យុវជនម្នាក់ ដើរលេងក្នុងថ្ងៃបុណ្យឆ្លងឆ្នាំសកល ត្រូវជនមិនស្គាល់មុខ លួចបាញ់ប្រហារ
រតនគិរី៖ យុវជនម្នាក់ បានដើរលេងក្នុងថ្ងៃបុណ្យឆ្លងឆ្នាំសកល ត្រូវជនមិនស្គាល់មុខលួចបាញ់ប្រហារ បណ្តាលឲ្យត្រូវរបួសត្រង់ជើងខាងស្តាំ ហើយត្រូវសមត្ថកិច្ចបញ្ជូនទៅសង្គ្រោះបន្ទាន់ភ្លាមៗ នៅមន្ទីរពេទ្យបង្អែកខេត្តរតនគិរី ។
ហេតុការណ៍បានកើតឡើង នៅវេលាម៉ោង៩យប់ថ្ងៃទី៣១ ខែធ្នូ ឆ្នាំ២០១៨ នៅចំណុចខាងត្បូងបឹងកន្សែង ស្ថិតក្នុងភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី។
មន្ត្រីនគរបាលមូលដ្ឋាន បានឲ្យដឹងថា ជនរងគ្រោះឈ្មោះ នឿន វីវ៉ា ភេទប្រុស អាយុ១៨ឆ្នាំ ជនជាតិគ្រឹង រស់នៅភូមិតាងអងប៉ុក ឃុំតាអង ស្រុកកូនមុំ ខេត្តរតនគិរី។
យោងតាម ការសន្និដ្ឋានរបស់សមត្ថកិច្ច ជនសង្ស័យ ប្រើប្រាស់កាំភ្លើងកែច្នៃ ។ ជនរងគ្រោះត្រូវរបួសចំភ្លៅខាងស្ដាំ សមត្ថកិច្ចបានបញ្ជូនទៅសង្គ្រោះនៅមន្ទីរពេទ្យបង្អែកខេត្ត ហើយពេទ្យធ្វើការវះកាត់ រកឃើញគ្រាប់កង់បៀមជាប់នៅក្នុងជើង។ ជនសង្ស័យមិនស្គាល់មុខ បានជិះម៉តូមួយគ្រឿងមិនស្គាល់ម៉ាក លួចបាញ់មកលើជនរងគ្រោះ ដែលកំពុងឈប់ម៉ូតូនៅក្បែរសួនមាត់បឹងកន្សែង។ បន្ទាប់ពីបាញ់ប្រហាររួច ជនដៃដល់ បានជិះមូតូរត់គេចខ្លួនបាត់។
បច្ចុប្បន្នកម្លាំងជំនាញការិយាល័យព្រហ្មទណ្ឌ នៃស្នងការរដ្ឋានគរបាលខេត្ត បានសហការជាមួយកម្លាំងអធិការនគរបាលក្រុងបានលុង កំពុងធ្វើការស្រាវជ្រាវតាមនីតិវិធី ដើម្បីវែកមុខជនសង្ស័យ ឈានទៅរកការឃាត់ខ្លួនយកមកផ្ដន់ទាទោសតាមច្បាប់ ៕