ជនជាតិខ្មែរ-ឥស្លាមម្នាក់ ត្រូវរថយន្តក្រុង បុកស្លាប់ ពេលជិះកង់ទៅព្រះវិហារ
ភ្នំពេញ៖ ជនជាតិខ្មែរ-ឥស្លាម ម្នាក់ ត្រូវរថយន្តក្រុងក្រុមហ៊ុន រស្មីភ្នំពេញ អ៊ិចប្រេស បុកស្លាប់យ៉ាងអណោចអធម ពេលពុងជិះកង់ឆ្លងផ្លូវ ទៅព្រះវិហារឥស្លាម ហេតុការណ៍នេះបានកើតឡើង នៅវេលាម៉ោង១២និង៣០នាទី ថ្ងៃទី២៨ ខែធ្នូ ឆ្នាំ២០១៨ ដែលស្ថិតនៅតាមបណ្ដោយផ្លូវជាតិលេខ៥ ក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះឈ្មោះ ឡឹប ម៉ាត់ អាយុ៧៥ឆ្នាំ មុខរបរអ្នកនេសាទ ស្នាក់នៅតាមបណ្តោយ ផ្លូវជាតិលេខ៥ ក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
តាមការបញ្ជាក់ពីសាច់ញាតិ ជនរងគ្រោះបានជិះកង់ចេញពីផ្ទះ ក្នុងគោលបំណងទៅព្រះវិហារ ខណៈកំពុងជិះឆ្លងផ្លូវ ជិតផុតហើយ ស្រាប់តែមានរថយន្តក្រុង បើកជែងទៅបុក កង់ពេញទំហឹង បណ្ដាលឲ្យស្លាប់បាត់បង់ជីវិតភ្លាមៗ នៅនឹងកន្លែងកើតហេតុ។ ចំណែកអ្នកបើកបររត់គេចខ្លួនបាត់។
ក្រោយពេលកើតហេតុ កម្លាំងមូលដ្ឋាន បានចុះមកដល់ទីតាំងកើតហេតុ ដើម្បីចុះមកវាស់វែង យករថយន្តបង្ក ទៅកាន់ការិយាល័យចរាចរផ្លូវគោករាជធានី ដើម្បីរង់ចាំដោះស្រាយគ្នាជាមួយភាគីរងគ្រោះ ៕
