ចាប់ជនជាតិវៀតណាមម្នាក់ ករណីធ្វើសកម្មភាព ភ្ជង់ប្លន់ប្រដាប់អាវុធ
កំពត៖ កងកម្លាំងអាវុធហត្ថ បានចាប់ខ្លួនជនសង្ស័យម្នាក់ ជាជនជាតិវៀតណាម និងបក្ខពួក ក្នុងករណីប្លន់អាវុធខ្លីចំនួន ២ដើម បានធ្វើសកម្មភាពភ្ជង់ប្លន់ ជនរងគ្រោះចំនួនបួននាក់ មាននៅវេលាម៉ោង ១៨ និង ១៥នាទីថ្ងៃទី២៣ ខែមិថុនា ឆ្នាំ២០១៨ នៅចំណុចភូមិត្រពាំងពោន ឃុំបន្ទាយមាស ស្រុកបន្ទាយមាស ខេត្តកំពត។
កងកម្លាំងអាវុធហត្ថ បានឲ្យដឹងថា ជនសង្ស័យឈ្មោះ ឡេ វ៉ាន់ណាំ ភេទប្រុស អាយុ ៥៤ឆ្នាំ ជនជាតិវៀតណាម រស់នៅទីក្រុងហ្វីញើន ខេត្តប៊ិញជិន ប្រទេសវៀតណាម និងជនរងគ្រោះឈ្មោះដូចខាងក្រោម៖ ១.ឈ្មោះ តាំង ជុងលី ភេទប្រុស អាយុ ៣៥ឆ្នាំ មានទីលំនៅសង្កាត់ទួលស្វាយព្រៃ១ ខណ្ឌចំការមន ភ្នំពេញ។ ២.ឈ្មោះ លឺន កាំគៀម ភេទប្រុស អាយុ ៣០ឆ្នាំ ជនជាតិវៀតណាម រស់នៅទីក្រុងហូជីមិញ ៣.ឈ្មោះ ញ៉ គឺមអាន់ ភេទស្រី អាយុ ៤២ឆ្នាំ ជនជាតិវៀតណាម រស់នៅទីក្រុងសៃហ្កន ៤.ឈ្មោះ អេ វ៉ាន់គាន់ ភេទប្រុស អាយុ ៥០ឆ្នាំ ជនជាតិចិនហុងកុង សម្ភារៈបាត់បង់ប្រាក់ ១.០០០ដុល្លារ, លិខិតឆ្លងដែន, ប័ណ្ណសម្គាល់យានយន្តចំនួនមួយ និងឯកសារមួយចំនួនទៀត។
ក្រោយធ្វើសកម្មភាពប្លន់រួច កម្លាំងអាវុធហត្ថ បានឃាត់ខ្លួនជនសង្ស័យម្នាក់ឈ្មោះ ឡេ វ៉ាន់ណាំ និងដកហូតរថយន្តចំនួនមួយគ្រឿងម៉ាក ORLANDO LTZ CHEVROLET ពណ៌សពាក់ស្លាលេខ 51.G485.63 ពណ៌ស។
បច្ចុប្បន្នជនសង្ស័យ ត្រូវបានឃាត់ខ្លួន នៅមន្ទីយុត្តិធម៌ កងរាជអាវុធហត្ថខេត្ត ដើម្បីចាត់ការតាមនីតិវិធី៕
