២១ មុនពេលមានការឈ្លានពានអ៊ុយក្រែន។ សម្រាប់រុស្ស៊ី ហានិភ័យដ៏ធំបំផុតគឺការធ្លាក់ចុះនៃតម្រូវការសកលដែលអាចបណ្តាលមកពីសង្គ្រាមពន្ធដារទូលំទូលាយ ដែលអាចប៉ះពាល់ដល់តម្លៃប្រេង។ ធនាគារកណ្តាលរុស្ស៊ីក៏បានព្រមានអំពីលទ្ធភាពដែលសហរដ្ឋអាមេរិក និង OPEC អាចបង្កឱ្យមានការធ្លាក់ចុះតម្លៃប្រេងដូចក្នុងទសវត្សរ៍ឆ្នាំ ១៩៨០ ដែលនាំទៅដល់ការដួលរលំនៃសហភាពសូវៀតផងដែរ៕