សុីម៉ាក់ រកឃើញឃ្លាំងគ្រាប់ ជាង១៥០០គ្រាប់ នៅមូលដ្ឋាន ស្នងការប៉ូលិសខេត្តកំពង់ចាម
ភ្នំពេញ៖ លោកហេង រតនា អគ្គនាយកស៊ីម៉ាក់ កាលពីថ្ងៃទី២៦ធ្នូ បានសរសេរលើផេកហ្វេសប៊ុកថា មន្ត្រីអង្គភាពសុីម៉ាក់នៃកងឯកកាពទី៥ បានពុះពារគ្រប់ឧសគ្គបោសសំអាត តំបន់ប្រឈមគ្រោះថ្នាក់ខ្ពស់ប្រកបដោយជោគជ័យ ដែលបានបន្សាបជាង១.៥០០គ្រាប់ ដោយក្នុងនោះមានគ្រាប់យុទ្ធភណ្ឌមិនទាន់ផ្ទុះ ចំនួនជាង900 គ្រាប់ មីន20 គ្រាប់ ក្បាលផ្ទុះ600 និងគ្រាប់កាំភ្លើងធុនស្រាលជាង2000Kg។ ទីតាំងបោសសំអាតនោះ ជាឃ្លាំងគ្រាប់ចាស់ និងឆេះផ្ទុះ ដែលជាមូលដ្ឋានស្នងការប៉ូលីសខេត្តកំពង់ចាម នៅកណ្តាលខេត្តតែម្តង។ ការងារនេះបានទទួលការគាំទ្រពីលោក អភិបាលខេត្ត និងលោកស្នងការខេត្តកំពង់ចាម។ ពេលប្រតិបតិ្តការដោយគ្មានគ្រោះថ្នាក់ នោះហេីយជាជោគជ័យរបស់អ្នកអនុវត្តជាក់ស្តែង។
លោក បានបន្តថា មួយថ្ងៃបោសសំអាតគ្រាប់បែកទម្លាក់ពីយន្តហោះ ៤ខេត្តផេ្សងគ្នា តាកែវ កណ្តាល រតនគិរី និងខេត្តមណ្ឌលគីរី។ ថ្ងៃទី27ធ្នូ2018នេះ ក្រុមជំនាញEOD របស់អង្គភាពសុីម៉ាក់ បានឆ្លើយតបសំណើគ្រាប់ទម្លាក់ពីយន្តហោះចំនួន៣ នៅលើទីតាំងផ្សេងគ្នាដូចខាងក្រោម៖ ១. គ្រាប់ទម្លាក់ពីយន្តហោះMK-82 ចំនួន១គ្រាប់នៅភូមិ ព្រៃមោគ ឃុំស្រែរនោង ស្រុកត្រាំកក់ ខេត្តតាកែវ ។ ២. គ្រាប់ទម្លាក់ពីយន្តហោះMK-82 ចំនួន១គ្រាប់ នៅភូមិស្លែងមានជ័យ ឃុំឈ្វាំង ពញាឮ ខេត្តកណ្តាល ។ ៣. គ្រាប់ទម្លាក់ពីយន្តហោះMK-82 ចំនួន១គ្រាប់នៅភូមិភិ ឃុំសេសាន ស្រុកអូរយ៉ាដាវ ខេត្តរតនគិរី
៤. គ្រាប់ប្រភេទ M-117នៅខេត្តមណ្ឌលគិរី ។
លោកអគ្គនាយកស៊ីម៉ាក់ បានបន្តថា មានអ្នកខ្លះយល់ថា ដីមានគ្រាប់បែកទម្លាក់ពីយន្តហោះ ជាដីមិនសូវមានមហានិភ័យខ្ពស់ទេ នាំគ្នាជីកកាយទៅ ចាំជួបគ្រាប់ ចាំហៅជំនាញឱ្យជួយដោះស្រាយ ក្រែងគ្មានឱកាសហៅជំនាញ បេីផ្ទុះហេីយ គឺជីវិតខ័ណ្ឌចប់។ សុំបងប្អូនប្រជាពលរដ្ឋ បេីដឹងថាដីតំបន់ខ្លួនមានត្រូវគ្រាប់បែកទម្លាក់ពីយន្តហោះក្តី ពីគ្រាប់បាញ់គ្នាក្នុងសង្គ្រាមក្តី សូមរាយការណ៍ជូនប៉ុស្តនគរបាល អាជ្ញាធរមូលដ្ឋាន ដេីម្បីយេីងចាត់វិធានការសមស្រប។ សម្តេចតេជោ ប្រមុខរាជរដ្ឋាភិបាល គិតគូរណាស់ពីសុខសុវត្ថិភាពប្រជាពលទូទៅ ជាពិសេសក្នុងការរំដោះភាពភ័យខ្លាច របស់ប្រជាជន ចំពោះសំណល់ជាតិផ្ទុះពីសង្គ្រាម៕
