ព្រះចៅអធិការវត្តគិរីស្តេចគង់ ធ្វើឲ្យបាត់សិលាចារឹកដ៏មានតម្លៃមួយផ្ទាំង ហើយរត់គេចបាត់ និងប្រកូកប្រកាសទូងស្គរ ឲ្យប្រជាពលរដ្ឋមករារាំងសមត្ថកិច្ច

កំពង់ស្ពឺ៖ ព្រះចៅអធិការវត្តគិរីស្តេចគង់ បានធ្វើឲ្យបាត់សិលាចារឹកដ៏មានតម្លៃមួយផ្ទាំង ដែលចារឹកថា “សុវណ្ណភូមិ” មុនសម័យអង្គរ រកឃើញក្នុងស្រុកបរសេដ្ឋ ខេត្តកំពង់ស្ពឺ។ នាពេលកន្លងមក សមត្ថកិច្ច និងក្រុមការងារបេតិកភណ្ឌ បានព្យាយាមយកសិលាចារឹកនេះ ទៅរក្សាទុកនៅសារមន្ទីរជាតិ តែព្រះចៅអធិការវត្តគិរីស្តេចគង់ មិនព្រមតាម ហើយបានកែនបងប្អូនប្រជាពលរដ្ឋ មករារាំងមិនឲ្យក្រុមការងារ នាំយកវត្ថុមានតម្លៃនេះ ទៅរក្សាទុកក្នុងសារមន្ទីរជាតិ តែនៅថ្ងៃទី៧ធ្នូនេះ កម្លាំងចម្រុះ បានឆែកឆេររកវត្ថុមានតម្លៃរបស់ជាតិនេះ តែមិនឃើញ ដោយត្រូវព្រះចៅអធិការរំដោះចេញ ពីកន្លែងរក្សាទុកទៅបាត់ ហើយព្រះចៅអធិការអង្គនោះ បានរត់គេចព្រះកាយបាត់ពីវត្ត ។

លោក ហម គឹមសុន អគ្គនាយករងបេតិកភណ្ឌ នៅព្រឹកថ្ងៃទី៧ ខែធ្នូ ឆ្នាំ២០១៨នេះ បានឲ្យដឹងថា សិលាចារឹកមួយផ្ទាំង ដែលរកឃើញក្នុងវត្តគិរីស្តេចគង់ ដោយចារឹកអក្សមួយឃ្លាថា “សុវណ្ណភូមិ” ដែលជាសម្បត្តិបេតិកភណ្ឌជាតិ ដ៏មានតម្លៃ សម្រាប់ការស្រាវជ្រាវជាប្រវត្តិសាស្រ្ត សម្រាប់ជាតិទាំងមូល បានបាត់ដោយមិនដឹងមូលហេតុ។ នេះជាលើកទី៣ហើយ ដែលក្រុមការងារ បានចុះមកដកហូត យកផ្ទាំងសិលាដ៏កម្រនេះ ប៉ុន្តែព្រះចៅអធិការវត្តគិរីស្តេចគង់ បានកែនបងប្អូនប្រជាពលរដ្ឋ មករារាំងមិនឲ្យក្រុមការងារ នាំយកវត្ថុមានតម្លៃនេះ ទៅរក្សាទុកក្នុងសារមន្ទីរជាតិបានឡើយ តែនៅថ្ងៃទី៧ធ្នូនេះ កម្លាំងចម្រុះបានឆែកឆេររកវត្ថុ មានតម្លៃរបស់ជាតិខ្មែរនេះ មិនឃើញ ដោយត្រូវព្រះចៅអធិការរំដោះចេញ ពីកន្លែងរក្សាទុកទៅបាត់ ហើយព្រះចៅអធិការអង្គនោះ បានរត់គេចព្រះកាយ ដោយមិនព្រមប្រគល់ផ្ទាំងសិលានោះ មកសមត្ថកិច្ចដាច់ខាត។

ជាមួយហេតុការណ៍នេះ លោកយាយ លោកតា ដែលរស់នៅក្បែរៗវត្ត បានមកតវ៉ាជាមួយសមត្ថកិច្ច ហាក់បីដូចជា មានការចាត់តាំង ច្បាស់លាស់ ពីព្រះចៅអធិការវត្ត ដោយបានទូងស្គរ ប្រកូកប្រកាសដើម្បីតវ៉ា មិនព្រមប្រគល់វត្ថុមានតម្លៃ ដាក់ក្នុងសារមន្ទីរជាតិ។

លោក សរ សុពុត្រា អភិបាលរងខេត្តកំពង់ស្ពឺ បានមានពន្យល់ដល់ប្រជាពលរដ្ឋ ដែលមកតវ៉ានោះថា សិលាចារឹកដ៏មានតម្លៃ សម្រាប់ជាតិមួយផ្ទាំងនេះ ចាំបាច់ត្រូវការថែរក្សាពីមន្ត្រីជំនាញបេតិកភណ្ឌ និងមានកន្លែងទុកដាក់ថែទាំត្រឹមត្រូវ ពីសារមន្ទីរជាតិ មិនអាចអាចធ្វេសប្រហែសបាននោះ។ លោកថា នេះជាសម្បត្តិវប្បធម៌ជាតិដ៏កម្រ និងមានតម្លៃមិនអាចកាត់ថ្លៃបានឡើយ។

លោកអភិបាលរង បានថ្លែងថា “បើផ្ទាំងសិលាដ៏មានតម្លៃនេះ ពិតជាបានបាត់ អ្នកទទួលខុសត្រូវនឹងទទួលទោស តាមច្បាប់កំណត់ ពីព្រោះវត្ថុដ៏មានសម្រាប់មនុស្សជាតិ ត្រូវការចាំបាច់ថែរក្សាកូនខ្មែរ ជំនាន់ក្រោយបានស្វែងយល់” ។

ក្រុមការងារ ការពារបេតិកភណ្ឌ គឺត្រូវតែយកមកថែរក្សា និងសិក្សាពីសិលាចាររឹកដ៏មានតម្លៃនេះ មកតាំងក្នុងសារមន្ទីរជាតិ ឲ្យបានគង់វង្ស មិនប្រកាន់ថា ជារបស់នរណាម្នាក់ឡើយ គឺជាសម្បត្តិវប្បធម៌តែមួយរបស់ខ្មែរ តែត្រូវបរាជ័យជាលើកទី៣ ដោយទង្វើ និងចេតនារំដោះ ពីសំណាក់ព្រះចៅអធិការវត្តនេះ ហើយចុងក្រោយបានបាត់ចេញ ពីកន្លែងថែរក្សាទុកថែមទៀត។

ការចុះយកសិលាចារឹកទៅរក្សាទុកក្នុងសារមន្ទីរនេះ បានធ្វើឡើងដោយមានការសម្អាងត្រឹមត្រូវ រួមមាន៖
១៖ យោងតាមលិខិត ប្រគេនជូនរបស់សម្តេចព្រះសង្សនាយក នន់ ង៉ែត បានចម្រើនពរជូនចំពោះ ព្រះចៅអធិការវត្តគិរីស្តេចគង់ ក្នុងឃុំស្វាយចចឹប ស្រុកបសេដ្ឋ ខេត្តកំពង់ស្ពឺ ដើម្បីស្នើសុំយកសិលាចារឹកចំនួន១ផ្ទាំង មកថែក្សាទុកក្នុងសារមន្ទីរជាតិភ្នំពេញ ទុកជាបេតិកភណ្ឌជាតិ។
២៖ យោងលើសង្សដីកាលេខ២២៥ ស.ន.ក.ជ ចុះថ្ងៃទី០៥ ខែធ្នូ ឆ្នាំ២០១៨ ទើបសមត្ថកិច្ចចម្រុះ ដឹកនាំលោក ហម គឹមសុន, លោក សរ សុពុត្រា និងលោកឧត្តមសេនីយ៍ទោ លី ឡាយ ប្រធាននាយកដ្ឋាននគរបាលការពារបេតិកភណ្ឌ រួមទាំងកម្លាំងចម្រុះទាំង៣ប្រភេទ ជាច្រើននាក់ចុះប្រតិបត្តិការ៕