យុវជនម្នាក់ស្លាប់យ៉ាងអាណោចអាធ័ម ខណៈរថយន្តបើកបុកកិនខណ្ឌចំការមន
ភ្នំពេញ ៖ រថយន្តដឹកទំនិញមួយគ្រឿងបើកដោយបុរសម្នាក់បុកម៉ូតូពីក្រោយ ហើយកិនបណ្ដាលឲ្យយុវជនម្នាក់ស្លាប់ នៅនឹងកន្លែងយ៉ាងអាណោចអាធ័ម កាលពីវេលាម៉ោង១០ និង៣០នាទីយប់ថ្ងៃទី០៧ ខែធ្នូ ឆ្នាំ២០១៨ ស្ថិតនៅតាមបណ្ដោយផ្លូវម៉ៅសេទុងកែងផ្លូវលេខ១៩៣ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន ក្រុងភ្នំពេញ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញរថយន្តប្រភេទដឹងទំនិញមួយគ្រឿង ពណ៌សពាក់ស្លាកលេខ ត្បូងឃ្មុំ3A-1004បានធ្វើដំណើរតាមបណ្ដោយផ្លូវម៉ៅសេទុង ក្នុងទិសដៅពីត្បូងទៅជើងលុះមកដល់ចំណុចកើតហេតុ កែងផ្លូវលេខ១៩៣ ស្រាប់តែរថយន្តទៅបុកម៉ូតូពីក្រោយចំពេញមួយទំហឹង បណ្ដាលឲ្យយុវជនម្នាក់ ត្រូវរថយន្តកិនពីលើបណ្ដាលឲ្យស្លាប់ភ្លាមៗ នៅនឹងកន្លែងយ៉ាងអាណោចអាធ័ម។ ភ្លាមៗនោះដែរអ្នកបើកបររថយន្តបង្កខាងលើ បានបើកទ្វាររត់គេចខ្លួនបាត់ស្រមោល នៅតែព្រូឡានដែលរួមដំណើរជាមួយតែប៉ុណ្ណោះ។
សពឈ្មោះ ញឹម ប៊ុនថា មានអាយុ២៣ឆ្នាំ មានទីលំនៅស្ថិតនៅផ្ទះលេខ១០E1ផ្លូវលេខ១៩៧ សង្កាត់ទំនប់ទឹកខណ្ឌចំការមន ក្រុងភ្នំពេញ មធ្យោបាយធ្វើដំណើរម៉ូតូម៉ាកSuzuki let’s ពណ៌សពាក់ស្លាកលេខភ្នំពេញ1FD-1998។
ក្រោយកើតហេតុសពត្រូវបានក្រុមគ្រួសារ ដឹកយកទៅធ្វើបុណ្យតាមប្រពៃណី រឺឯវត្ថុតាងទាំង២ត្រូវបានអាជ្ញាធរយកទៅរក្សាទុករងចាំដោះស្រាយគ្នានៅពេលក្រោយ។
