ប្រធានាធិបតីចិន លោក ស៉ី ជិនពីង នឹងបំពេញទស្សនកិច្ចនៅកម្ពុជា នាពាក់កណ្តាលខែមេសា ឆ្នាំ២០២៥

ភ្នំពេញ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ប្រធានាធិបតីចិន លោក ស៉ី ជិនពីង នឹងធ្វើដំណើរបំពេញទស្សនកិច្ចនៅកម្ពុជា នៅពាក់កណ្តាលខែមេសា ឆ្នាំ២០២៥នេះ។
សម្តេចមហាបវធិបតី ហ៊ុន ម៉ាណែត បានថ្លែងបែបនេះ នាឱកាសអញ្ជើញសម្ពោធដាក់ឱ្យប្រើប្រាស់ហេដ្ឋារចនាសម្ព័ន្ធនៅមូលដ្ឋានទ័ពរាម នៅថ្ងៃទី៥ ខែមេសា ឆ្នាំ២០២៥។
សម្តេចមហាបវធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ពិធីសម្ពោធថ្ងៃនេះ យើងធ្វើនៅក្នុងពេល ២សប្តាហ៍ទៀត ដែលថ្នាក់ដឹកនាំជាន់ខ្ពស់ចិន ឯកឧត្តម ស៉ី ជិនពីង នឹងមកធ្វើទស្សនកិច្ចជាផ្លូវការនៅកម្ពុជា។ នៅក្នុងគម្រោងទស្សនកិច្ចផ្លូវការ ៣ប្រទេស ម៉ាឡេស៊ី វៀតណាម និងកម្ពុជា ដែលបង្ហាញពីមិត្តភាពរឹងមាំកម្ពុជា-ចិន»។
ដំណើរទស្សនកិច្ចនេះ ត្រូវបានសម្តេចមហាបវរធិបតី ហ៊ុន ម៉ាណែត អះអាងថា ជាការពង្រឹងទំនាក់ទំនងកម្ពុជា-ចិន ឲ្យកាន់តែរឹងមាំថែមទៀត។
សូមជម្រាបថា ការបំពេញទស្សនកិច្ចជាផ្លូវរដ្ឋនៅតាមបណ្តាប្រទេសអាស៊ាន របស់ប្រធានាធិបតីចិននេះ ត្រូវបានគេមើលឃើញថា ជាកិច្ចខិតខំប្រឹងប្រែងដើម្បីពង្រឹងទំនាក់ទំនងជាមួយប្រទេសជិតខាង ចំពេលមានអស្ថិរភាពពិភពលោកកើនឡើងចាប់តាំងពីអាណត្តិទី២ នៃរដ្ឋបាលរបស់ប្រធានាធិបតី អាមេរិក លោក ដូណាល់ ត្រាំ។
បើតាមសារព័ត៌មាន South China Morning Post នៅថ្ងៃទី៣១ ខែមីនា ឆ្នាំ២០២៥ ដែលបានស្រង់ប្រភពពីមន្រ្តីការទូតចិន គឺទស្សនកិច្ចទៅកាន់ប្រទេសទាំងបីនេះ គឺជាទស្សនកិច្ចលើកដំបូងរបស់មេដឹកនាំកំពូលចិន មកកាន់អាស៊ីអាគ្នេយ៍នាឆ្នាំនេះ ក្នុងគោលបំណងពង្រឹងទំនាក់ទំនងជាមួយប្រទេសជិតខាង ស្របពេលតំបន់អាស៊ីអាគ្នេយ៍ កំពុងបារម្ភពីគោលនយោបាយការបរទេសរបស់អាមេរិកជុំវិញពន្ធគយ។
កាលពីឆ្នាំ២០១៦ លោកប្រធានាធិបតីចិន ស៉ី ជិនពីន ក៏ធ្លាប់បានធ្វើដំណើរមកដល់ប្រទេសកម្ពុជាម្តងហើយ នៅក្នុងដំណើរទស្សនកិច្ចនៅកម្ពុជា។ ភាគីទាំងបានចុះហត្ថលេខាលើគម្រោងជាច្រើន ដើម្បីជួយអភិវឌ្ឍកម្ពុជាផងដែរ។
បើគេរាប់ពីទំនាក់ទំនងកម្ពុជានិងចិននោះ ចំណងការទូតរវាងប្រទេសទាំងពីរ បានកើតឡើងតាំងពីឆ្នាំ២៤៣ មកម្ល៉េះ។ ប៉ុន្តែ ទំនាក់ទំនងទ្វេភាគីរបស់ប្រទេសទាំងពីរដ៏ស្អិតរមួត ចាប់ផ្តើមកើតឡើងនៅឆ្នាំ១៩៥៤ ក្រោយជំនួបរវាងអតីតព្រះមហាក្សត្រព្រះរាជាណាចក្រកម្ពុជា នរោត្តម សីហនុ និងអតីតនាយករដ្ឋមន្ត្រីសាធារណរដ្ឋប្រជាមានិតចិន ជូ អេនឡាយ។
ក្រោយទំនាក់ទំនងដ៏យូរអង្វែង កម្ពុជាដឹកនាំដោយអតីតសម្តេចនាយករដ្ឋមន្ត្រី ហ៊ុន សែន និងចិនដឹកនាំដោយប្រធានាធិបតី ស៊ី ជីនពីង បានសម្រេចដំឡើងទំនាក់ទំនងទ្វេភាគីដល់កម្រិតកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ នៅឆ្នាំ២០១០។ មានន័យថា ចិនគឺជាប្រទេសដំបូងបង្អស់ ដែលកម្ពុជាបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយជាមួយ។
លុះដល់ឆ្នាំ២០២៣ រាជរដ្ឋាភិបាលកម្ពុជា នីតិកាលទី៦ នៃរដ្ឋសភាក៏កើតឡើង ដែលកម្ពុជាដឹកនាំដោយសម្តេចនាយករដ្ឋមន្ត្រី ហ៊ុន ម៉ាណែត ប៉ុន្តែចិននៅតែបន្តដឹកនាំដោយប្រធានាធិបតី ស៊ី ជីនពីង ដដែល៕