ឯម ឡេងលី ជួប វ៉ាន់ ពីយ៉ាក់ ឯ សេង ស្រឿន ជួប យ៉ត ប៉ាគីផាន់
ភ្នំពេញ:អ្នកប្រដាល់ជើងខ្លាំងស្រករក្រោយកម្ពុជា ឯមឡេងលី ក្លិបថ្មគោលពោធិសែនជ័យ នឹងឡើងប្រកួតជាមួយអ្នកប្រដាល់ជើងខ្លាំងថៃវ៉ាន់ ពីយ៉ាក់(Van Piyak) នារសៀលថ្ងៃសៅរិ៍ទី១៥ធ្នូលើសង្វៀនខារ៉ាបាវរបស់អាស៊ីអាគ្នេយ៍។
អ្នកប្រដាល់ទាំងពីររូបនេះ ជួបប្រកួតគ្នាក្នុងប្រភេទទម្ងន់៧១គីឡូក្រាម ។វ៉ាន់ ពីយ៉ាក់ អ្នកប្រដាល់ថៃរូបនេះ មុននេះ(២៥វិច្ឆិកា២០១៨)គេដាក់ឈ្មោះថា Buakeaw មកប្រកួតជាមួយម៉ឺន សុភា ហើយវាយស្មើពិន្ទុគ្នា ។ ហើយបើកាលពីពីរឆ្នាំមុនអ្នកប្រដាល់ថៃនេះ គេមានឈ្មោះថា Rarueng Luk Champachai ធ្លាប់មកប្រកួតនៅកម្ពុជាច្រើនលើកហើយដែរ ។
អ្នកប្រដាល់ថៃរូបនេះ គេមានសមត្ថភាពខ្លាំងក្លាណាស់ គួបផ្សំនឹងកាយសម្បទាល្អ គឺខ្ពស់ ដៃ-ជើងវែង ដែលអំណោយផលដល់ការប្រើគ្រប់ស្នៀតទាំងអស់ ទាំងដៃ ជើង ជង្គង់កែងនោះ។
ក្នុងប្រវត្តិដែលគេធ្លាប់ប្រកួតលើសង្វៀននានានៅស្រុកខ្មែរនោះអ្នកប្រដាល់ថៃរូបនេះធ្លាប់វាយឈ្នះឯម ខ្លឹមខ្មៅ ក្នុងទឹកទី៣ វាយស្មើជាមួយពេជ្រ សីហា ចាញ់កែវ រំចង់ដោយពិន្ទុ វាយឈ្នះ វង្ស ណយ ក្នុងទឹកទី៤និងធ្លាប់វាយឈ្នះចាញ់និងស្មើជាមួយម៉ឺន សុភាទៀតផង ។ មិនតែប៉ុណ្ណោះវាយឈ្នះ-ចាញ់និងស្មើជាមួយម៉ឺន សុភាហើយនោះ តើឯមឡេងលី អាចយកឈ្នះគេបានឬអត់លើកនេះ ? ។
យ៉ាងណា វ៉ាន់ ពីយ៉ាក់ ជាជើងខ្លាំងនិងជាម្ចាស់ខ្សែក្រវាត់ដល់ទៅពីរស្ថាប័ននៅស្រុកថៃ។ អ្នកប្រដាល់ថៃរូបនេះ មានប្រវត្តិប្រកួតចំនួន៨៣លើក ឈ្នះ៧១លើក ចាញ់១១លើក និងស្មើ០១លើក ។
ឯម ឡេងលី ពិបាកសង្ឃឹមឈ្នះវ៉ាន់ ពីយ៉ាក់ ណាស់ បើធៀបជាមួយប្រវត្តិប្រកួតរបស់គេនោះ ដោយឯម ឡេងលី មានកំនត់ត្រាប្រកួតតែ៥០លើក ឈ្នះ៤១លើក ចាញ់០៨លើក ស្មើ០១លើកនោះ ។
សេង ស្រឿន មកពីក្លិបមហិទ្ធរិទ្ធមេសរថ្ងកមានជ័យ ត្រូវគេផ្តល់ឪកាសឲ្យជួបប្រកួតជាមួយអ្នកប្រដាល់ថៃចំណូលថ្មីយ៉ត ប៉ាគីផាន(Yorth Pakiphan) ។
ពួកគេពីរនាក់នេះ ជួបគ្នាក្នុងប្រភេទទម្ងន់ ៦៣,៥០០ គីឡូក្រាម ។សេង ស្រឿន និង យ៉ត ប៉ាគីផាន នេះ ពុំធ្លាប់ជួបគ្នាទេពីមុនមក ។
សេង ស្រឿន ជាអ្នកប្រដាល់មួយរូបល្អទាំងកណ្តាប់ដៃ ជង្គង់ និង កែង ។ សេង ស្រឿនធ្លាប់ជួបប្រកួតជាមួយថៃជិត៣០លើកហើយកន្លងមក ដោយឈ្នះ១៨លើកនិងចាញ់០៨លើក ដែលការប្រកួតចុងក្រោយរបស់គេ គឺវាយចាញ់អ្នកប្រដាល់ថៃ ឈោគឆៃ (Chhuok Chhai)ក្នុងទឹកទី១ កាលពីថ្ងៃទី២៨តុលា២០១៨ ។
យ៉ត ប៉ាគីផាន គេមិនដែលមកស្រុកខ្មែរទេកន្លងមក គឺជាលើកទី១ដែលគេមកជួបជាមួយសេង ស្រឿននេះ ។ អ្នកប្រដាល់ថៃរូបនេះ មានប្រវត្តិប្រកួត៥៧លើក ឈ្នះ៤៧លើក ចាញ់១០លើក មិនដែលស្មើ ខណះដែលសេង ស្រឿន មានកំនត់ត្រាប្រកួត៨១លើក ឈ្នះ៦៤លើក ចាញ់១៧លើក និងមិនដែលស្មើ ។
អ្នកប្រដាល់ក្លិបមហិទ្ធរិទ្ធមេសរថ្ងករូបនេះមួយរយៈកន្លងមកនេះគេរាងស្រុតធ្លាក់ដោយវាយចាញ់ថៃបីលើកជាប់ៗគ្នា ។ ចាំមើល សេង ស្រឿន អាចយកឈ្នះអ្នកប្រដាល់ថៃចំណូលថ្មីនេះ បានឬអត់ ?
