អគ្គស្នងការដ្ឋាននគរបាលជាតិបដិសេធការផ្សាយបណ្តាញសង្គម Natiya Aek Ka រឿងសិស្សសន្លប់នៅបាត់ដំបង
(ភ្នំពេញ) អគ្គស្នងការដ្ឋាននគរបាលជាតិ សូមធ្វើការបដិសេធចំពោះការផ្សាយរបស់បណ្តាញសង្គមនៃគណនី ឈ្មោះ ណាធីយ៉ា ឯកា (Natiya Aek Ka) ដែលបានផ្សាយជុំវិញហេតុការណ៍ពាក់ព័ន្ធនឹងសិស្សសាលាវិទ្យាល័យថ្មគោល ខេត្តបាត់ដំបងជិត១០០នាក់បានដួលសន្លប់។
បណ្តាញសង្គមរបស់គណនីឈ្មោះណាធីយ៉ា ឯកា (Natiya Aek Ka) បានសរសេរថាមានជនជាតិចិន បានចុះសុំនាយកសាលាមកពិនិត្យសុខភាពសិស្សដោយសិស្សខ្លះត្រូវបានជួសឈាម រីឯសិស្សខ្លះត្រូវចាក់ថ្នាំ និងពិនិត្យ ចង្វាក់បេះដូង។
យោងតាមនាយកសាលាវិទ្យាល័យថ្មគោល លោក ហេង ស៊ុនផារិទ្ធ បានបំភ្លឺថា ហេតុការណ៍ដួលសន្លប់នេះ បានកើតឡើងចំពោះសិស្ស៧១នាក់ក្នុងនោះសិស្សស្រីមាន៧០នាក់កាលពីថ្ងៃទី៦និង៧ធ្នូឆ្នាំ២០១៨។
លោកហេង ស៊ុនផារិទ្ធ បានបន្តថា កាលពីថ្ងៃទី២និងទី៣ធ្នូ មានក្រុមគ្រូពេទ្យខ្មែរសហការជាមួយក្រុមគ្រូពេទ្យចិន ដែលក្នុងនោះ មានគ្រូពេទ្យចិនប្រមាណពី១០ទៅ២០នាក់ជិះឡានទូរីសចំនួន២ បានធ្វើដំណើរទៅស្រាវ ជ្រាវនូវ ជំងឺ បេះដូងដោយគ្រាន់តែប្រើប្រាស់ប្រដាប់ឧបករណ៍ស្ទង់បេះដូងតែប៉ុណ្ណោះ និងមិនបានជួសឈាមនោះទេ។ ការចុះស្រាវជ្រាវជំងឺ បេះដូងនោះ គឺបានធ្វើតាមសាលាជាច្រើនមិនត្រឹមតែវិទ្យាល័យថ្មគោលប៉ុណ្ណោះទេ ប៉ុន្តែតាមសាលាមួយចំនួនក្នុងស្រុកសង្កែនិងនៅក្នុងក្រុងបាត់ដំបង។ សិស្ស ដែលក្រុមគ្រូពេទ្យបានចុះស្រាវជ្រាវពិនិត្យបេះដូងក្នុងវិទ្យាល័យថ្មគោលនោះ គឺជាសិស្សកម្រិតថ្នាក់ទី៧, ទី៨ និងទី៩។ ចំណែកការដួលសន្លប់របស់សិស្សនៅវិទ្យាល័យថ្មគោលចំនួន៧១នាក់នោះ គឺជាសិស្សថ្នាក់ទី១១និងទី១២នោះទេ ដែលមិនពាក់ព័ន្ធនឹងសិស្សដែលក្រុមគ្រូពេទ្យខ្មែរនិងចិនបានសហការគ្នាស្រាវជ្រាវជំងឺ បេះដូងនោះឡើយ។
ដូច្នេះការផ្សាយតាមបណ្តាញសង្គមរបស់គណនីឈ្មោះ ណាធីយ៉ា ឯកា (Natiya Aek Ka) បានខុសនឹងការពិតលើបញ្ហានេះ។
អគ្គស្នងការដ្ឋាននគរបាលជាតិ សូមបដិសេធថា ការផ្សាយរបស់បណ្តាញសង្គមនៃគណនីឈ្មោះ ណាធីយ៉ា ឯកា (Natiya Aek Ka) ពាក់ព័ន្ធនឹងហេតុការណ៍ដួលសន្លប់ របស់សិស្សសាលាវិទ្យាល័យថ្មគោល ខេត្តបាត់ដំបង ដោយសារជនជាតិចិន បានជួសឈាមសិស្ស និងការចាក់ថ្នាំនោះ មិនមែនជាការពិតឡើយ។ អគ្គស្នងការដ្ឋាន នគរបាលជាតិសូមអំពាវនាវអ្នកលេងបណ្តាញសង្គម សូមកុំ Share រឿងមិនពិត(Fake News) នេះអោយសោះ ពីព្រោះនឹងអាចប្រឈមចំពោះមុខច្បាប់នៃការផ្សាយព័ត៌មានមិនពិតក្នុងចេតនាបំពុលបរិយាកាសសង្គម៕