កងរាជអាវុធហត្ថខេត្តព្រៃវែង បង្រាបទីតាំងជល់មាន់មួយកន្លែង ចំណែកម្ចាស់ទីតាំង និងអ្នកលេងរត់បាត់ ស្រមោល

ព្រៃវែង ៖ កំលាំងមន្ទីរយុត្តិធម៌កងរាជអាវុធហត្ថ ខេត្តព្រៃវែង សហការជាមួយ កងរាជអាវុធហត្ថ ស្រុកកំចាយមារ បានចុះបង្រ្កាប ទីតាំងបព្ជាល់មាន់មួយកន្លែង រឹបអូសបានវត្ថុតាងមួយចំនួនខណៈ ម្ចាស់ទីតាំង និងអ្នកលេង រត់បាត់ស្រមោល ។
ជុំវិញប្រតិបត្តិការនេះលោកឧត្តមសេនីយ៍ត្រី ឈួន គឹមសាន មេបញ្ជាការកងរាជអាវុធហត្ថ ខេត្តព្រៃវែង បានលើកឡើងឲ្យដឹងថា អាជ្ញាធរខេត្តមិនអនុញ្ញាតិឲ្យមាន ល្បែងស៊ីសងខុសច្បាប់កើតមាន នោះទេ ព្រោះកាលណាមានល្បែងស៊ីសងខុសច្បាប់ បទល្មើស និង អំពើហឹង្សាផ្សេងៗ ពិសេសអំពើហឹង្សាក្នុងគ្រួសារនឹង កើតឡើងច្រើន ។ ដូច្នេះដើម្បីរក្សាបាននូវសន្តិសុខសុវត្ថិភាពជូន ប្រជាពលរដ្ឋ ក៏ដូចជាធ្វើយ៉ាងណាឲ្យ ភូមិ/ឃុំ មានសុវត្ថិភាពនោះ ទើបកម្លាំងរបស់លោកធ្វើសកម្មភាពស្រាវជ្រាវ សហការជាមួយ ប្រជាពលរដ្ឋជាប្រចាំដើម្បីទប់ស្កាត់ និងបង្ក្រាបទីតាំងល្បែង ខុសច្បាប់ គ្រប់ពេលដោយមិនបណ្តោយឲ្យកើយមានបង្ករផលប៉ះ ពាល់ដល់ ប្រជាពលរដ្ឋល្អឡើយ ។ ជាក់ស្តែងការចុះបង្ក្រាបទីតាំង ខាងលើនេះ គឺបន្ទាប់ពីមានសេចក្តីរាយការណ៍ពីប្រជាពលរដ្ឋទើប កម្លាំងកងរាជអាវុធហត្ថមន្ទីរយុត្តិធម៌ សហការជាមួយកំលាំង មូលដ្ឋានកងរាជអាវុធហត្ថស្រុកកំចាយមារ ចុះបង្រ្កាបទីតាំងលេង ល្បែស៊ីសង និងបញ្ជល់មាន់ ស្ថិតនៅចំនុចភូមិគោកព្រាល ឃុំស្មោងជើង ស្រុកកំចាយមារ ខេត្តព្រៃវែងមួយកន្លែង ។

ប្រតិបត្តិការណ៍នេះ សមត្ថកិច្ចបានចាប់យកវត្ថុតាងមួយចំនួន ដូចជា ម៉ូតូចំនួន៣៩គ្រឿង , មាន់ ០៤ក្បាល , ទ្រុងក្រុងមាន់ ០៥ , កន្ត្រកដាក់មាន់ ០៧ , ជញ្ជីងចំនួន០១ , មេអាប៉ោងចំនួន០៣។
រីឯម្ចាស់ផ្តល់ទីតាំង និងអ្នកញៀនល្បែងបព្ជាល់មាន់ បានរត់បាត់ ស្រមោលគ្មានសល់ម្នាក់ ព្រោះពួកគេហាក់បាននឹងមុនពេល សមត្ថកិច្ចទៅដល់ ។ បច្ចុប្បន្នវត្ថុតាងរក្សាទុក នៅបញ្ជាការដ្ឋាន កងរាជអាវុធហត្ថខេត្ត ដើម្បីចាត់ការតាមនិតិវិធី ៕ ដោយ ៖ មរតក