វេទិការសាធារណៈនៅខណ្ឌដង្កោ ពលរដ្ឋស្នើឱ្យអាជ្ញាធរ ជួយកសាង និងស្តារហេដ្ឋារចនាសម្ព័ន្ធ តែគ្មានសំណើរ លើបញ្ហា សន្តិសុខ
ភ្នំពេញ៖ ជាការកត់សម្គាល់ នៅក្នុង វេទិការសាធារណៈ នៅតាមបណ្តារ ខណ្ឌនីមួយៗ នៅក្នុងរាជធានីភ្នំពេញ តោងមានប្រជាពលរដ្ឋ លើឡើងនូវសំណើរ និងសំណូមពរជាច្រើន ដែលមានបញ្ហាប្រឈម ក្នុងមូលដ្ឋានរបស់ខ្លួន រួមមានការ កសាង ស្តារ ហេដ្ឋារចនាសម្ព័ន្ធ ការអប់រំ និងដោះស្រាយបញ្ហាប្រឈម ដែលជាតម្រូវការចាំបាច់ ជាពិសេស បញ្ហាសន្តិសុខ សណ្តាប់ធ្នាប់ និងបញ្ហាគ្រឿងញៀន ដែលជាក្តីកង្វល់ដ៏ធំរបស់ប្រជាពលរដ្ឋក្នុងសហគមន៍និមួយ។
សម្រាប់វេទិការសាធារណៈ ដែលបានរៀបចំ នៅក្នុងខណ្ឌដង្កោរ នាព្រឹកថ្ងៃទី៦ខែធ្នូ ឆ្នាំ២០១៨នេះ មានសំណើរ និងសំណូមពរ ជាច្រើន ពីសំណាក់ប្រជាពលរដ្ឋបទៅអាជ្ញាធររាជធានី ក៏ដូចជា ក្រុមប្រឹក្សារាជធានីភ្នំពេញ និង សមត្ថកិច្ចពាក់ព័ន្ធ ជាការកត់សម្គាល់ រាល់សំណើរ និងសំណូមពរទាំងនោះ ប្រជាពលរដ្ឋ បានស្នើឱ្យអាជ្ញាធរ ជួយពន្លឿន ការកសាងហេដ្ឋារចនាសម្ព័ន្ធ ជួយជួសជុល ផ្លូវ សុំផ្លូវថ្មី សុំផ្លូវបេតុង សុំតភ្ជាប់ប្រព័ន្ធទឹកស្អាត ភ្លើងរដ្ឋ និង សម្រួលចរាចរ តែប៉ុណ្ណោះ ប៉ុន្តែមិនមានការលើកឡើងពីសំណើរ លើការពង្រឹងសន្តិសុខ និងជួយទប់ស្កាត់ បង្ការ បង្រ្កាប់ លើបទល្មើសចោរកម្ម និងបញ្ហាគ្រឿងញឿននោះឡើយ។
ក្នុងន័យនេះ ចង់បង្ហាញឱ្យឃើញពីកិច្ចខិតខំប្រឹងប្រែង របស់សមត្ថកិច្ចគ្រប់ជាន់ថ្នាក់ក្នុង ខណ្ឌ សង្កាត់ ដើម្បីរក្សាបាននូវសុខដុមនីយកម្ម ជូនប្រជាពលរដ្ឋ ក្នុងមូលដ្ឋាន បានយ៉ាងល្អប្រសើរ ពលរដ្ឋរស់នៅដោយគ្មានក្តីកង្វល់ ពោលគឺអនុវត្តបានល្អ ចំពោះផែនការ ឬ គោលនយោបាយភូមិឃុំមានសុវត្ថិភាព ជាពិសេសបញ្ហាគ្រឿងញៀន ដែលបាននិងកំពុងយាយី ក្នុងរាជធានីភ្នំពេញ ក៏ដូចជាបណ្តារ ខេត្តមួយចំនួន ខណៈរាជរដ្ឋាភិបាល កំពុងដុតដៃដុតជើង ក្នុងយុទ្ធនាការ ទប់ស្កាត់ បង្ការ បង្រ្កាប និងប្រយុទ្ធប្រឆាំងនូវរាល់បទល្មើសគ្រឿងញៀននេះ។
បើទោះជាពុំមានការលើកឡើង ជាសំណើរនៅក្នុងវេទិកាសាធារណៈនេះក្តី តែបញ្ហាសន្តិសុខ និង បញ្ហាគ្រឿងញៀននេះ ត្រូវបានយកចិត្តទុកដាក់ពីសមត្ថកិច្ចពាក់ព័ន្ធគ្រប់ផ្នែក និងមានការជម្រុញបន្ថែម ពីអាជ្ញាធរ ពិសេស អាជ្ញាធររាជធានីភ្នំពេញ នៅគ្រប់វេទិកា ដល់ សមត្ថកិច្ចមូលដ្ឋាន ឱ្យបន្តកិច្ចខិតខំប្រឹងប្រែង អនុវត្តឱ្យបានល្អ តាមផែនការ និងអនុសាសន៍ណែនាំរបស់ប្រមុខរាជរដ្ឋាភិបាល ក៏ដូចជា ជួយដោះស្រាយបញ្ហាកើតមានក្នុងមូលដ្ឋាន និងជួយអន្តរាគមន៍ ឱ្យបានទាន់ពេលវេលាជូនប្រជាពលរដ្ឋ គ្រប់ សង្កាត់ ខណ្ឌ ទូទាំងរាជធានីភ្នំពេញ។
លោក នុត ពុធដារ៉ា អភិបាលខណ្ឌដង្កោ បានឆ្លើយតបទៅនឹងសំណើរសំណូមពរប្រជាពលរដ្ឋក្នុងវេទិកានោះដែរថា នៅក្នុងសង្កាត់សាក់សំពៅ យើងធ្វើផ្លូវអស់ហើយ ហើយល្អជាងគេ បើប្រៀបសង្កាត់ផ្សេងៗ ក្នុងនាមអាជ្ញាធរ យើងពិតជាបាននឹងកំពុងខិតខំជួយប្រជាពលរដ្ឋណាស់ តែសំខាន់ថ្នាក់ក្រោមត្រូវរាយការណ៍ពីភាពអវិជ្ជមាននិងការចង់បានរបស់ប្រជាពលរដ្ឋ ដើម្បិយើងរួមគ្នាដោះស្រាយជូនពួកគាត់អោយទាន់ពេល។ លោកបន្តទៀតថា បញ្ហាដែរថា ធ្វើផ្លូវបាន៣ទៅ៤០០ម៉ែត្រទុកចោលនោះលោក អភិបាលបញ្ជាក់ថា ដោយថវិកាយើងមានកំរិត ហើយត្រូវចែករំលែកទៅតាមភូមិសង្កាត់ផ្សេងទៀត ប្រៀបបានយើងមាននំមួយដុំ យើងហែកចែកគ្នាអញ្ចឹងដែរ មានន័យថា ឆ្នាំនេះយើងធ្វើបាន៣០០ម៉ែត្រ ឆ្នាំក្រោយ យើងមានលុយគម្រោងខណ្ឌសង្កាត់ យើងដោះស្រាយធ្វើបន្តទៀត ។
លោកស៊ុយ សេរិទ្ធ អភិបាលរងរាជធានីភ្នំពេញ បានលើកឡើងថា ការបង្កើតអោយមានវេទិកាផ្សព្វផ្សាយនិងពិគ្រោះយោបល់ជាមួយប្រជាពរដ្ឋ ពីថ្នាក់សង្កាត់រហូតដល់រាជធានី គឺដើម្បីដោះស្រាយការចង់បានរបស់ពួកគាត់។ ចំពោះ បញ្ហាទឹក ភ្លើង ប្រឡាយ ផ្លូវ ដែលប្រជាពលរដ្ឋលើកឡើងជាកង្វល់នេះយើងធ្វើបានច្រើនហើយ ប៉ុន្តែយើងក៏នៅតែបន្តធ្វើជូនប្រជាពលរដ្ឋបន្ថែមទៀត។ មានន័យថា លុយរបស់រដ្ឋ បានធ្លាក់មកដល់ដៃប្រជាពលរដ្ឋផ្ទាល់ហើយមិនបានយកទៅណាទេ នោះគឺសាងសង់ហេដ្ឋារចនាសម្ព័ន្ធក្នុងមូលដ្ឋាននេះឯង។
សូមបញ្ជាក់ថា វេទិកាសាធារណៈ ដែលបានរៀបចំនៅខណ្ឌដង្កោ មានការអញ្ជើញចូលរួមពីលោក ម៉ាន់ ឈឿន សមាជិកព្រឹទ្ធសភាលោក ម៉ប់ សារិន ប្រធានក្រុមប្រឹក្សារាជធានីលោក ស៊ុយ សេរិទ្ធ អភិបាលរងរាជធានីភ្នំពេញ អភិបាលខណ្ឌ ប្រធានមន្ទីរ មន្រ្តីពាក់ព័ន្ធ និងប្រជាពលរដ្ឋក្នុងមូលដ្ឋានប្រមាណជា៥០០នាក់៕