មន្ទីរសាធារណការ ព្រះវិហារ សហការជាមួយអាជ្ញាធរស្រុកជាំក្សាន្ត នឹងធ្វើការអនុវត្តច្បាប់តឹងរឹង ចំពោះអ្នកលក់ដូរ តាមចិញ្ចើមផ្លូវ
ព្រះវិហារ៖ មន្ទីរសាធារណការ និងជញ្ជូនខេត្តព្រះវិហារ សហការជាមួយអាជ្ញាធរស្រុកជាំក្សាន្ត នឹងធ្វើការអនុវត្តច្បាប់តឹងរឹង ចំពោះអ្នកលក់ដូរ តាមចិញ្ចើមផ្លូវ ខណៈដែរ នៅទីប្រជុំជន ឃុំស្រអែម ស្រុកជាំក្សាន្ត ខេត្តព្រះវិហារ មានប្រជាពលរដ្ឋមួយចំនួនតូច បានយកចិញ្ចើមផ្លូវរបស់រដ្ឋប្រកបមុខរបរលក់ដូរ និងធ្វើអាជីវកម្មនានា បង្កផលប៉ះពាល់ ដល់សណ្ដាប់ធ្នាប់សាធារណៈ។
តាមការបញ្ជាក់របស់លោក សំ លាងទ្រី ប្រធានមន្ទីរសាធារណការ និងជញ្ជូនខេត្តព្រះវិហារ បានអោយដឹងនៅ,ថ្ងៃទី១៣ធ្នូ២០១៨នេះថា ខណៈពេលនេះ នៅទីប្រជុំជន ឃុំស្រអែម ស្រុកជាំក្សាន្ត ខេត្តព្រះវិហារ មានប្រជាពលរដ្ឋមួយចំនួនតូច បានយកចិញ្ចើមផ្លូវរបស់រដ្ឋប្រកបមុខរបរលក់ដូរ និងធ្វើអាជីវកម្មនានា ដែលបង្កផលប៉ះពាល់ ដល់សណ្ដាប់ធ្នាប់សាធារណៈ។
លោកបញ្ជាក់បន្ថែមថា មន្ទីរសាធារណការ និងជញ្ជូនខេត្តព្រះវិហារ សហការជាមួយអាជ្ញាធរស្រុកជាំក្សាន្ត នឹងធ្វើការអនុវត្តច្បាប់តឹងរឹង ចំពោះអ្នកលក់ដូរ តាមចិញ្ចើមផ្លូវទាំងនោះ។ លោកថា ផ្លូវរបស់រដ្ឋសោះ បែរជាមានប្រជាពលរដ្ឋមួយចំនួន បានយកចិញ្ចើមផ្លូវដែលជារបស់រដ្ឋទៅជួលអោយអ្នកដ៏ទៃ ដើម្បីធ្វើអាជីវកម្មលក់ដូរទៅវិញ ហើយលក់យូៗអាចឈានទៅសង់តូប និងធ្វើការសាងសង់សំណង់រឹង ដល់ពេលរដ្ឋត្រូវការពង្រីកផ្លូវប៉ះពាល់ដល់ពួកគាត់បន្តិច រដ្ឋត្រូវចេញថវិកា សងវិញ ដែលករណីនេះបានធ្វើឲ្យខាតបង់ថវិកាជាតិយ៉ាងច្រើនសន្ធឹកសន្ធាប់។
ដើម្បីសុវត្ថិភាពផ្ទាល់ខ្នួន និងរក្សាបានសណ្ដាប់ធ្នាប់សាធារណៈល្អប្រសើរ លោកសំ លាងទ្រីសូមអំពាវនាវអោយបងប្អូនប្រជាពលរដ្ឋមេត្តាចូលរួមគោរពច្បាប់ទាំងអស់គ្នា៕
