លោកនេន ទុំ ពន្លះអ្នកគ្រូពេទ្យពីរនាក់ នៅមន្ទីរពេទ្យរុស្ស៊ី មានសម្តី និងចរិតឫកពារមិនថ្លៃថ្នូរ
ភ្នំពេញ៖ លោកនេន ទុំ ដែលមហាជនស្គាល់ថាជាឌីជេ បានបញ្ចេញនូវវីដេអូមួយ ដោយនិយាយរិះគន់ខ្លាំងៗទៅលើអ្នកគ្រូពេទ្យ ២នាក់ ដែលបម្រើការងារនៅមន្ទីរពេទ្យរុស្ស៊ី ដែលប្រើសម្ដីគំរោះគំរើយ ពេលលោកជូនប្អូនទៅរកសេវាព្យាបាល តែពេទ្យនោះមិនខ្ចីមើលមុខ ថែមទាំងប្រើសម្ដីសម្លុត ធ្វើឲ្យលោកស្រងាកចិត្ត និងខឹងយ៉ាងខ្លាំង។
ក្នុងវីដេអូនោះ នេន ទុំ បានបញ្ចេញនូវទស្សនកាលពីថ្ងៃទី៧ខែធ្នូថា “ខ្ញុំមិនពេញចិត្តនូវសម្តីរបស់អ្នកគ្រូពេទ្យទាំងនោះទេ ដែលមិនសមតម្លៃនៃការងាររបស់ពួកគាត់សោះ ហើយលោកបន្តថា ក្នុងនាមជាគ្រូពេទ្យត្រូវមានសម្តី និងចរិតឫកពារថ្លៃថ្នូរ មានវិជ្ជាជីវៈ មានសេចក្តីថ្លែថ្នូរ មានក្រមសីលធម៌ ឲ្យសមជាគ្រូពេទ្យ ពីព្រោះទម្រាំបានធ្វើជាពេទ្យត្រូវអស់ជាច្រើនឆ្នាំ មានលុយប្រាក់ច្រើន មានរថយន្តជិះទំនើប ធ្វើការនៅមន្ទីរពេទ្យល្អៗ បែរមកជាប្រើចរិតថោកទាបបែបមនុស្សមិនដឹងខ្យល់អីបែបនេះទៅវិញ។ លោកបន្តថា ខ្ញុំនិយាយរិះគន់តែអ្នកគ្រូពេទ្យពីរនាក់នេះទេ ហើយខ្ញុំសោកស្តាយណាស់ ចំពោះចំណេះវិជ្ជានេះ អ្នកគ្រូពេទ្យអើយ មាយាទអន់ ថោក ចំណែកពេទ្យល្អ ខ្ញុំសុំទោស កុំប្រកាន់ ខ្ញុំនិយាយតែពេទ្យពីរនាក់នៅក្នុងពេទ្យរុស្ស៊ីនេះទេ”។
ទោះយ៉ាងណា នៅលើទំព័រហ្វេសប៊ុករបស់មន្ទីរពេទ្យមិត្តភាពខ្មែរ-សូវៀត(ពេទ្យរុស្ស៊ី) បានបង្ហោះសារឆ្លើយតបនឹងការរិះគន់របស់អ្នកចម្រៀង និងជាឌីជេ នេន ទុំ ហើយដោយសន្យាចាត់វិធានការលើបុគ្គលិកនោះ បើពិតជារកឃើញថាប្រព្រឹត្តិកំហុសដូចការចោទមែន។
ទំព័រហ្វេសប៊ុកមន្ទីរពេទ្យឈ្មោះផ្នែកជំងឺសើស្បែកនៃមន្ទីរពេទ្យមិត្តភាពខ្មែរ-សូវៀត បានសរសេររៀបរាប់ថា “ក្នុងនាមយើងខ្ញុំជាអ្នកទទួលខុសត្រូវ ផ្នែកជំងឺសើស្បែកនៃមន្ទីរពេទ្យមិត្តភាព ខ្មែរ~សូវៀត សូមថ្លែងអំណរគុណចំពោះម្ចាស់ Facebookឈ្មោះ Nen Tum ដែលបានអញ្ជើញមកប្រើប្រាស់សេវា នៅផ្នែករបស់យើងខ្ញុំ ហើយបានផ្តល់យោបល់រិះគន់ស្ថាបនា ដើម្បីឲ្យយើងខ្ញុំ ពិនិត្យ និងយកចិត្តទុកដាក់ ក្នុងការពង្រឹងការផ្តល់សេវា ជូនដល់អតិថិជនឲ្យបានកាន់តែល្អប្រសើរ។ បើសិនយើងខ្ញុំរកឃើញកំហុស ដូចការលើកឡើងដូចម្ចាស់ face book ខាងលើពិតប្រាកដមែន យើងនឹងមានវិធានការអប់រំ ណែនាំដល់បុគ្គលនោះ។ យើងខ្ញុំស្វាគមន៍រាល់មតិយោបល់ពីសំណាក់អតិថិជន ក្នុងន័យរិះគន់ដើម្បីស្ថាបនា”៕
