កងទ័ពជើងទឹកកម្ពុជា នឹងមាននាវាចម្បាំង ២គ្រឿងឆាប់ៗនេះ ដើម្បីពង្រឹងសមត្ថភាពប្រតិបត្តិការកងទ័ពលើលម្ហសមុទ្រ

ព្រះសីហនុ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឱ្យដឹងថា កងទ័ពជើងទឹកកម្ពុជា នឹងទទួលបាននាវាចម្បាំង ចំនួន ២គ្រឿងឆាប់ៗនេះ ដើម្បីពង្រឹងសមត្ថភាពប្រតិបត្តិការកងទ័ពជើងទឹកកាន់តែល្អប្រសើរឡើង ក្នុងការការពារ រក្សាសន្តិភាព ស្ថិរភាព និងសន្តិសុខ ការគាំទ្រទៅដល់ប្រតិបត្តិការស្វែងរក និងសង្គ្រោះ ព្រមទាំងសកម្មភាពមនុស្សធម៌នៅលើលម្ហសមុទ្រ ហើយកម្ពុជាតែងស្វាគមន៍គ្រប់ភាគីទាំងអស់ដែលមានបំណងជួយកម្ពុជាពិតប្រាកដ មិនមែនមានតែភាគីចិននោះទេ។
ការឱ្យដឹងបែបនេះ របស់សម្តេចបវរធិបតី ហ៊ុន ម៉ាណែត បានធ្វើឡើងក្នុងឱកាសដែលសម្តេចបានអញ្ជើញសម្ពោធហេដ្ឋារចនាសម្ព័ន្ធនៅមូលដ្ឋានទ័ពរាមក្រោមជំនួយរបស់ចិន នៅខេត្តព្រះសីហនុ នាព្រឹកថ្ងៃទី០៥ ខែមេសា ឆ្នាំ២០២៥នេះ។
សម្តេចមហាបវរធិបតី ហ៊ុន ម៉ាណែត បានឱ្យដឹងយ៉ាងដូច្នេះថា៖ «កងទ័ពជើងទឹក ទៅថ្ងៃខាងមុខយើងនឹងមាននាវាចម្បាំង ២គ្រឿង ដើម្បីអាចល្បាត ការពាររាប់គីឡូដីពីនេះ ផ្តល់ព័ត៌មាន ខ្ញុំជឿជាក់ថា កងទ័ពជើងទឹក នាយនាវី នាយនាវីរង ពលនាវីទាំងអស់ ប្រាកដជាមានមោទនភាព ក្នុងការបង្កើនទំនើបកម្ម និងសមត្ថភាពកងទ័ពជើងទឹកយើងហើយ ខ្ញុំក៏មានមោទនភាពដែរ»។
សម្តេចមហាបវរធិបតី ហ៊ុន ម៉ាណែត បានគូសបញ្ជាក់ថា បើខ្មែរពិតប្រាកដ ជាអ្នកស្នេហាជាតិពិតប្រាកដ យើងគួរតែរួមគ្នាអបអរសាទរនូវបង្កើតសមត្ថភាពខឿនការពារជាតិ សមត្ថភាពកងទ័ព ការបង្កើនទំនើបកម្មវិស័យការពារជាតិ ដើម្បីការពារអធិបតេយ្យជាតិ បូរណភាពទឹកដី នៅក្នុងរយៈពេលវែង ។
ជាមួយនឹងការការធ្វើទំនើបកម្មវិស័យការពារជាតិកម្ពុជា ឱ្យកាន់ខ្លាំងក្លានោះ, សម្តេច នាយករដ្ឋមន្ត្រីនៃកម្ពុជា បានអះអាងថា រាជរដ្ឋាភិបាលកម្ពុជា នឹងមិនបញ្ឈប់ជាដាច់ខាតការពង្រឹងសមត្ថភាពកងទ័ព ដោយនឹងបន្តពង្រីកឱ្យកាន់តែទំនើបបន្ថែមទៀត ទាំងធនធានមនុស្សក្នុងវិស័យការពារជាតិ សម្ភារៈ បច្ចេកវិទ្យារបស់កងទ័ពជើងទឹកកម្ពុជាបន្ថែមទៀត។ ចំណុចនេះ គឺជាការប្តេជ្ញាចិត្តរបស់រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា។
សម្តេចមហាបវរធិបតី ហ៊ុន ម៉ាណែត បានបញ្ជាក់ថា ការការពារបូរណភាពទឹកដីកម្ពុជា មិនមែនធ្វើតែលើដែនដីគោកនោះទេ បើទោះបីជាដែនទឹកកម្ពុជា មានទំហំតូចក៏ដោយ។ កងទ័ពជើងទឹកកម្ពុជា នឹងអាចមានសមត្ថភាពដើម្បីចូលរួមថែរក្សាសន្តិសុខ សណ្តាប់ធ្នាប់ ការចេញល្បាតរួមគ្នានៅក្នុងតំបន់ ដែលចំណុចនេះហើយការពង្រឹងសមត្ថភាពកងទ័ពជើងទឹក ត្រូវតែធ្វើជាដាច់ខាត។
«ឥឡូវហៅទៅល្បាតរួមគ្នា អាតូចៗយើង ចេញទៅល្បាតមិនទាន់ ប៉ុន្តែ បើមាននាវចម្បាំង ២គ្រឿងនេះ កងទ័ពខ្មែរចេញទៅចូលរួមសមយុទ្ធ ចូលរួម ធ្វើប្រតិបត្តិការថែរក្សាសន្តិសុខ ស្មើរមុខ ស្មើរមាត់គ្នា អត់ខ្មាស់គេទេ។ រឿងជាកងទ័ពនរណាក៏ស្រឡាញ់យុទ្ធោបករណ៍ដែរ»។ នេះជាការលើកឡើងបន្ថែមរបស់សម្តេចបវរធិបតី ហ៊ុន ម៉ាណែត។
បន្ថែមពីនេះ សម្តេចបវរធិបតី ហ៊ុន ម៉ាណែត បានបន្តថា បើទោះបីជាកម្ពុជា ជាប្រទេសក្រីក្រ ប៉ុន្តែ កម្ពុជា បានប្រឹងប្រែងពង្រឹងសមត្ថភាពរបស់ខ្លួនលើគ្របវិស័យ។ ជាក់ស្តែងវិស័យការពារជាតិ គឺរាជរដ្ឋាភិបាល មិនទុកចោលនោះទេ ពោលគឺរាជរដ្ឋាភិបាលកម្ពុជា សហការគ្រប់ភាគីទាំងអស់ ដើម្បីបង្កើនសមត្ថភាពកងទ័ពជើងទឹក កងទ័ពជើងគោក កងទ័ពជើងអាកាស កងរាជអាវុធហត្ថ និងកម្លាំងនគរបាល ដែលសុទ្ធសឹងជាកម្លាំងស្នូលមានភារកិច្ចការពារជាតិ មាតុភូមិ និងប្រជាជន រាជរដ្ឋាភិបាលត្រូវតែខិតខំបង្កើនសមត្ថភាពជានិច្ច។
សម្តេចបវរធិបតី នាយករដ្ឋមន្ត្រីនៃកម្ពុជា បានថ្លែងថា ការពង្រឹងសមត្ថភាពកងទ័ព មិនមែនជាការរំលោភបំពានច្បាប់រដ្ឋធម្មនុញ្ញ និងធ្វើឱ្យបាត់បង់អធិបតេយ្យ ជាតិនោះទេ ប៉ុន្តែ ធ្វើឡើងដើម្បីការពារបូរណភាពទឹកដីកម្ពុជា ឱ្យកាន់តែរឹងមាំបន្ថែមទៀត។ កម្ពុជា ត្រូវពង្រឹងពង្រីកសមត្ថភាពធនធានមនុស្សនិងសម្ភារៈបច្ចេកទេស ដើម្បីឆ្លើយតបចំពោះគ្រោះមហន្តរាយផ្សេងៗ។ ក្នុងនោះ កងទ័ពជើងទឹក ត្រូវបង្កើនសមត្ថភាពដែនសមុទ្ររបស់ខ្លួន ហ្វឹកហ្វឺនបង្កើនសមត្ថភាពបំពេញបេសកកម្មការពារដែនសមុទ្រ និងប្រតិបត្តិការល្បាត រុករក និងសង្គ្រោះ។
សម្តេចបវរធិបតី ហ៊ុន ម៉ាណែត បានបន្ថែមថា ការបង្កើនសមត្ថភាពក្នុងការធ្វើប្រតិបត្តិការជាមួយកម្លាំងប្រដាប់អាវុធនៅក្នុងតំបន់ ហើយសមត្ថភាពជាមូលដ្ឋានដែលកងទ័ពជើងទឹកអាចបំពេញភារកិច្ចរបស់ខ្លួនបាន គឺការល្បាតជាប្រចាំនៅក្នុងដែនទឹក និងតាមបណ្ដាកោះ។ កងទ័ពជើងទឹកកម្ពុជា ក៏ត្រូវការបច្ចេកទេស និងជំនាញមួយចំនួនសម្រាប់ធ្វើប្រតិបត្តិការប្រឆាំងនឹងឧក្រិដ្ឋកម្មឆ្លងដែន និងការជ្រៀតចូលនៃអំពើភេរវកម្ម ហើយបច្ចេកទេស និងជំនាញទាំងនេះកំពុងត្រូវបានអភិវឌ្ឍជាបណ្តើរៗ ដោយមានការឧបត្ថម្ភគាំទ្រពីសំណាក់ដៃគូសន្តិសុខអន្តរជាតិ ជាពិសេសការជួយឧបត្ថម្ភពីសំណាក់មិត្តចិន ដែលមានសក្ខីភាពនៅទីនេះស្រាប់។
កម្ពុជាធ្លាប់រងការរិះគនលើមូលដ្ឋានកងទ័ពជើងទឹករាម ដែលគេចោទថាជាមូលដ្ឋាន របស់ កងទ័ពចិន ។ ទាក់ទិននឹងបញ្ហានេះ បានចេញមក បញ្ជាក់ថា រដ្ឋាភិបាលកម្ពុជា ជារដ្ឋអធិបតេយ្យដែលមានសិទ្ធិពេញលេញក្នុងការ កសាង និងលើកកម្ពស់កិច្ចសហប្រតិបត្តិការជាមួយដៃគូទាំងអស់ ដើម្បីបម្រើប្រយោជន៍ ឱ្យ ប្រទេសជាតិ និងប្រជាជន ហើយកិច្ចសហប្រតិបត្តិការទាំងអស់នោះសុទ្ធតែស្រប តាម គោលបំណង និងគោលការណ៍នៃរដ្ឋធម្មនុញ្ញរបស់កម្ពុជា។
រដ្ឋធម្មនុញ្ញ បានបញ្ជាក់យ៉ាងច្បាស់ហើយថា កម្ពុជាមិនអនុញ្ញាតឱ្យមានមូលដ្ឋានទ័ព បរទេសនៅលើទឹកដី របស់ខ្លួននោះទេ ហើយកម្ពុជា ក៏មិនបញ្ជូនទ័ពរបស់ខ្លួនឱ្យទៅចូលរួមនៅក្នុងជម្លោះនៅក្រៅប្រទេស ដែរ ក្រៅតែពីការចូលរួមដល់ការរក្សាសន្តិភាពពិភពលោក តាមរយៈប្រតិបត្តិការរក្សាសន្តិភាពរបស់អង្គការសហប្រជាជាតិ។
ក្រោមជំនួយឥតសំណងរបស់ ចិន កម្ពុជាបានបើកការដ្ឋានសាងសង់ សំណង់ នានា នៅ មូល ដ្ឋាន បញ្ជា ការដ្ឋាន កងទ័ព រាម កាលពីថ្ងៃទី៨ ខែមិថុនា ឆ្នាំ២០២២ ដែលមាន ការ ស្តារទីតាំង របស់កងទ័ពជើងទឹកដែលមានស្រាប់ កសាងរោងជាងជួសជុលនាវាអ៊ូ (Drydock) និងរ៉ៃ (Slipway) សង់ផែសំចត និងស្តារឃ្លង ដែលមានស្រាប់។ ជុំវិញរឿងនេះ ប្រមុខរាជរដ្ឋាភិបាលកម្ពុជា ក៏ធ្លាប់អះអាងថា ការអភិវឌ្ឍ មូលដ្ឋាន កង ទ័ពសមុទ្ររាម និងប្រភេទទ័ពផ្សេងទៀត គ្មានចេតនាផ្សេងក្រៅតែពី ដើម្បីពង្រឹងសមត្ថភាព ការពារជាតិ របស់កម្ពុជានោះទេ។
លោកស្រី ម៉ាលី សុជាតា អ្នកនាំពាក្យក្រសួងការពារជាតិ ធ្លាប់ឱ្យដឹងថា នាវាចម្បាំងថ្មីពិសេសប្រភេទ ០៥៦C ចំនួន ២គ្រឿងដែលចិនផ្តល់មកឱ្យកម្ពុជា គ្រោងនឹងរួចរាល់និងប្រគល់មកឱ្យកម្ពុជានៅឆ្នាំ២០២៥ ឬយូរជាងនេះ។ ការបញ្ជាក់របស់អ្នកនាំពាក្យក្រសួងការពារជាតិកម្ពុជារូបនេះបានធ្វើឡើងបន្ទាប់ពីមានកាសែតបរទេសមួយបានចុះផ្សាយព័ត៌មានថា រដ្ឋាភិបាលចិនត្រៀមផ្ទេរនាវាចម្បាំង ២គ្រឿងឱ្យកម្ពុជានៅមូលដ្ឋានកងទ័ពជើងទឹករាមក្នុងខេត្តព្រះសីហនុ៕