៣នាក់ស្លាប់ភ្លាមៗ បន្ទាប់ពីរថយន្តកាមរីឆ្លាម ប៉ះគ្នាជាមួយម៉ូតូ ហើយជ្រុលទៅបុកដើមចាន់គីរី

សៀមរាប៖ សមត្ថកិច្ចនគរបាលស្រុកពួក បានឲ្យដឹងថា ករណីគ្រោះថ្នាក់ចរាចរ រវាងរថយន្តកាមរីឆ្លាមជិះគ្នា២នាក់ និង ម៉ូតូ ហុងដាឌ្រីម១គ្រឿង ជិះម្នាក់ឯង ហើយរថយន្តបានបន្តទៅបុកផ្ទុបនឹងដើមចាន់គិរី បណ្តាលឲ្យស្លាប់ទាំង៣នាក់ នៅកន្លែងកើតហេតុ

ចំណែករថយន្តនិងម៉ូតូខូចខាតខ្ទេចទាំងស្រុង។ ហេតុការណ៍នេះ កើតឡើងកាលពីវេលាម៉ោង២២និង៤៥នាទី នៅថ្ងៃទី៥ ខែធ្នូ ឆ្នាំ២០១៨នេះ នៅលើផ្លូវជាតិលេខ៦ ចំណុចមុខវត្តខ្នាត ក្នុងភូមិខ្នាត ឃុំខ្នាត ស្រុកពួក ខេត្តសៀមរាប ។

សមត្ថកិច្ច បានឲ្យដឹងទៀតថា ករណីនេះ គឺរថយន្តម៉ាកកាម៉ារីឆ្លាម ពណ៌ប្រផេះ ពាក់ស្លាកលេខភ្នំពេញ 2R.1916 បើកបរដោយឈ្មោះ ជាម សំណាង ហៅសុខ ភេទប្រុស អាយុ២៥ឆ្នាំ ស្លាប់ នៅភូមិគោកស្រុក ឃុំពួក ស្រុកពួក រួមដំណើរដោយឈ្មោះភាន់ សាវីន ភេទប្រុស អាយុ២២ឆ្នាំ ស្លាប់ នៅភូមិចំបក់ហែ ឃុំពួក ស្រុកពួក បើកបរទិសដៅពីលិចទៅកើតក្នុងល្បឿនលឿន បានបុកម៉ូតូម៉ាកហុងដាឌ្រីម ផលិតឆ្នាំ២០០៨ ពណ៌ខ្មៅ ពាក់ស្លាកលេខ សៀមរាប 1k.0324 បើកបរដោយឈ្មោះ ខឿម វិចិត្រ ភេទប្រុស អាយុ១៨ឆ្នាំ ស្លាប់ នៅភូមិតាទក ឃុំពួក ស្រុកពួក មុខរបរធ្វើស្រែ បើកបរទិសដៅពីលិចទៅកើត ក្រោយពីបុកម៉ូតូរួចហើយ រថយន្តបានជ្រុលទៅបុកដើមចាន់គិរី រីឯរថយន្តនិងម៉ូតូ បានខូចខាតធ្ងន់ធ្ងរ ។

សមត្ថកិច្ច បានឲ្យដឹងទៀតថា ក្រោយពេលកើតហេតុ កម្លាំងនគរបាលជំនាញស្រុក បានចុះវាស់វែងកន្លែងកើតហេតុនិង កសាងសំណុំរឿង ព្រមទាំងដកហូតវត្ថុតាងពាក់ព័ន្ធ រក្សាទុកនៅអធិការដ្ឋាននគរបាលស្រុក។

សូមរំលឹកថា នៅត្រង់ចំណុចចន្លោះវត្តខ្នាត លើកំណាត់ផ្លូវជាតិលេខ៦ ក្នុងភូមិសាស្ត្រស្រុកពួក តែងកើតមានគ្រោះថ្នាក់ចរាចរ
ញឹកញាប់ព្រោះ ផ្លូវមានសណ្ឋានកោង រាងអក្ស N ហើយងងឹត បើអ្នកបើកបរឆ្លងកាត់ ប្រើល្បឿនលើសកំណត់
ច្បាស់ជាមិនអាចគ្រប់គ្រងយានយន្តបាន អាចបណ្តាលឲ្យមានគ្រោះថា្នក់ចរាចរកើតឡើង ជាយកថាហេតុ៕