នគរបាលខេត្តកែប បង្ក្រាបករណីប្រើប្រាស់ និងជួញដូរគ្រឿងញៀន

កែប៖ ដោយអនុវត្តន៍តាមផែនការយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់ ការិយាល័យប្រឆាំងគ្រឿងញៀន សហការជាមួយកងកម្លាំងអន្តរាគមន៍ពិសេសខេត្ត តាមការដឹកនាំបញ្ជាពីលោកឧត្តមសេនីយ៍ត្រី បែន តារា ស្នងការនគរបាលខេត្តកែប និងការសម្របសម្រួលពីលោក ខាន់ សុផល ព្រះរាជអាជ្ញារងអបសាលាដំបូងខេត្តកំពត នៅល្ងាចថ្ងៃទី៥ខែធ្នូឆ្នាំ២០១៨ បានស្ទាក់ចាប់ការចរាចរ ចែកចាយ និងប្រើប្រាស់គ្រឿងញៀនខុសច្បាប់១លើក នៅភូមិភ្នំលាវ ឃុំពងទឹក ស្រុកដំណាក់ចង្អើរ ដោយដកហូតជាក់ស្តែងបានថ្នាំ៧កញ្ចប់ (ធំ១កញ្ចប់ តូច៦កញ្ចប់) ដែលសាម៉ីជនទទួលស្គាល់ថាជាម៉ាទឹកកក។ បន្ទាប់ពីការស្ទាក់ចាប់យើងបានបន្តនីតិវិធី ទៅឆែកឆេរផ្ទះជនសង្ស័យ ដោយដកហូតបានបន្ថែម ដាវសាម៉ូរៃ១ដើម, កាំភ្លើងកែច្នៃ២ដើម, កន្ត្រៃ១ដើម, ទូរស័ព្ទ២គ្រឿង, ថង់សម្រាប់វេចខ្ចប់ និងឧបករណ៍សម្រាប់ជក់១ចំនួនទៀត។
ជនសង្ស័យមានឈ្មោះ៖ ១ ឈ្មោះ ហេង ចាន់ចាវ ប្រុស អាយុ២០ឆ្នាំ មុខរបរមិនពិត រស់នៅភូមិ ឃុំខាងលើ ជាអ្នកចែកចាយ និងជាម្ចាស់គ្រឿងញៀន និងសម្ភារខាងលើ។ ឈ្មោះ គឹម សាន ប្រុស អាយុ១៨ឆ្នាំ មុខរបរមិនពិត រស់នៅភូមិកែវក្រសាំង សង្កាត់កែប ក្រុងកែប ជាអ្នកទទួលខុសត្រូវដើរចែកចាយ តាមការចង្អុលណែនាំពីឈ្មោះ ហេង ចាន់ចាវ។
ក្រោយការចាប់ខ្លួនយើងបាននាំជនសង្ស័យ មកកាន់ស្នងការដ្ឋាននគរបាលខេត្ត ដើម្បីរៀបចំសំណុំរឿង បញ្ជូនទៅសាលាដំបូងខេត្តកំពត ចាត់ការបន្ត៕