ប្រជាពលរដ្ឋខណ្ឌព្រែកព្នៅ សុំឲ្យអាជ្ញាធររាជធានី ជួយបង្ក្រាបគ្រឿងញៀន បង្ក្រាបក្រុមក្មេងទំនើងនិងល្បែងស៊ីសងគ្រប់ប្រភេទ
ភ្នំពេញ៖ ប្រជាពលរដ្ឋរខណ្ឌព្រែកព្នៅ បានស្នើឲ្យអាជ្ញាធររាជធានីភ្នំពេញ គណៈចុះពង្រឹងមូលដ្ឋាន និងកម្លាំងមានសមត្ថកិច្ច ជួយបង្ក្រាបក្រុមក្មេងទំនើង ល្បែងស៊ីសងគ្រប់ប្រភេទ និងការប្រើប្រាស់គ្រឿងញៀននៅក្នុងមូលដ្ឋាន ខណៈសព្វថ្ងៃ មានយុវជនប្រើប្រាស់ និងសេបគ្រឿងញៀនច្រើន ដែលធ្វើឲ្យពួកគាត់មានការព្រួយបារម្ភ អំពីបញ្ហាសន្តិសុខកើតមានដោយសារការប្រើប្រាស់គ្រឿងញឿននេះ។
លោក កែវ វណ្ណា តំណាងប្រជាពលរដ្ឋរស់នៅសហគមន៏អណ្តូង៤ សង្កាត់កោករការ ក៏ដូចប្រជាពលរដ្ឋ រស់នៅក្នុងសង្កាត់ផ្សេងៗទៀត បានលើកឡើងនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញអាណត្តិទី២ ស្ថិតក្នុងវត្តឈូកវ៉ា សង្កាត់កោករការ ខណ្ឌព្រែកព្នៅ កាលពីព្រឹកថ្ងៃទី០៤ វិច្ឆិកាថា បច្ចុប្បន្ននៅក្នុងសហគមន៏របស់ពួកគាត់ ក្រៅពីល្បែងស៊ីសង មានយុវជនប្រើប្រាស់ និងសេបគ្រឿងញៀនច្រើន។ លោក បន្តថា ការប្រើប្រាស់ ការជួញដូគ្រឿងញៀកើតមានច្រើននេះ ជាហេតុបង្ករឲ្យមានបទល្មើសផ្សេងៗ នៅតាមមូលដ្ឋានក្នុងភូមិ សង្កាត់ កើតមានជារៀងរាល់ថ្ងៃ ដូចជាចោរលួច ឆក់ និងគាស់ផ្ទះនៅពេលយប់ជាដើម។ ដូច្នេះ ដើម្បី បង្ការទប់ស្កាត់ និងបង្ក្រាបឲ្យបានទាន់ពេល ពួកគាត់សុំឲ្យអាជ្ញាធររាជធានី ពិសេសកងកម្លាំងមានសម្តថកិច្ច មេតាដោះស្រាយ និងចាត់វិធានការអំពីបញ្ហាគ្រឿងញៀននេះ។
ប្រជាពលរដ្ឋបានសំណូមពរ អោយអាជ្ញាធរមានសមត្ថកិច្ចគ្រប់លំដាប់ថ្នាក់មេតាជួយធ្វើយ៉ាងណាកុំឲ្យមាន គ្រឿងញឿនកើតមាននៅក្នុងសង្កាត់កោករការរបស់ពួកគាត់ ពោលគឺបើមិនបាន១០០% ទេ ធ្វើបាន៥០%ក៏បានដែរ ។ប្រជាពលរដ្ឋបានស្នើកម្លាំងដែលមានសមត្ថកិច្ចជួយប្រទ្រុយ ជួយល្បាតរាល់ពេលយប់ពេលថ្ងៃ។ នៅពេលនេះ គ្មាន ឃើញកម្លាំងណាល្បាតទេ យូរៗបានឃើញម្តងនេះជាការពិត។អញ្ជឹងកងកម្លាំងដែលមានសមត្ថកិច្ច មេតា ជួយក្បាតក្នុងភូមិសាស្រ្តក្នុងសង្កាត់កោករការនេះផង។
លោក ឈិន ប៊ុន ហ៊ុយ អធិការនគរបាលខណ្ឌព្រែកព្នៅ បានទទួលយកនូវសំណើរស្នើសុំ ពីសំណាក់ប្រជាពលរដ្ឋក្នុងវេទិកានេះ ។ លោកបន្តថា ចំណុចដែលបានលើកឡើងអំពីបញ្ហាគ្រឿងញៀននេះ លោក នឹងខិតខំយកចិត្តទុកដាក់កែតម្រូវគ្រប់កម្លាំងតាមប៉ុស្តិ៏ធ្វើយ៉ាងណាបំពេញការងារនេះឲ្យបានសកម្មជាងមុន ដើម្បី បំពេញទៅតាមសំណូមពររបស់បងប្អូន។លោក អធិការបន្តថា រាល់ចំណុចដែលកើតមាននិងចំណុចដែលត្រូវអនុវត្តបន្ត លើបញ្ហាទប់ស្កាត់គ្រឿងញៀននេះ មានតែកម្លាំងប៉ូលីសមួយមុខមិន អាចមើលបង្ក្រាបបានទេ លុះត្រាតែមានការសហការចូលរួមបីប្រជាពលរដ្ឋ ទើបបទល្មើសគ្រឿងញៀន នេះ អាចកាត់បន្ថយបាន ។ ដូច្នេះ កាលណាបទល្មើសគ្រឿងញៀនថយចុះ ករណីបទល្មើសផ្សេងៗ ក៏ ធ្លាក់ចុះដែរ។
សូមបញ្ជាក់ថា៖ ខណ្ឌព្រែកព្នៅមានចំនួន៥សង្កាត់ ទី១-សង្កាត់ព្រែកព្នៅ ទី២-សង្កាត់សំរោង ទី៣- សង្កាត់ពញ្ញាពន់ ទី៤-សង្កាត់ពន្សាំង និងទី៥-សង្កាត់កោករការ៕