ក្រុមប្រឹក្សាវិន័យសហព័ន្ធប្រដាល់គុនខ្មែរដាក់ទណ្ឌកម្មគ្រូបង្វឹក និង កីឡាករមួយរូប

​ភ្នំពេញ:ក្រុមប្រឹក្សាវិន័យរបស់សហព័ន្ធប្រដាល់គុនខ្មែរ បានសម្រេចដាក់វិន័យ លើគ្រូបង្វឹក និង កីឡាករមួយរូបរយៈពេល៦ខែ ដោយសារតែមានកំហុស មិនអាចអត់ឱនឲ្យបាន ។

​លោកឧត្តមសេនីយ៍ទោវ៉ា ស៊ិនភីរម្យប្រធានក្រុមប្រឹក្សាវិន័យ សហព័ន្ធកីឡាប្រដាល់គុនខ្មែរ បានចេញសេចក្ដីសម្រេចចំនួន២ផ្សេងគ្នា ដែលសេចក្ដីសម្រេចទី១ គឺដាក់វិន័យលើកីឡាករសុខ ធីក្លិបសៅយ៉ាន់នាគាខេត្តបន្ទាយមានជ័យ ពីបទមិនគោរពបទបញ្ជាប្រកួត និងលោកសាន សៅយ៉ាន់ ដែលជាគ្រូបង្វឹក ដោយពួកគេត្រូវជាប់ ពិន័យរយៈពេល៦ខែដូចគ្នា ។

​សូមបញ្ជាក់ថាក្នុងការប្រកួតរវាងអ្នកប្រដាល់សុខ ធីជាមួយអ្នកប្រដាល់ថៃ លើសង្វៀនCNC កាលពីថ្ងៃទី២៨តុលាទាំងកីឡាករសុខ ធីទាំងលោកសាន សៅយ៉ាន់ បានប្រកាសមិនទទួលស្គាល់ លទ្ធផលដែលចាញ់នោះឡើយ ។ជា
មួយគ្នានេះពួកគេទាំង២ ថែមទាំងបានប្រើនូវសំដី មិនសមរម្យដល់ មន្ត្រីបច្ចេកទេសទៀតផង ។

ជាមួយនឹងការមិនទទួលស្គាល់ពីលទ្ធផលនេះ អ្នកប្រដាល់រូបនេះ បានបោះបង់ចោលការប្រកួត ក្រោយៗទៀត ក្នុងខណៈដែលព្រឹត្តិការណ៍ខ្សែក្រវាត់ នៅមិនទាន់បញ្ចប់នោះ ។

​លោកឧត្តមសេនីយ៍ឯកតែម ម៉ឺនប្រធានសហព័ន្ធប្រដាល់គុនខ្មែរ បានពន្យល់ថា បន្ទាប់ពីកើតមានព្រឹត្តិការណ៍នេះ មកក្រុមប្រឹក្សាវិន័យរបស់សហព័ន្ធរួម ជាមួយរូបលោកបាន ពិនិត្យមើលឡើងវិញ នូវវីដេអូប្រកួតរវាងសុខ ធីជា
មួយអ្នកប្រដាល់ថៃ ។ក្រោយពីពិនិត្យយ៉ាង ល្អិតល្អន់មកគឺសុខ ធីពិតជាចាញ់ គូប្រកួតរបស់ខ្លួនមែន ។

​សម្រាប់សាន សៅយ៉ាន់ក្រុមប្រឹក្សាវិន័យ សម្រេចផ្អាកការងារជា មន្ត្រីអាជ្ញាកណ្ដាល និងចៅក្រមរយៈពេល៦ខែ ។ក្រុមប្រឹក្សាវិន័យក៏បាន ព្រមានដែរថាសាមីខ្លួនត្រូវទទួលស្គាល់ ពីកំហុសរបស់ខ្លួនខិតខំរៀន សូត្រអប់រំផ្លូវចិត្តឲ្យបានល្អនិង បន្តការសិក្សាអំពីបទបញ្ជាប្រកួតឲ្យបាន ច្បាស់លាស់ដើម្បីបាន ចូលរួមបំពេញភារកិច្ចនៅពេលខាងមុខ ។

​ឯកីឡាករសុខ ធីវិញត្រូវក្រុមប្រឹក្សាវិន័យផ្អាក ការប្រកួតរយៈពេល៦ខែ គ្រប់សង្វៀនប្រដាល់ទាំងអស់ ក្នុងនោះមានទាំងសង្វៀន ក្នុងប្រទេស និង ក្រៅប្រទេស ។ អ្នកប្រដាល់រូបនេះ ក៏ទទួលនូវការព្រមាន ដូចគ្រូបង្វឹករបស់គេដែរគឺ ត្រូវស្វែងយល់ពីបទបញ្ជា ឲ្យបានច្បាស់លាស់ និងអប់រំផ្លូវចិត្តឲ្យបានល្អ ។