ព្រះមហាក្សត្រ យាងព្រះរាជាធិបតីចូលពិធីអបអរសាទរខួប២៥ឆ្នាំ អាយ ស៊ី ស៊ី អង្គរ
សៀមរាប៖ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងពិធីបិទជាផ្លូវការ នៃពិធីអបអរសាទរខួប២៥ឆ្នាំ ការបង្កើតគណៈកម្មាធិការ អន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយ ស៊ី ស៊ី អង្គរ (ICC-Angkor) នាលានព្រះជល់ដំរី ខេត្តសៀមរាប ដោយមានការចូលរួមពីបណ្តាឥស្សរជនជាន់ខ្ពស់នៃរាជរដ្ឋាភិបាល បណ្តាថ្នាក់ដឹកនាំនៃ អាយសុីសុី អង្គរ ព្រមទាំងភ្ញៀវជាតិ អន្តរជាតិ ជាច្រើនផងដែរ ។
ព្រះរាជសុន្ទរកថាដ៏ឧត្តុង្គឧត្តម នៃព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ក្នុងឱកាសដ៏វិសេសវិសាលនៃពិធីបិទជាផ្លូវការ ខួប២៥ឆ្នាំ ការបង្កើតគណៈកម្មាធិការ អន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយ ស៊ី ស៊ី អង្គរ (ICC-Angkor) នាលានជល់ដំរី ខេត្តសៀមរាប ។
ព្រះអង្គមានព្រះរាជបន្ទូលថា រមណីយដ្ឋានអង្គរបានចុះបញ្ជីបេតិកភណ្ឌរបស់អង្គការយូណេស្កូ នៅថ្ងៃទី១៤ខែធ្នូឆ្នាំ១៩៩២ ក្រោមព្រះរាជតម្រិះដ៏ថ្លៃថ្លា និងឈ្លាវវៃរបស់ព្រះករុណា ព្រះបរមរតនកោដ្ឋ ដែលព្រះអង្គបានអំពាវនាវទៅអង្គការយូណេស្កូ សូមឲ្យជួយស្រោចស្រងអង្គរ ។ ឆ្លើយតបនឹងការអំពាវនាវនេះ សន្និសីទអន្តរជាតិមួយបាន បានប្រារព្ធធ្វើឡើងនៅទីក្រុងតូក្យូនៅថ្ងៃទី១២ ១៣ ខែតុលា ឆ្នាំ១៩៩៣ ក្រោមការផ្តួចផ្តើម គំនិតរបស់រាជរដ្ឋាភិបាលជប៉ុន ដោយមានការគាំទ្រពីប្រទេសបារាំង និងអង្គការយូណេស្កូ ដើម្បីដាក់ចេញនូវយុទ្ធសាស្រ្ត និងផែនការសកម្មភាពនានាជាប្រយោជន៍ ដល់កិច្ចការអភិរក្សនិង អភិវឌ្ឍន៍រមណីយដ្ឋានអង្គរ។ ដើម្បីសម្រេចគោលដៅនេះ គណៈកម្មាធិការ អន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយ ស៊ី ស៊ី អង្គរ (ICC-Angkor) ត្រូវបានបង្កើតឡើងនាខែធ្នូ ឆ្នាំ១៩៩៣។ ការប្រារព្ធខួបនៃ២៥ឆ្នាំ ICC-Angkor នៃចំកណ្តាលបេះដូង នៃក្រុងអង្គរធំ ដែលជាស្នាព្រះហស្ត និងជានិមិត្តរូបដ៏ខ្ពង់ខ្ពស់ នៃមហាវីរក្សត្រសម័យអង្គរ ព្រះបាទជ័យវរ័ន្មទី៧ ជាព្រឹត្តិការណ៍ប្រវត្តិសាស្រ្ត មានតម្លៃជាសកលពិតប្រាកដណាស់ សម្រាប់យើងទាំងអស់គ្នា ដោយបានបង្ហាញ យ៉ាងច្បាស់អំពីជោគជ័យ ជាប្រតិសាស្រ្តនៃយន្តការអន្តរជាតិមួយ ក្នុងកិច្ចដំណើរអភិរក្ស និងអភិវឌ្ឍន៍រមណីយដ្ឋានអង្គរ ប្រកបដោយចីរភាពនាពេលកន្លងមក ដែលផ្តើមចេញពីការចូលរួមពីគ្រប់ភាគីពាក់ព័ន្ធនានា ទាំងជាតិនិងអន្តរជាតិ ។ ពិធីនេះក៏បានរំលឹកដល់យើងទាំងអស់គ្នា អំពីកាតព្វកិច្ចមួយដែលបានចងភ្ជាប់យើងទាំងអស់គ្នា ចាប់តាំងពីខែកញ្ញា ឆ្នាំ១៩៩១មក ជាពេលវេលាមានតម្លៃជាប្រវត្តិសាស្រ្ត នៃកិច្ចចាប់ផ្តើមកិច្ចពិភាក្សាស្វែងរក ដំណោះស្រាយសុខសន្តិភាព នៃព្រះរាជាណាចក្រកម្ពុជា ហើយដែលក្រោយមក កិច្ចព្រមព្រៀងទីក្រុងប៉ារីសស្តីពីការបញ្ចប់ ជម្លោះផ្ទៃក្នុងរបស់កម្ពុជា ត្រូវបានចុះហត្ថលេខានៅថ្ងៃទី២៣ ខែតុលា ឆ្នាំ១៩៩១ ។
ព្រះករុណា បានមានព្រះរាជបន្ទូលថា “ខ្ញុំសូមវាយតម្លៃខ្ពស់ចំពោះកិច្ចខិតខំប្រឹងប្រែង យកអស់កម្លាំងកាយចិត្តរបស់សម្តេច ឯកឧត្តម លោកជំទាវ លោក លោកស្រី ដៃគូអភិវឌ្ឍន៍ជាតិ និងអន្តរជាតិ ព្រមទាំងមន្រ្តីគ្រប់លំដាប់ថ្នាក់នៃអាជ្ញាធរជាតិអប្សរា ជាពិសេសថ្នាក់ដឹកនាំដែលយើងមិនអាចបំភ្លេចបាន ហើយដែលបានលះបង់ពេលវេលាប្រាជ្ញាស្មារតី បំពេញភារកិច្ចដឹកនាំដោយការទទួលខុសត្រូវខ្ពស់ ធ្វើឲ្យរមណីយដ្ឋានអង្គរកាន់តែល្បីល្បាញលើពិភពលោក។ ជោគជ័យនាពេលកន្លងមកនេះ ក៏បានបង្ហាញពីការអនុវត្ត គោលនយោបាយវប្បធម៌ដ៏ត្រឹមត្រូវ របស់រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសព្វនិងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចកាលតែងយកចិត្តទុកដាក់ខ្ពស់ក្នុងការថែរក្សាការពារ អភិរក្សនិងអភិវឌ្ឍន៍ កេរមរតកវប្បធម៌ជាតិ”។
ព្រះករុណា ក៏បានថ្លែងអំណរគុណដល់ ICC-Angkor ដែលផ្តល់អនុសាសន៍ដ៏មានសារសំខាន់ ក្នុងការជំរុញកិច្ចការអភិរក្ស ស្រាវជ្រាវបណ្តុះបណ្តាល និងអភិវឌ្ឍន៍រមណីយដ្ឋានអង្គរ ប្រកបដោយចីរភាព។ តាមរយៈយុត្តិការដែលក្លាយជាគំរូអន្តរជាតិ របស់អង្គការយូណេស្កូនេះ ICC-Angkor បានកៀរគរការចូលរួមកាន់តែច្រើនឡើងៗ ពីក្រុមអ្នកជំនាញការអន្តរជាតិ ជាច្រើនមកពីជុំវិញពិភពលោក ដែលបច្ចុប្បន្នបាននិងកំពុង ធ្វើកិច្ចសហប្រតិបត្តិការ និងស្នើសុំកិច្ចសហការជាមួយអាជ្ញាធរជាតិអប្សរា ជាបន្តបន្ទាប់ ក្នុងការអភិរក្សស្រាវជ្រាវ បណ្តុះបណ្តាលនិងអភិវឌ្ឍន៍ ។ ជាការពិតណាស់ សមិទ្ធផលដែលសម្រេចបានក្រោយយុត្តិការICC-Angkorមានច្រើនទម្រង់និងគ្រប់វិស័យ ប៉ុន្តែទន្ទឹមនឹងនេះ ការងារដែលត្រូវបន្តធ្វើពាក់ព័ន្ធនឹងកិច្ចអភិរក្សនិងអភិវឌ្ឍក៏កាន់តែកើតឡើងកាន់តែច្រើនផងដែរ ។ ក្នុងន័យនេះ កិច្ចអភិរក្សនិងអភិវឌ្ឍន៍បេតិកភណ្ឌ ជាការងារគ្មានទីបញ្ចប់ និងទាមទារ ឲ្យមានការចូលរួមពីគ្រប់មជ្ឈដ្ឋាន ជាតិ និងអន្តរជាតិ ជាពិសេសគឺស្រទាប់យុវជន ជាអ្នកបន្តវេណ ជាក់ស្តែង បច្ចុប្បន្នធនធានមនុស្សក្នុងវិស័យអភិរក្ស និងស្រាវជ្រាវរបស់កម្ពុជា កំពុងឈានមុន ក្នុងចំណោមបណ្តាប្រទេស អាស៊ីអាគ្នេយ៍ ហើយរមណីយដ្ឋានអង្គរបានក្លាយជាទីតាំងបុរាណវិទ្យា ដ៏ធំជាងគេ របស់អង្គការយូណេស្កូ សម្រាប់កិច្ចការបណ្តុះបណ្តាលធនធានមនុស្ស លើវិស័យនេះ។
