ប៉ូលិសសេដ្ឋកិច្ចខេត្តស្ទឹងត្រែង ដេញបាញ់រថយន្តដឹក ទ្វារ បង្អួច ហើយគេចខ្លួនបាត់ បន្សល់ទុករថយន្តនិងកាំភ្លើងខ្លី

ក្រចេះ៖ ប៉ូលិសសេដ្ឋកិច្ចខេត្តស្ទឹងត្រែងម្នាក់ បើករថយន្តកាមរីបាឡែនមួយគ្រឿង ដេញរថយន្តសាំងយ៉ុងទ្វារ បង្អួច ចូលទឹកដីខេត្តក្រចេះ ហើយទាញកាំភ្លើងដកបាញ់គំរាម ហើយបានរត់គេចខ្លួនបាត់ស្រមោល បន្សល់ទុករថយន្តនិងអាវុធខ្លីមួយដើម ក្រោយពេលក្រុមសមត្ថកិច្ចអន្តរាគមន៍ មកដល់ទីតាំងកើតហេតុ។

ហេតុការណ៍នេះកើតឡើងនៅល្ងាចថ្ងៃទី៤ ខែធ្នូ​ ឆ្នាំ​២០១៨ បង្កមានការភ្ញាក់ផ្អើលមួយ ដល់ប្រជាពលរដ្ឋនៅចំណុច ខាងត្បូងស្ពាន អូចាឡង់ ក្នុងភូមិអូកណ្តៀរ ថ្មី​ ឃុំអូគ្រៀង​ ស្រុកសំបូរ​ ខេត្តក្រចេះ​។

ម្ចាស់រថយន្តសាំយ៉ុងដឹកទ្វារ បង្អួច បានឲ្យដឹងថា នៅម៉ោងប្រហែលជា៥និង៣០នាទីថ្ងៃទី៤ ខែធ្នូ​ ឆ្នាំ​២០១៨ មានរថយន្តបាឡែន១គ្រឿងបើកបរ ដោយឈ្មោះ ផល្លា​ ជាប៉ូលិសសេដ្ឋកិច្ចខេត្តស្ទឹងត្រែ បាន បើករថយន្តដេញតាម ពីទឹកដីនៃខេត្តស្ទឹងត្រែង រហូតមកដល់ឆ្លងស្ពានអូចាឡង ក្នុងទឹកដីខេត្តក្រចេះ បានដកកាំភ្លើងខ្លីម៉ាកកា៥៤ បាញ់ចំកង់រថយន្តសាំយ៉ុងចំនួន២គ្រាប់ បណ្តាលឲ្យរថយន្តសាំយ៉ុង បែកកង់ ទៅមុខលែងរួច។

ដំណឹងនៃការផ្ទុះអាវុធ ត្រូវបានគេរាយការណ៍ដល់អាវុធហត្ថ ស្នាក់ការ​៧១០ ដែលមានទីតាំងនៅឃុំអូគ្រៀង ហើយកម្លាំងអាវុធហត្ថ ទៅដល់​កន្លែងកើតហេតុ ធ្វើការអន្តរាគម៍ភ្លាមៗ។ ចំណែក ជនបង្កដែលជាប៉ូលិសសេដ្ឋកិច្ចរូបនោះ រត់គេចខ្លួនបាត់ បន្សល់នៅរថយន្តបាឡែនពណ៌ស​១គ្រឿង និងអាវុធខ្លី១ដើម ហើយរថយន្តសាំយ៉ុង ដឹកសិប្បកម្មនោះផងដែរ គេពុំទាន់ឃើញកម្លាំងជំនាញ ឬសមត្ថកិច្ចមានចំណាត់ការឡើយ ៕