រដ្ឋសភាជប៉ុន បានអនុម័តច្បាប់អនុញ្ញាត ឲ្យពលករបរទេស អាចស្នាក់នៅ និង បន្តការងារ នៅក្នុងប្រទេសជប៉ុន ទោះបីបក្សប្រឆាំង រារាំង
ភ្នំពេញ៖
បើតាមផេកហ្វេសប៊ុកផ្លូវការរបស់លោកខៀវ កាញារីទ្ធ រដ្ឋមន្រ្តីក្រសួងព័ត៌មាន បានសរសេរថា “សមាជិកសភាមកពីបក្សប្រឆាំងប្រឹងឃាត់លោកប្រធានគណកម្មការច្បាប់ កុំឲ្យធ្វើការបោះឆ្នោតអនុញ្ញាតឲ្យពលករបរទេសអាចស្នាក់នៅ និង បន្តការងារនៅក្នុងប្រទេសជប៉ុន បាន ។ ទោះជាយ៉ាងនេះក្តី ក៏រដ្ឋសភាជប៉ុនបានអនុម័តច្បាប់នេះហើយកាលពីថ្ងៃសៅរ៍ ទី ៨ ធ្នូ ២០១៨ ម្សិលមិញនេះ “។
ចំណែកអ្នកលេងហ្វេសប៊ុក បានចូលខំមិនក្នុងផេករបស់លោករដ្ឋមន្រ្តីថា ជប៉ុនមានកំណើនមនុស្សចាស់កាន់តែច្រើនទៅៗ កំណើនមនុស្សក៏តិច មនុស្សពេញកម្លាំងធ្វើការក៏ថយតិចទៅដែរ បើមិនឲ្យយកពលករបរទេសទៅធ្វើការតើមានកម្លាំងមពីណាធ្វើទៅ បាត់បង់កម្លាំងពលកម្មធ្វើឲ្យរោងចក្រ សហគ្រាស ការដ្ឋានសំណង់ កសិកម្មជាដើមនឹងផលិតមិនទាន់តម្រូវការទេ កំណើនសេដ្ឋកិច្ចជាតិក៏ថយទៅតាមនឹងដែរ។
នៅពេលដែលជប៉ុន គិតអំពីជាតិនិយម តែជប៉ុនកំពង់តែភ្លេចពីកង្វះខាតកម្លាំងពលកម្មរបស់ខ្លួន នៅក្នុងការអភិវឌ្ឍសេដ្ឋកិច្ចជាតិ ។ តាមរយៈកម្មវិធី training system ពលករបរទេសជាច្រើនបានបម្រើការនៅជប៉ុន ជាលក្ខណៈបណ្តោះអាសន្ន និងមានជំនាញទាប។
ចំជាគ្មានគំនិតវែងឆ្ងាយមែន។ ប្រជាជនជប៉ុន សកម្មកាងារមានភាគរយមិនច្រើនទេ ដោយសារគូរស្រករថ្មីមិនចង់បានកូន សេវាសុខាភិបាលល្អដែលធ្វើអោយមនុស្សចាស់ មានចំនួនកាន់តែច្រើន។បើមិនអោយយកពលករបរទេស តើឲ្យប្រើអ្នកណា?
សូមបញ្ជាក់ថា សភាជាន់ខ្ពស់ជប៉ុន (Upper house) នៅថ្ងៃសៅរ៍ទី៨ ខែធ្នូ បានអនុម័តច្បាប់អន្តោប្រវេសន៍ដ៏ចម្រូងចម្រាស់មួយ ដោយអនុញ្ញាតឲ្យពលករបរទេសរាប់ម៉ឺននាក់ មករស់នៅ និងបម្រើការក្នុងប្រទេសខ្លួន។ ច្បាប់ថ្មីនេះ នឹងបើកទ្វារជប៉ុនកាន់តែធំទូលាយ ក្នុងគោលដៅជួយដោះស្រាយបញ្ហាកង្វះកម្លាំងពលកម្ម ដែលកើតចេញពីការថយចុះនៃកំណើតប្រជាជន និងការកើនឡើងនៃចំនួនមនុស្សចាស់ជរា។
វិសោធនកម្មច្បាប់អន្តោប្រវេសន៍ជប៉ុន ត្រូវបានរដ្ឋសភាអនុម័តកាលពីយប់ថ្ងៃទី២៧ ខែវិច្ឆិកា ឆ្នាំ២០១៨ បើទោះជាមានការរិះគន់ពីគណបក្សប្រឆាំងក៏ដោយ។
សារព័ត៌មានជប៉ុន បានឱ្យដឹងថា ច្បាប់នេះនឹងបង្កើតទិដ្ឋាការថ្មី២ប្រភេទគឺពលករជំនាញ១(អាចធ្វើការប្រាំឆ្នាំ) និងពលករជំនាញ២ (អាចស្នាក់នៅអចិន្ត្រៃយ៍ និងធានាក្រុមគ្រួសារមករស់នៅជាមួយបាន)។
ដើម្បីទទួលបានឱកាសនេះ សូមប្អូនៗខំប្រឹងរៀនភាសាជប៉ុន គោរពច្បាប់ប្រទេសជប៉ុន កុំរត់គេចពីកន្លែងធ្វើការ និងមិនសុំសិទ្ធជ្រកកោនជាជនភៀសខ្លួនដោយគ្មានហេតុផលត្រឹមត្រូវ។
ច្បាប់គ្រប់គ្រងជនអន្តោប្រវេសន៍ថ្មី ដែលទើបតែត្រូវបានសភាជាន់ទាបសម្រេចអនុម័ត កាលពីថ្ងៃទី ២៧ ខែវិច្ឆិកាកន្លងទៅ ជាចុងក្រោយ ត្រូវបានអនុម័តនៅក្នុងព្រឹទ្ធសភាជប៉ុន ក្នុងសំឡេងគាំទ្រ ១៦១ ទល់នឹង ៧៦។ ក្រោមប្រព័ន្ធអន្តោប្រវេសន៍ថ្មីនេះ រដ្ឋាភិបាលជប៉ុនមានគោលដៅទទួលយកពលករបរទេសប្រមាណ ៣៤៥ ០០០ នាក់ ក្នុងវិស័យកំពុងខ្វះខាតកម្លាំងពលកម្ម រួមមាន សំណង់ កសិកម្ម សេវកម្មដឹកជញ្ជូន ថែទាំសុខភាព និងវិស័យផ្សេងៗទៀត ក្នុងរយៈពេល៥ឆ្នាំ។
បើតាមទីភ្នាក់ងារព័ត៌មាន AFP នាយករដ្ឋមន្ត្រីជប៉ុន ស៊ីនហ្សូ អាបេ បានបញ្ជាក់ទៅកាន់សភាជប៉ុន កាលពីថ្ងៃទី៦ ខែធ្នូថា៖ «យើងមានបំណងចាប់ផ្តើមច្បាប់ថ្មីនេះ ក្នុងខែមេសា ឆ្នាំ២០១៩ ដោយសារតែយើងត្រូវការផ្លាស់ប្តូរប្រព័ន្ធថ្មីមួយ ក្នុងគោលដៅជួយដោះស្រាយបញ្ហាកង្វះកម្លាំងពលកម្ម ដែលកំពុងជួបប្រទះសព្វថ្ងៃនេះ»។
យោងតាមក្រសួងការងារជប៉ុន ចំនួនពលករបរទេសក្នុងប្រទេសជប៉ុនមានចំនួនប្រមាណ ១,២៨លាននាក់ គិតត្រឹមចុងខែតុលានេះ ដែលកើនឡើងពីចំនួន ៦៨ម៉ឺននាក់ កាលពីឆ្នាំ២០១២។ ក្នុងចំណោមពលករបរទេសទាំងអស់ ជនជាតិចិនមានចំនួនច្រើនជាងគេបំផុតដែលស្មើនឹង៣៧ម៉ឺននាក់ និងតាមពីក្រោយដោយវៀតណាម និងហ្វីលីពីន៕
