លោក ស៊ី ជីនពីង ប្រកាសគាំទ្រកិច្ចអភិវឌ្ឍ ជាពិសេសគម្រោងព្រែកជីកហ្វូណនតេជោ ក្នុងជំនួបជាមួយមិត្តចាស់ដ៏ស្និទ្ធស្នាលសម្តេចតេជោនិងបង្ហាញក្តីរំភើបចំពោះការបដិសណ្ឋារកិច្ច

ភ្នំពេញ៖ក្នុងជំនួបជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែលជាមិត្តចាស់ដ៏ស្និទ្ធស្នាលនោះ លោក ស៊ី ជីនពីង ប្រធានាធិបតីចិន បានបង្ហាញក្តីរំភើបចំពោះការរៀបចំស្វាគមន៍ដំណើរទស្សនកិច្ចរបស់លោក។ បន្ថែមពីលើនោះលោកប្រធានាធិបតី ប្រកាសគាំទ្រដល់កិច្ចអភិវឌ្ឍន៍នៅកម្ពុជា ជាពិសេសគម្រោងព្រែកជីកហ្វូណនតេជោ។
នៅរសៀលថ្ងៃព្រហស្បតិ៍ ទី១៧ ខែមេសា ឆ្នាំ២០២៥នេះ សម្តេចតេជោ ហ៊ុន សែន និងលោក ស៊ី ជីនពីង បានជួបសម្តែងការគួរសម និងពិភាក្សាលើការងារមួយចំនួននៅវិមានសន្តិភាព។
លោក ជា ធិរិទ្ធ អ្នកនាំពាក្យព្រឹទ្ធសភា បានឱ្យដឹងថា ក្នុងជំនួបនេះសម្តេចតេជោ ហ៊ុន សែន ក្នុងនាមសម្តេចផ្ទាល់ ក៏ដូចជាប្រជាពលរដ្ឋខ្មែរទាំងមូល បានសម្តែងនូវការស្វាគមន៍យ៉ាងកក់ក្តៅចំពោះដំណើរទស្សនកិច្ចផ្លូវរដ្ឋរបស់លោកប្រធានាធិបតីចិនជាលើកទី២ ខណៈលើកទី១ធ្វើឡើងនៅឆ្នាំ២០១៦។
សម្តេចតេជោ ហ៊ុន សែន បានចាត់ទុកលោកប្រធានាធិបតី ស៊ី ជីនពីង ជាភ្ញៀវពិសេសសម្រាប់ឆ្នាំ២០២៥នេះ។ សម្តេចតេជោ ហ៊ុន សែន បានបញ្ជាក់ថា ការទទួលបដិសណ្ឋារកិច្ចដំណើរទស្សនកិច្ចរបស់លោក ស៊ី ជីនពីង ក៏មានលក្ខណៈពិសេសផងដែរ។
សម្តេចតេជោ ហ៊ុន សែន បានបញ្ជាក់ថា ដំណើរទស្សនកិច្ចរបស់លោកប្រធានាធិបតីនៅពេលនេះ គឺមានអត្ថន័យធំធេងណាស់ ជាពិសេសក្នុងពេលពិភពលោកស្ថិតក្នុងស្ថានភាពមួយឈានទៅរកសង្គ្រាមពាណិជ្ជកម្មបណ្តើរៗ។ សម្តេចតេជោ បានបញ្ជាក់ថា វត្តមានរបស់លោកប្រធានាធិបតី ស៊ី ជីនពីង នាពេលនេះ បានបង្ហាញនូវចំណងមិត្តភាពជាប្រពៃណីដ៏រឹងមាំ ពង្រឹងមិត្តភាពដែកថែប លើកកម្ពស់ទំនាក់ទំនងរវាងស្ថាប័នរដ្ឋ និងរដ្ឋ រវាងបក្ស និងបក្សឱ្យកាន់តែជិតស្និទ្ធមួយកម្រិតបន្ថែមទៀត។ ជាងនេះទៅទៀតសម្តេចតេជោ បានបញ្ជាក់ថា ឆ្នាំ២០២៥នេះ ជាខួប១៥ឆ្នាំ នៃការបង្កើតនូវទំនាក់ទំនងកម្ពុជា-ចិន ជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។
ក្នុងជំនួបនេះសម្តេចតេជោ ក៏បានលើកឡើងផងដែរថា លោក ស៊ី ជីនពីង ជាមិត្តចាស់ ជាមិត្តដ៏ធំបំផុត និងជាទីទុកចិត្តបំផុតរបស់កម្ពុជា ជាអ្នកគាំទ្រដ៏រឹងមាំរបស់កម្ពុជា ក៏ដូចជាគណបក្សប្រជាជនកម្ពុជា ដែលជាគណបក្សកាន់អំណាច៤៦ឆ្នាំកន្លងមកនេះ។
ក្នុងឱកាសនោះលោកប្រធានាធិបតី ស៊ី ជីនពីង បានបង្ហាញនូវក្តីរីករាយចំពោះការបានវិលត្រឡប់មកកាន់ប្រទេសកម្ពុជាជាថ្មី ដែលជាមិត្តចាស់របស់លោក ជាពិសេសបានជួបមិត្តចាស់ គឺសម្តេចតេជោ ហ៊ុន សែន។ លោកប្រធានាធិបតី ក៏បានបង្ហាញក្តីរំភើបចំពោះការរៀបចំបដិសណ្ឋារកិច្ចពីសំណាក់រាជរដ្ឋាភិបាលកម្ពុជា និងប្រជាជនកម្ពុជា។
លោកប្រធានាធិបតី បានបញ្ជាក់ថា នៅពេលរូបលោកធ្វើដំណើរចេញពីអាកាសយានដ្ឋានអន្តរជាតិភ្នំពេញ តាមដងផ្លូវលោកបានឃើញនូវការស្វាគមន៍របស់ប្រជាពលរដ្ឋខ្មែរ ហើយបានសម្លឹងឃើញនូវទឹកមុខប្រជាពលរដ្ឋកម្ពុជាពោរពេញដោយស្នាមញញឹម និងភាពរីករាយស្វាគមន៍រូបលោកចេញពីបេះដូង។
លោកប្រធានាធិបតី បានជម្រាបសម្តេចតេជោថា លោកពិតជារំភើបចំពោះការស្វាគមន៍ដ៏កក់ក្តៅពីសំណាក់រាជរដ្ឋាភិបាលកម្ពុជា និងប្រជាជនកម្ពុជានាពេលនេះ ដែលបង្ហាញឱ្យឃើញនូវចំណងមិត្តភាពដ៏រឹងមាំ មិត្តភាពដែកថែបរវាងប្រទេសទាំងពីរ ហើយក៏ជាការញ៉ាំងឱ្យមិត្តភាពនេះ កាន់តែរីកចម្រើនល្អប្រសើរបន្ថែមទៀត។
ក្នុងជំនួបនេះ សម្តេចតេជោ ហ៊ុន សែន ក៏បានលើកឡើងអំពីតួនាទីរបស់ចិន ដោយសម្តេចបានកោតសរសើរចំពោះតួនាទីរបស់ចិន ដែលជាតួនាទីស្ថាបនា និងសកម្មក្នុងការលើកកម្ពស់សន្តិភាព ការអភិវឌ្ឍន៍ប្រកបដោយចេរភាពជាសកល។
សម្តេចតេជោ ហ៊ុន សែន បានប្រកាសគាំទ្រនូវគំនិតផ្តួចផ្តើមនានារបស់ចិន ដូចជាគំនិតផ្តួចផ្តើម «ខ្សែក្រវាត់ និងផ្លូវ», គំនិតផ្តួចផ្តើមអភិវឌ្ឍន៍សាកល, គំនិតផ្តួចផ្តើមសន្តិសុខសាកល និងគំនិតផ្តួចផ្តើមអរិយធម៌សាកលជាដើម។ សម្តេចតេជោ បានបង្ហាញជំនឿយ៉ាងមុតមាំថា គំនិតផ្តួចផ្តើមទាំងនេះ នឹងរួមចំណែកថែរក្សាផលប្រយោជន៍សាកល អភិវឌ្ឍន៍សាកល និងពង្រឹងគោលដៅប្រកបដោយចេរភាពក្នុងឆ្នាំ២០៣០របស់អង្គការសហប្រជាជាតិ ដើម្បីថែរក្សាសន្តិភាព សន្តិសុខ និងភាពសុខដុម។
សម្តេចតេជោ ហ៊ុន សែន ក៏បានវាយតម្លៃខ្ពស់ចំពោះលទ្ធផលចំពោះកិច្ចសហប្រតិបត្តិការរវាងប្រទេសទាំងពីរ។ ជាពិសេសការប្រាស្រ័យទាក់ទងគ្នាជាញឹកញាប់គ្រប់កម្រិត និងគ្រប់វិស័យ ដែលជាការបង្ហាញឱ្យឃើញសាមគ្គីភាពជាប្រពៃណី និងបង្កើនការកសាងទំនុកចិត្តនយោបាយកម្រិតខ្ពស់បំផុតដោយឈរលើគោលការណ៍ស្មើភាពគ្នា គោរពផលប្រយោជន៍ស្នូលទៅវិញទៅមក និងប្រឆាំងរាល់ការជ្រៀតជ្រែកពីខាងក្រៅលើកិច្ចការផ្ទៃក្នុងរបស់ប្រទេសទាំងពីរ។
សម្តេចតេជោ ហ៊ុន សែន បានរំលេចបន្ថែមដោយស្នើភាគីចិនគាំទ្រការអភិវឌ្ឍន៍នៅកម្ពុជា ក៏ដូចជាការជួយជ្រោមជ្រែងបន្ថែមទៀត ក្នុងគោលដៅបម្រើដល់កិច្ចអភិវឌ្ឍន៍។ សម្តេចតេជោ ក៏បានស្នើភាគីកម្ពុជា និងចិន ពង្រឹងមិត្តភាពបន្ថែមទៀតទាំងនៅក្នុងក្របខណ្ឌបក្ស រដ្ឋាភិបាល និងប្រជាជន ដើម្បីផលប្រយោជន៍ប្រទេសទាំងពីរ។
សម្តេចតេជោ ហ៊ុន សែន ក៏បានស្នើចិនគាំទ្ររាល់គំនិតផ្តួចផ្តើមលើកិច្ចអភិវឌ្ឍន៍នានារបស់កម្ពុជា។
ឆ្លើយតបទៅនឹងអ្វីដែលសម្តេចតេជោ បានលើកឡើងខាងលើនេះ លោកប្រធានាធិបតីចិន បានប្រកាសគាំទ្ររាល់កិច្ចអភិវឌ្ឍន៍នៅកម្ពុជា ជាពិសេសគម្រោងព្រែកជីកហ្វូណនតេជោ ដែលកម្ពុជាកំពុងដំណើរការសាងសង់។
លោកប្រធានាធិបតីចិន ក៏បានប្រកាសដែរថា ភាគីចិន នឹងពង្រឹងទំនាក់ទំនងបន្ថែមទៀតជាមួយកម្ពុជា ទាំងក្របខណ្ឌបក្ស រដ្ឋាភិបាល ហើយរដ្ឋាភិបាលចិន នឹងជួយបណ្តុះបណ្តាលធនធានមនុស្សទាំងធនធានមនុស្សនៅក្នុងបក្សប្រជាជនកម្ពុជា និងធនធានមនុស្សនៅក្នុងរាជរដ្ឋាភិបាល ដើម្បីជាចំណែកចូលរួមកិច្ចអភិវឌ្ឍន៍នៅកម្ពុជា។
ឆ្លើយតបការប្រកាសគាំទ្រគម្រោងព្រែកជីកហ្វូណនតេជោពីសំណាក់ប្រធានាធិបតីចិននោះ សម្តេចតេជោ ហ៊ុន សែន បានសម្តែងនូវក្តីត្រេកអរយ៉ាងខ្លាំងចំពោះលោកប្រធានាធិបតី ដែលបានគាំទ្រចំពោះការកសាងព្រែកជីកហ្វូណនតេជោ។ សម្តេចតេជោ បានបញ្ជាក់ថា ព្រែកជីកហ្វូណនតេជោ ដើរតួនាទីសំខាន់ណាស់ក្នុងការដឹកជញ្ជូនផ្លូវទឹកនៅកម្ពុជា ហើយក៏ផ្តល់ចំណេញដល់ការអភិវឌ្ឍផ្នែកសេដ្ឋកិច្ចរបស់កម្ពុជាឱ្យកាន់តែល្អប្រសើរបន្ថែមទៀត៕